MWAHA WA EKAAPA | SATANA OOKHALA CHIRYENE?

Apwanne Satana Yoosiphela ya Echu Yoonanara?

Chiryene ti wookhweya weemererya wi yeeyo nnaalakhanyaahu Mpiipiliyani vooloca sa Satana yoosiphela ya ichu soothene soonanara. Nyenya apwanne ti yeeyo Piipiliya onahusiheiye? Wakhala wi tihiiha, ntakhara heeni Piipiliya onnamuthoonya Satana alocaka ni Yesu Kiristu ni Muluku a Ikuru soothene? Nthokororye ikwaha piili sa ochekula.

VAAVAA SATANA AALONCEIYE NI YESU

Yesu apaceryaka orummwa wawe, Musaserya aaheererya omweeha Yesu ni saweeha raru. Yoopacerya, Satana aahiilipixerya wi amukhinyererye Yesu opharihela moonanara ikuru seiho Muluku aamvanheiye wi amalihe etala yoomwiilini. Voocharela, Musaserya aamweeha Yesu wi ahele okumi awe vawoopiha naari wi iivuwihe mukhateiye. Wookuchula, Satana aamuroromeliha omvaha Yesu olamulelo woothene wa elapo ni ncicimiho naya waakhanle wi oheera echu ya vakhaani ya omucicimiha. Yesu aakhooca saweeha soothene seiha raru Satana aapharihenleiye moovyaka, mu ekwaha eri yoothene Yesu aanaromola Soorempwa.​—Mateyu 4:1-11; Luka 4:1-13.

Yesu aaloca naani? Apwanne aloca ni mukhalelo woonanara waari mpuwa mwawe? Mwawiiwanana ni Soorempwa, Yesu “áhéhiwa mu sothe sene wi ntoko yehu, nyenya óhitchekaru.” (Ahepri 4:15) Piipiliya tho onii: “Yowo ahátchenkeru, nave mwano mwaháphwanyiweru owoka.” (1 Petro 2:22) Yesu ahiikhalelaru oophaameya, oolipa mmeecelo awiichacala. Owo hintonko weemererya wi makhalelo oonanara yinnuwe mmurimani mwawe. Mweeparipari, tahi wi Yesu aaloca ni mukhalelo woonanara waari mpuwa mwawe, owo chiryene aaloca ni muchu.

Ochekula omohamoha yoola onnooniherya vanlakani vene wi Satana chiryene muchu.

• Muupuwele, Musaserya aaroromeliha omvaha Yesu elapo yoothene ni ncicimiho naya ntoko yoolivela waakhanle wi aamucicimiha. (Mateyu 4:8, 9) Yoovaha ela hiyi ekhaleno yootaphulela waakhanle wi Satana hari muchu chiryene. Opwaha yeeyo, Yesu haatikhinne masu yaala a Satana wi owo taari mulamuleli.

• Yesu amanle okhooca saweeha iha, Musaserya aavinyavo “ophiyerya elukuluku yophwanelela.” (Luka 4:13, Bibiliya Nsu na Muluku, BNM.) Mmukhalelo yoola, apwanne Satana onooneya okhala yoonanara naari mwiicani ootitelela?

• Moone tho wi “angelo yárwa, emuruméla” Yesu. (Mateyu 4:11) Apwanne ankeelo yaale yaaruule wi emurumeele ni omulipiha Yesu yaari soopatuxiwa soomunepani seeparipari? Aai chiryene. Vano, nnaphwanela weemererya wi Satana aari muchu chiryene.

VAAVAA SATANA AALONCEIYE NI MULUKU

Yawooniherya yanaawiili, enavolowela yaweereya ya Yupu mulopwana yoowo aamoova Muluku. Yaweereya yeeyo enaloca sa ovaanela waarivovo variyari va Muluku ni Musaserya. Mu ovaanela woothene Muluku aamuthamalela Yupu nthowa na wiichacala wawe. Satana ahaakaaha wi Yupu aamulapela Muluku nthowa na muhakhu, ntoko wi Muluku aamuthuma wiiwelela wa Yupu. Moonyesererya Musaserya aaloca wi aamusuwela phaama Yupu ompwaha Muluku. Yehova aheemererya wi Satana ampahule Yupu, sookhalano sawe, anamwane awe, ophiyerya tho ekumi awe.a Moovira wa elukuluku, eyo yaakhala vanlakani vene wi Yehova taalonce eparipari vooloca sa Yupu, Satana aahooniwa ntoko mulipa awootha. Muluku aamureeliha Yupu nthowa na wiichacala wawe.​—Yupu 1:6-12; 2:1-7.

