Mukhale Oororomeleya Ntakhara Omwene wa Muluku

“Hari a elapo ya vathi.”​—Yoh. 17:16.

Macipo: 63, 129

MUNANWERYA WAAKHULA?

Ntakhara heeni Yesu haapaka makupa mmiyaha sa elapo?

Mmikhalelo taani Akiristu anaphwanelaaya ohipaka makupa?

Munii mwiireherye hai wi mukhale oororomeleya wa Yehova ni Omwene Awe?

1, 2. (a) Ntakhara heeni okhala oororomeleya wa Muluku ti wookhweleyaxa wa Akiristu, nave eyo eniiwanana hai ni ohipaka makupa a elapo? (Moone eruku yoopacerya.) (b) Achu anakhala oororomela wa ichu taani, nave ni yookhumelela taani?

OROROMELEYA ni ohipaka makupa a elapo miyaha sookhweleyaxa wa Akiristu eeparipari ohiya pahiru mu ilukuluku sa ekhoco. Ntakhara heeni? Ntakhara oothene yaale ivelenle wa Yehova, aapaka nlakano na omusivela, okhala oororomeleya wa yene, ni omwiiwelela. (1 Yoh. 5:3) Nnachuna okhala mwawiiwanana ni malakiheryo eekhaikhai a Muluku moohipwacha nipuro nnakhalaahuwo, sookhovelela sahu, ni elapo ahu. Ororomeleya wahu wa Yehova echu yookhweleyaxa opwaha echu ekina. (Mat. 6:33) Nthowa na ororomeleya wahu, ninnakhala ootaphuwa mu owanawana wa elapo yeela.​—Yes. 2:4; mwaalakhanye Yohane 17:11, 15, 16.

² Achu ancipale annasivela elapo, nihimo ni sookhovelela saya, naari tho nikhuuru na mapokha. Eyo ennakumiherya wiirumiha ni owanawana; ophiyerya wiiphana. Mukhalelo achu anapharihelaaya ichu seiyo inanwerya onivolowela hiyo ni amusi ahu, mwaphaama naari moonanara. Hinnawerya ochawa osivela yoowo woona wi nnakhala veelaponi vaava. Woona wi Muluku ompatunxe muchu ni mukhalelo wa weerano ekhaikhai, soolakelela sa alamuleli inanwerya ovolowela mukhalelo ahu waphaama. (Map. 1:27; Malam. 32:4) Mmikhalelo seiya tiheeni nneeraahu? Waahaala okhala wookhweya ovolowela miyaha seelapo ni owanawana waya.

3, 4. (a) Ntakhara heeni Akiristu hanapaka makupa mu owanawana wa elapo? (b) Tiheeni mwaha ola onahaalaaya othokororya?

³ Vaavaa onakhalaaya owanawana, marehereryo a olamulelo wa achu annaakhinyererya achu opaka makupa mmiyaha sa elapo. Akiristu eeparipari haneerano eyo. Hannapaka makupa mu owanawana wa elapo; naari mano hannawana ekhoco. (Mat. 26:52) Elapo ya Satana enneererya onikhinyererya wuupuwela wi makupa makina eelapo taphaama opwaha makina; nyenya hinnavoloweliwa ni muupuwelo yoowo. (2 Akor. 2:11) Woona wi hannapaka makupa eelapo, niheemererye ovoloweliwa ni owanawana waya.​—Mwaalakhanye Yohane 15:18, 19.

⁴ Nyenya, nthowa na ohiphaameya wahu, akhweya onamukhala woovila wa akina ovootha sookhovelela sahu sakhalai seiyo inahaala otannya okawanyeya. (Yer. 17:9; Aef. 4:22-24) Mwa yeeyo, mwaha ola onahaala othokororya malakiheryo anahaala onikhaviherya mmukhalelo yoowo. Navetho onahaala wooniherya mukhalelo wa ovyakiha muupuwelo ni yawuupuxerya-ya-murima ahu wi nikhale oororomeleya wa Omwene wa Muluku.

NTAKHARA HEENI HANNAPAKA MAKUPA MMIYAHA SA ELAPO

5, 6. Yesu oona hai owanawana waarivo mu elapo aakhaleiyemo, nave ntakhara heeni?

