Makuchuwelo Ahaacamela? — EPIIPILIYOTEKA ya Watchtower

MWAHA WA EKAAPA | MAKUCHUWELO AHAACAMELA?

Makuchuwelo Ahaacamela?

Apwanne Muluku onahaala otitelela weemererya wi achu ehooxaneke ni onanariha omwaahiyu wa achu? Hooye, ntoko noonnaahu, owo onahaala weeravo echu ni omaliha ohooxa. Mpatuxa aachu ni a elapo yavathi onachuna wi musuwele wi elukuluku awe yohaacamela. Onuupulula hai nsuweliho nenla noochuneya?

Muthokororye niphwanaphwaniho nla: Mwaanyiherye wi munapaka mukwaha. Nyuwaano akhweya munapacerya ovarerya mukhalelo wa nihiku. Vaavaa munoonaanyu ineneeryo sa muramphani ilocaka sa nipuro munayaanyuwo, nyuwaano munnaroromela wi muhanle vakhaani ophiya. Moolikana, Muluku oonivaha Masu awe yaawo anathariha saweereya sa elapo. Vaavaa nnoonaahu ineneeryo seiyo, ninnaroromela wi nnakhala mweelukuluku yeeyo enakeriha omakuchuwelo.

Piipiliya onnathariha elukuluku ya saweereya sa mweelaponi seiyo saahaala ohoolela omakuchuwelo. Elukuluku yeeyo saahaala okhalavo saweereya sincipale soohiyana ni echu ekina mmwaha wa achu. Muthokororye ineneeryo iromoliwe mu Masu a Muluku.

1. OWANAWANA VEELAPONI YOOTHENE Yooloherya enaphwanyeya mu Mateyu ecima 24 ennaromola saweereya veelaponi ya vathi seiyo sinapaka makupa a eneneeryo. Eneneeryo eyo yaahaala wooniherya “makutchuwelo a mahiku a vathi vano” ni okeriha mweelukuluku ya ‘ophiya makutchuwelo.’ (Iciciri 3, 14) Ineneeryo iho inaphitaanyerya ikhoco itokweene, etala, mwaacikinye mmapuro oohiyanahiyana, waaceereryeya wa ohiiwelela, orama wa osivela, ni owetha wa ahooleli a malapelo waahuweliha achu. (Iciciri 6-26) Saweereya seiya sinnooneya opacerya khalai. Nyenya, vaavaa makuchuwelo anaacamelaaya, iho sineereya mweelukuluku emoharu yookacamiha. Saweereya iho inaphitaanyerya tho ineneeryo raru inacharela.

2. MEECELO AACHU Piipiliya onnaloca wi “m’mahiku ókutchula,” achu yaahaala okhalano meecelo oonanara. Ninnaalakhanya: “Ntakhara atchu enarwa-ekhala awisivela mkhataya, ósivela icharama, awithamala, awirumiha, ópwalu, óhiwiwelela yawo yáyanre, óhithamala, óhéla murima, óhikhalano osivela wophachuwano, óhátányiheya, ósasa, óhiwerya wíhíha, óshimwa, óhásivela aphama, amakhuche, ókakamela, awúra, awirumiha murima, ósivela hiho sinatheiha mutchu, óhikhala ómusivela Muluku.” (2 Timoteo 3:1-4) Mweeparipari, ohaacicimiha achu tahi echu evyaani, nyenya “m’mahiku ókutchula” ohicicimiha onamwaaceereryeya ophiyerya wi iha chiryene “ilukuluku sohósha.” Nyuwaano munnoona onanara wa meecelo aachu?

3. OPAHULIWA WA ELAPO Piipiliya onnaloca wi Muluku onahaala “wapahula yawo enapahula elapo.” (Yawupulula 11:18) Mmukhalelo taani achu anapahulaaya elapo? Elukuluku ya Noowa yaalociwa mmukhalelo woolikana: “Atxhu a elapo yavathi yàri ònanara murima, nave yawo yàsareya owali. Muluku àwona atxhu yàkusa mphiro wonanara.” Mwawiihiiha Muluku aaloca sa nloko nenle noonanara: “Kihupuwela wàtoloxa atxhu othene!” (Maphatxuwelo 6:11-13, BNM) Nyuwaano munnoona wi elapo yavathi yoosareya nlala? Mwawaacererya, achu annapahula elapo yavathi moorweela wa otoloxa ikumi inaphwanyeya mweelaponi. Awo aakhalano ikaruma sa otoloxa mmatani mwaya. Elapo tho ennapahuliwa mmukhalelo mukina. Marehereryo a echaya yaawo anakhaviherya okumi—ntoko nwiya nnamumulaahu, miri, axinama ni iniya—sinnapahuliwa nthowa na achu ohipharihela phaama.

Mwiikohe: ‘Mu nsana nivirale, apwanne achu yaanakhaviherya opahuwa ola?’ Nyenya vano achu annapahula moorweela wa opaka ikaruma itokweene sa otoloxa ni moorweela wa onanariha nwiya. Oya vahoolo wa ikhankoonya honaakhaviherya achu osuwela naari okukuca sookhumelela sene. Nyenya omwaahiyu wa elapo yavathi hori mmatani mwa muchu. Muluku onahaala weeravo echu mwawaakuveya wi aatoloxe yaale anapahula elapo. Ti yeeyo onaroromeliheiye!