Mu ovaanela wa ikwaha soopiili variyari va Satana ni Muluku, Apwanne Yehova aaloca ni mukhalelo woonanara waari mpuwa mwawe? Piipiliya onii: “Miteko sa Muluku ti sawakhwanela.” (2 Samuwele 22:31, BNM.) Masu a Muluku tho anii: “Awéla, awéla, awéla, Apwiya Muluku Aikurusothesene.” (Yawupulula 4:8) Weela onataphulela ohikhalano nthepa, wookololowa, ocai wa yoocheka. Yehova toophaameya ni oohikhalano nthepa. Owo haano makhalelo oonanara.

Nlelo, akina anuupuwela wi Yupu haari muchu, wi ovaanela woothene echu ya waanyiherya. Apwanne masu yaala teeparipari? Soorempwa sinnooniherya wi Yupu aari muchu chiryene. Ntoko yootakiherya, mu Yakopo 5:7-11, nnaphwanya wi Yupu onnaphariheliwa ntoko yootakiherya wi yaaceenyerye Akiristu ovilela mu ilukuluku sookacamiha navetho ennanilipiha ni onuupuxerya wi Yehova onnaavaha phatamari yaale anavilela. Ikuru taani yootakiherya yeela yaahaalaaya okhalano waakhanle wi Yupu haari muchu nave ohiphela woorweela wa Satana, waakhanle pahiru echu ya waanyiherya? Opwaha yeeyo, mu Esekiyeli 14:14, 20 Yupu onaphitaanyeryiwa vamoha ni Noowa ni Taniyeli ntoko alopwana araru a nroromelo. Ntoko Noowa ni Taniyeli, Yupu tho ari muchu ntoko a mahiku ahu, mulopwana a nroromelo. Wakhala wi Yupu aari muchu, yoowo tho aatannya makacamiho awe, haari tho muchu chiryene?

Chiryene, Piipiliya onnamuloca Satana ntoko yoopatuxiwa yoomunepani ekhanle. Akhweya nyuwaano munanwerya wiikoha, ‘Apwanne owo tawoopiha wa miyo vamoha ni emusi aka mmahiku ahu yaala?’

HANKA VOOLOCA SA MAHIKU AHU?

Mwaanyiherye wi nikhuuru na anamahita noovolowa mmuceche anyu. Moohikhwa minikwa olipiheya wa amwaacamani anyu waahaala okhala wa woopopiheya. Vano muthokororye yaweereya yoolikana: Satana ni masololo awe​—soopatuxiwa soomunepani, seiho simmwareenle Muluku—​iri veelaponi ya vathi. Tiivi eri yookhumelela? Muupuwele ichu seiho muniiwaanyu mu soolokoha sa vanipuroni, naari sa ilapo sookhopela.

• Nyuwaano munniiwa waaceereryeya wa ohiiwanana, meerelo a nlala veelaponi yoothene naamwi orivo owetha wi emalihiwe?

• Nyuwaano munniiwa waaceereryeya wa mathatelo anavuwiha onamulosiwe, ni wiichana variyari va imusi sincipale?

• Nyuwaano munniiwa sa opahuliwa wa elapo ni achu naamwi oriwo wiilipixerya wi ekhapeleliwe?

• Apwanne eyo henooniherya wi yookhalavo echu enananre variyari va achu​—navetho wi sookhalavo ikuru sinatannya ipahu seiho?

Ninnoovekaani wi moone taani Piipiliya onamuloceiye ntoko mulipa aweeriha makacamiho oothene: “Nave yárihiwa vathi enowa etokwenesha eyo, enowa yawuluvala eyo, yaweriwa musaserya ni Satana, yeyo enawoka elapo yothene; yárihiwa vathi velaponi, ni angelo aya ene yárihiwano. . . . Ochilu wa moko ni enia, ntakhara musaserya ókhuruwela wa nyuwo, ókhalano wícha mtokotoko, onasuweliye wi emuhalenle mahiku avakhani.” (Yawupulula 12:9, 12) Emanle waalikhela sawooniherya, achu ancipale annaphiyerya osuwela wi Satana yoopatuxiwa yoomunepani yawoopiha, yoowo onavolowela elapo yeela enanrukurerya.

Akhweya nyuwaano munanwerya wiikoha, kini kiwerye hai ophwanya nikhaviheryo. Owo mwaha woochuneya. Mwaha onacharela onahaala onivaha nikhaviheryo noophara muteko.

[Nsu na vathi]