⁵ Elukuluku yoothene muneeraanyu mukhaleno minikwa vooloca sa yeeyo munaphwanelaanyu weera, ti yaphaama wiikoha: ‘Tiheeni Yesu aahaaleiye opaka mu nipuro naka?’ Mu elapo Yesu aakhaleiyemo waakhalamo miceche soohiyana: Yuteya, Kalileya, Samariya ni mikina. Piipiliya onnooniherya wi waakhalavo owanawana variyari va achu yaawo. (Yoh. 4:9) Nave tho waakhalavo owanawana variyari va Afarisi ni Asatuki (Saw. 23:6-9), variyari va achu ni yaale yaaliviha misokho (Mat. 9:11), ni variyari va yaale yaarino mahusiheryo a malamulo ni yaale yahaarino. (Yoh. 7:49) Mu nsana noopacerya, Isarayeli analamuleliwa ni Aroma, nave achu hiyaachuna. Yesu aanaakiha eparipari vooloca sa Muluku nave aasuwela wi ovuluxa onarweela wa Ayuuta, naamwi hiiha hantonko waaceenyerya oohuserya awe okhalano nthalu. (Yoh. 4:22) Moohiyana, aahaaceenyerya omusivela mwaacamani, naari achu oothene.​—Luka 10:27.

⁶ Ntakhara heeni Yesu haakhavihenrye nthalu naari variyari va Ayuuta? Nthowa nawi yene ni Tiithi awe hanavolowela owanawana wa elapo. Vaavaa Yehova ni Mwanawe, yaampatunxaaya mulopwana ni muthiyana, yookhwela aya yaari wi esaryeihe elapo yoothene. (Map. 1:27, 28) Muluku aapatunxe achu wi ekhumelele mahimo oohiyana. Yehova ni Yesu hanoona nihimo, elapo naari elocelo ekina okhala sa vasulu opwaha sikina. (Saw. 10:34, 35; Yaw. 7:9, 13, 14) Nnaphwanela ochariha yootakiherya aya yaphaama.​—Mat. 5:43-48.

7, 8. (a) Owanawana taani Akiristu anaphwanelaaya wiivoliiherya? (b) Tiheeni Akiristu anaphwanelaaya osuwela vooloca sa makacamiho aachu?

⁷ Nyenya wookhalavo owanawana nnaphwanelaahu wiivoliiherya: okhaviherya olamulelo wa Yehova. Owanawana iwo opacenrye o Eeteni vaavaa Satana aavannyeiye olamulelo wa Yehova. Eyo yaatannya nikoho: ‘Taani onawerya weerano ichu phaama, Yehova naari Satana?’ Ovinyerya vaavaa, achu anaphwanela olakelela taani anachunaaya omukhaviherya. Munnooniherya wi muri mmakupa a Yehova vaavaa muniiwelelanyu malamulo ni malakiheryo awe, opwaha opaka ichu mmoonelo anyu? Apwanne munnoona Omwene okhala echu yeeyo enahaala omaliha makacamiho aachu? Naari munoona wi achu annawerya wiilamulela mekhaaya?​—Map. 3:4, 5.

⁸ Maakhulo a makoho yaala annooniherya yeeyo munahaalaanyu weera wakhala wi moovekiwa ovaha moonelo anyu vooloca sa owanawana. Alamuleli ni akhaviheryi aya ovinyerya khalai anneererya omaliha miyaha inatannya okawanyeya. Akina a yaawo annachuna weera yaphaama. Nyenya Akiristu aasuwela wi pahiru Omwene wa Muluku tonahaala omaliha makacamiho aachu ni ovahererya makhalelo aphaama. Nnaphwanela ohiya miyaha mmatani mwa Yehova. Chiryene, waakhanle wi Mukiristu ori oothene onnavuwiha mukhalelo onooneiye okhala waphaama, hamuneemererya wi eyo yahaala otannya okawanyeya mmilokoni?

9. Nikacamiho taani naari mmuloko wa Korinto, nyenya ekano taani Paulo aavanheiye?

⁹ Muthokororye yeeyo Akiristu a nsana noopacerya yenraaya vaavaa naakhumelenlaaya nikacamiho nenlo noopopinhe wiiwanana wa muloko. Achu o Korinto yaanaloca wi: “Miyo ka a Paulo; nyenya miyo ka a Apolo; nyenya miyo ka a Kefa; nyenya miyo ka a Kristu.” Moohipwacha nthowa nene, murummwa Paulo aahuukhuwa ni sookhumelela saya. Waakhala ntoko “Kristu [aari] ókawaneya.” Muupuwelo owo woonanara waahaala omalihiwa hai? Paulo aahaalopola Akiristu: “Nyenya kinnochényeryani nyuwo, anna, mu nsina na Apwiyahu Yesu Kristu, wi muloche emohamoha nyuwo othene, ni wi vahikhale ovuhana véri va nyuwo; nyenya m’makeleleye m’murimani yowo ni múthoriherya wiwo.” Olelo honaphwanela okhalavo okawanyeya mmulokoni.​—1 Akor. 1:10-13; mwaalakhanye Aroma 16:17, 18.