4. MUTEKO WA OLALEERYA ELAPO YOOTHENE Makupa makina a eneneeryo ya makuchuwelo yaaloherya wi waahaala weeriwano muteko mutokweene wa olaleerya: “Mitchaka eyo ya Omwene enarwa-elaleyeryiwa velaponi yothene ya vathi vano, ekhale namona wa atchu a maloko othene; nave vavo enarwa-ephiya makutchuwelo.” (Mateyu 24:14) Muteko yoola wa olaleerya waahaala ohiyana ni yoowo weeriwano ni malapelo makina mu iyaakha sincipale. Mmahiku ookuchula, yaahaala olaleeryiwa “mitchaka eyo ya Omwene.” Nyuwaano moosuwela nikhuuru nenlo nnavuwiha michaka yeela? Naamwi akina elaleeryaka michaka yeela, apwanne awo pahiru ta vanipuroni, naari wi annalaleerya michaka seiya saphaama ‘velaponi yothene ya vathi vano, evahaka namona wa atchu a maloko othene’?

Site www.jw.org onnavuwiha “mitchaka eyo ya Omwene.” Site ola ookhalano soolaleeryiwa sinathariha michaka opwaha ilocelo 700. Apwanne aakhalavo marehereryo makina yaawo anavuwiha michaka yaphaama ya Omwene mweelapo yoothene? Ahaakumve okhalavo interneti, Anamoona a Yehova yaasuweliwa nthowa na wiilipixerya waya olaleerya michaka yaphaama ya Omwene wa Muluku. Opacerya 1939, ekaapa ya Mulipeleli ennakhalano masu awi “Alaleyaka Omwene wa Yehova.” Liivuru yoowo onaloca sa malapelo aathariha wi muteko wa olaleerya wa Anamoona a Yehova “ti wavameekhaaya mu waakuveya ni omwaramwaxeya waya.” Olaleerya iwo onnavuwiha michaka yaphaama ya wi moohilekela “enarwa-ephiya makutchuwelo” moorweela wa Omwene wa Muluku.

ELUKULUKU YAVAMEEKHAAYA MMWAHA WA ACHU

Nyuwaano mohoona wi ineneeryo xexe sa Piipiliya seiyo ithokororyiwe mmiyaha ivirale sinnooneya mweelukuluku anyu? Opwaha iyaakha nsana, erevista ela ennaaleela alipa a waalakhanya saweereya sa elapo yaakhaviheryaka osuwela wi makuchuwelo ahaacamela. Alipa oovaanya haneemererya, elocaka wi saweereya ni miyaha hisaano yootaphulela. Awo tho anneemererya wi ovinyerya vaavaa elapo epacenryaaya oya vahoolo, mukhalelo wa elapo onamvira onanaraka. Naamwi hiiha, sookhalavo sawooniherya sincipale wi nnakhala mu elukuluku yookuchula.

Alipa oohuserya annoona wi makuchuwelo a elapo ya vathi ari vakhiviru. Ntoko yootakiherya, mu 2014, the Science and Security Board of the Bulletin of the Atomic Scientists aalopola Nikhuuru na Waakiha na Maloko Awiiwanana vooloca sa yawoopopiha okumi wa achu. Alipa oohuserya awo yaaloca: “Waalikhela mwawiiseela ennakhaviherya osuwela wi sawoopiha iho ti itokweene.” Achu ancipale ari oolekecheya wi nnakhala mweelukuluku yavameekhaaya mmwaha wa achu. Anamarepa a erevista ela ni ale awaalakhanya haano minikwa wi nnakhala mmahiku ookuchula nave wi makuchuwelo ari vakhiviru. Opwaha woova omwaahiyu, munaphwanela ohakalalela. Ntakhara heeni? Ntakhara munanwerya ovuluwa yaphiya makuchuwelo!

[Ekaaxa va epaaxina 7]

APWANNE ALIPA MIRIRIMU A MAHIKU OOKUCHULA?

Anamoona a Yehova tahi alipa miririmu a mahiku ookuchula. Awo analaleya michaka yaphaama ya omwaahiyu opwaha iyaakha nsana. Ntoko yootakiherya, mwaha wa muthukumano aya mutokweene wa 1958 yoowo waarino muru “Omwene wa Muluku Onnalamula—Okuchuwa wa Elapo Wohaacamela?” waathariha wi “Omwene wa Muluku honarweela otoloxa elapo yavathi, nyenya otoloxa elapo ya Satana. Omwene wa Muluku honarweela weeyela elapo ela, nyenya otikitherya yookhwela ya Muluku veelaponi ya vathi hiiha ntoko wirimu. Elapo ennaphwanela okhapeleliwa ntoko yoopatuxa ya Muluku; nave Muluku onahaala okhapelela okhala wookhala.”