MWAHA WA EKAAPA | MAKUCHUWELO AHAACAMELA?

Ancipale Anahaala Ovuluwa Omakuchuwelo Nyuwaano Tho

Piipiliya onnanleela wi makuchuwelo anaphitaanyerya otoloxa: “Vanarwa-vakhala sohoshasha, ntoko hevakhanle sawihihá, opacherya elapo yápachenryaya, ophiyerya hihano. . . . Nave yaháhiyaleke okhuvihiwa mahiku ala, hakávulushiwe mutchu mmoha.” (Mateyu 24:21, 22) Nyenya Muluku onnanroromeliha wi achu ancipale anahaala ovuluwa: “Nave elapo ya vathi ennavira . . . nyenya yowo onerano okhwela wa Muluku onnikhalelaru okhala wokhala.”​—1 Yohane 2:17.

Wakhala wi munnachuna ovuluwa vaavaa elapo ela enaviraaya ni wiikhalelaru “okhala wokhala,” tiheeni munaphwanelaanyu weera? Apwanne munaphwanela opacerya othukumanya yoolya naari opaka marehereryo makina oomwiilini? Hooye. Piipiliya onnanceenyerya otikitherya soolakelela soohiyana. Ninnaalakhanya: “Sothe sene iha nto siniriaya sirwe-sukuluwe mwawihihá, nyuwo munaphwanela okhala atchu awihai nki, m’makhalelo awéla ni m’mathamalelo, muweheryeryaka ni wakuvela orwa waya wa nihiku na Muluku.” (2 Petro 3:10-12) Masu makina annooniherya wi “Sothe sene iha” inahaala wuukunuwa inaphitaanyerya olamulelo wa elapo ela yoonanara ni oothene yaale anathanla olamulelo yoowo ohiya olamulelo wa Muluku. Chiryene, wakhala wi nohiithukumanyerya ichu soomwiilini, hinivuluxa mu otoloxa iwo.

Ahe, ovuluwa wahu onahaala orweela wa omwiiwelela Yehova Muluku ni ohuserya meecelo ni miteko inamuhakalaliha. (Sofoniya 2:3) Ohiya waachariha achu ancipale olelo ni ohithokororya ineneeryo sawii nnakhala mu elukuluku yookuchula, nnaphwanela ohela mmuupuweloni ophiya wa nihiku na Yehova. Anamoona a Yehova anahaala owooniheryaani Mpiipiliyani mukhalelo wa ovuluwa mu nihiku nlo nnoorwa.