10. Wi ooniherye wi Akiristu hanaphwanela ovolowela owanawana wa elapo, olikanyiha taani Paulo aapankeiye?

¹⁰ Paulo aahaaceenyerya Akiristu awoocihiwa wiikhalela mu ewehereryo aya ya wirimu, ohiya mu ichu sa veelaponi yavathi. (Afil. 3:17-20)a Awo yaaphwanela orumeela ntoko arummwa, emuraceelaka Kiristu. Murummwa hanavolowela miyaha sa elapo onakhaleiyevo. Owo onakhaviherya nloko nawe. (2 Akor. 5:20) Akiristu arino ewehereryo ya veelaponi yavathi awo tho ari anamurala a Omwene wa Muluku; mwawiihiiha, hiyaahaala okhala yoophwanelela ovolowela owanawana wa elapo.

MWIIREHERYE WI MUKHALE OOROROMELEYA WA YEHOVA

11, 12. (a) Mmikhalelo taani onahaalaaya okhala woovila ororomeleya ntakhara Omwene wa Muluku? (b) Nikacamiho taani murokora mmoha aakumanneiyeno, nave aavonthe hai?

¹¹ Mu ilapo sincipale, achu annaataana nthowa na okhalano moonelo mmoha vooloca sa miyaha, sookhovelela ni elocelo​—ichu seiyo inaweeriha wiirumiha. Mmukhalelo yoowo, Akiristu anaphwanela ovyakiha muupuwelo ni yawuupuxerya-ya-murima wi yeereno ichu moophwanelela. Enii yeereno hai?

¹² Moone yaweereya ya Mirxeta,b oyariwe mu muceche wa Yukoslavia akhalai. Ovinyerya onamwane, aahusihiwa owiica achu a Serviya. Amanle ohuserya wi Yehova haano nthalu nave wi Satana tonatannya nthalu, owo aapacerya wiilipixerya wi amaliha muupuwelo awe. Nyenya vaavaa yaapacenryaaya makacamiho mu muceche awe aapacerya tho okhalano muupuwelo wakhalai. Mu nthowa na yeeyo, Mirxeta aanoona okhala woovila waalaleerya achu a Serviya. Voocharela, aahuupuwela wi haaphwanela omaala awehereryaka wi moonelo owo woonanara omale. Aavekela wa Yehova avekaka nikhaviheryo wi amalihe nikacamiho nno, nave tho aahaaceererya orummwa awe ntoko piyoneero. Owo aaloca: “Kohoona wi wiivoliiherya mu orummwa nikhaviheryo naphaama. Mu orummwa, kinneererya otakiherya osivela wa Yehova. Vakhaani vakhaani, kohoona wi muupuwelo aka woonanara woomala.”

13. (a) Nikacamiho taani naamweerinhe murokora osokonyeryeya, nave aamalinhe hai? (b) Tiheeni nnahuseryaahu orweela wa yootakiherya ya Soila?

¹³ Moone yootakiherya ekina. Soila, yoowo oyariwe o Mexiko, onapaka makupa a muloko wa Europa. Aahoona wi anna yaarweela o Amerika Latina yaananyemula elapo awe, mihapo ni macipo awe. Tiheeni mwaahaalaanyu weera mu nipuro nawe? Eyo yaamusokonyerya Soila. Nyenya aahaavya nikhaviheryo na Yehova wi awerye omaliha muupuwelo woothene woonanara waahaala wunnuwa mmurimani mwawe. Nnaphwanela osuwela wi akina annahooxeya ni makacamiho oolikana. Hannaphwanela oloca echu yeeyo yaahaala otannya okawanyeya naari oceenyerya mukhalelo woonanara variyari va annihu ni achu akina.​—Aro. 14:19; 2 Akor. 6:3.

