Owo ‘Aanasuwela Ephiro’
GUY HOLLIS PIERCE, a Nikhuuru Noolamulela na Anamoona a Yehova, okuchunle muteko awe veelaponi yavathi Nanawiili, 18 a Marsu a 2014. Owo aarino iyaakha 79 sa oyariwa yaakhwanelaka ewehereryo awe ya ovinya muukhwani wa anna a Yesu.—Ahe. 2:10-12; 1 Pet. 3:18.
Guy Pierce aayariwe o Auburn, California, EUA, 6 a Novempuru a 1934, nave aapatisiwe mu 1955. Owo aamuthela mwahiye Penny, mu 1977 nave aaphuwa echoko. Osuwela wawe ophuwa echoko waakhaviherya mukhalelo awe ntoko tiithi. Mu 1982 yene ni Penny yaari ooweiwa mmuteko wa opiyoneero, nave 1986 aapacerya muteko wa ooweherya a ekulucu wa miyakha 11 o Estados Unidos.
Mu 1997, Guy ni Penny Pierce yaapacerya orumeela mu emusi ya Peteli ya Estados Unidos. Munna Pierce aalapa mu Etepartamentu ya Muteko, nave mu 1998 aavekiwa ntoko mukhaviheryi a Nikhuuru Naachu a Nikhuuru Noolamulela. Othanliwa wa munna Pierce ntoko a Nikhuuru Noolamulela waalokohiwe 2 a Otupuru a 1999, o muthukumano wa eyaakha wa Watch Tower Bible and Tract Society of Pennsylvania. Mu iyaakha sa hiihaanoru, owo aalapa ni nikhuuru na Orepa, Olaleerya, ni na Ahooleli.
Achu a makhalelo oohiyanahiyana yaanawerya waataana ni Munna Pierce nthowa na mukhalelo awe wootheya ni ohakalala. Nyenya, mikhalelo seeriha wi okhale wookhweya waataana ni akina saari osivela wawe, wiiyeviha wawe, ocicimiha wawe malamulo ni malakiheryo eekhaikhai, ni nroromelo nawe nawaakhwanela wa Yehova. Wa Guy Pierce, waari wooweryeya nsuwa ohikhuma ohiya oheereya wa soolaiherya sa Yehova, nave aanachuna okawana eparipari yeeyo ni elapo yoothene.
Munna Pierce haakoma omurumeela Yehova, annalapa opacerya wooxixelo ophiyerya ohiyu. Aaheeceeca elapo yoothene aalipihaka anna ni arokora Eekiristu, nave anniivaha elukuluku wa muchu ti muchu a emusi ya Peteli ni akina yaawo yaavya onthamwene, ikano, ni nikhaviheryo nawe. Naamwi ivinre iyaakha, anna nlelo annuupuwela ovaha, onthamwene, ni olipiha wawe wa mu Soorempwa.
Munna ni nthamwene ahu ola aakhalano mwaariye ni anamwane athanu nammoha, vamoha ni asulwaawe. Owo aakhalano tho anamwane oomunepani oohaalakhanyeya. Mwaha wa wuupuxerya Munna Pierce waaperekhiwe o Peteli ya Brooklyn, Nawoorowa, 22 a Marsu a 2014, ni Mark Sanderson, mmoha a Nikhuuru Noolamulela. Ophitaanyerya ichu ikina, owo aaloca sa ewehereryo yawirimu ya Munna Pierce nave aahaalakhanya masu a Yesu: “M’pa mwa Atithaka murimo nipuro nokhala’mo anchipale. . . . Nave karowa woryeheryelani nyuwo nipuro, kinakoka tho, nave kinarwa-kiwakhelani nyuwo wa Miyo mekhaka; wi wiwo kiriaka wo Miyo iwo, mwakhale nyuwo tho. Nave wiwo kiniya kawo Miyo, munnasuwela ephiro aya.”—Yohane 14:2-4.
Eparipari, nnahaala okhala ni munkhela wa Munna Pierce. Nnya, ninnahakalala ntakhara owo ‘aanasuwela ephiro’ ya ‘empa’ yawiikhalelaru.