14. Akiristu enii evyakihe hai muupuwelo ni yawuupuxerya-ya-murima vooloca sa miyaha sa ororomeleya?

¹⁴ Apwanne nipuro munnunwaanyuwo ninnaweerihaani osivela elapo naari muceche? Apwanne mookhalano muupuwelo yoowo mmurimani mwanyu? Akiristu hanaphwanela weemererya wi osivela elapo aya ovolowele moonelo aya vooloca sa akina. Hanka wakhala wi munnawoona mmukhalelo woonanara achu a elapo ekina, nihimo ni elocelo? Mmukhalelo yoowo waahaala okhala phaama wuupuwelela moonelo wa Yehova vooloca sa yeeyo. Akhweya waahaala okhala phaama otholathola, miyaha seiya ni mikina mu yoohuserya anyu naari mu malapelo a echoko. Voocharela mumveke Yehova wi ookhaviheryeeni weemererya moonelo awe mmwaha yoowo.​—Mwaalakhanye Aroma 12:2.

15, 16. (a) Achu enii yaakhulele hai ororomeleya wahu wa Muluku? (b) Asitiithi enii yaakhaviherye hai anamwane aya ovootha yaweeha?

¹⁵ Mu ilukuluku ikina, akapuro oothene a Yehova annakumanano nikacamiho nneeriha wi yawuupuxerya-ya-murima aya eweerihe weerano moohiyana ni achu akina​—omutekoni, oxikola, ni amwaacamani, veemusini naari nipuro nikina. (1 Pet. 2:19) Chiryene nnaphwanela okhala oohiyana! Nihihaleeliheye wakhala wi elapo ennaniica; Yesu aaloca wi eyo yaahaala weereya. Amwiicani ahu ancipale hanasuwela yeeyo enavolowela ohipaka wahu makupa. Wa hiyaano, owo mwaha wookhweleyaxa.

¹⁶ Ororomeleya wa Yehova onataphulela okhala oothipeleya variyari va woopopiha. (Tan. 3:16-18) Owoova achu onnaavolowela achu a mukhalelo woothene, nyenya amiravo annoona okhala woovila ovootha nikacamiho nenla. Wakhala wi anamwane anyu annakumanano nikacamiho ntoko ocicimiha nipantera naari ochapela mahiku eelapo, muhimaale waahoolela. Mpharihele Malapelo Eechoko wi mwaakhaviherye wiiwexexa ntakhara heeni ahinaphwanelaaya weerano wi ewerye ovootha moolipa murima. Mwaakhaviherye oloca yeeyo anaroromelaaya mu ncicimiho. (Aro. 1:16) Mwaariki mwaakhaviherye anamwane anyu, mpacerye oloca ni ahusiha aya vooloca sa seiyo.

MUCICIMIHE SOOPATUXIWA SOOTHENE SA YEHOVA

17. Muupuwelo taani nihinaphwanelaahu okhalano, nave ntakhara heeni?

¹⁷ Ikwaha sincipale ninnasiveliwa ni oreera wa elapo, sookhovelela, elocelo ni soolya sa weiwo niyariwaahuwo. Nyenya nsepe muupuwelo wawi yoothene eri yaahu teri yaphaama. Ninnoona ohiyana variyari va ichu soothene Yehova opatunxeiye, nave eenreno yeeyo wi inihakalaliheke. (Sal. 104:24; Yaw. 4:11) Ntakhara heeni otitelela oloca wi mukhalelo mmoha wa weerano ichu ti waphaamaxa opwaha mukina?

18. Mareeliho taani nnaakhelaahu moorweela wa okhalano moonelo wa Yehova?

¹⁸ Muluku onachuna wi achu a mukhalelo woothene ekhaleno nsuweliho neeparipari wi ephwanye okumi woohimala. (Yoh. 3:16; 1 Tim. 2:3, 4) Okhalano muupuwelo woohuleya wi aakhalavo makhalelo oohiyana a wuupuwela ni a weera yaawo ari aweemereryeya, ennanikhaviherya nave ennakhapelela wiiwanana wahu Weekiristu. Vaavaa nnakhapelelaahu ororomeleya wahu wa Yehova, hinnaphwanela ovolowela owanawana wa elapo. Hannaphwanela okhaviherya elapo. Ninnamuthamalela Yehova onooponle mu munepa wa wiirumiha wa elapo ya Satana yoowo onatannya okawanyeya. Hankooni ntitelele wunnuwiha moonelo wa murecele onalikana ni wa namarepa a salmo: “Onani, ti worera ni wohakalaliha tchiri; Wi anna ekhaleke vamoha!”​—Sal. 133:1.

[Masu a vathi]