MWAHA WA EKAAPA | OVINYA MOOKHWANI TI WOOWERYEYA?
Tiheeni Eneereya Nakhwa?
“Kuupuwela wi aakhalawo mapuro mararu muchu onayeiyewo amala okhwa: parataiso, omooroni, naari woothorihiwa. Kaasuwela wi nkaari oophwanelela oya o parataiso naari oya o mooro. Nkaasuwela phaama vooloca sa othorihiwa. Nkaatonko woona eyo Mpiipiliyani. Eyo yaari echu yaalociwa.”—Lionel.
“Kaahusihiwe wi achu oothene yakhwa anaya wirimu, nyenya nkaalekechen’ye ni yeeyo. Kuupuwela wi okhwa makuchuwelo a soothene—wi hiyaavovo ewehereryo wa alipa okhwa.”—Fernanto.
Montoko ochuna osuwela: ‘Tiheeni eneereya nakhwa? Apwanne oosiveliwa ahu akhwile annahooxeya mmukhalelo mukina? Nnahaala owoona wanaawiili? Nnii nsuwele hai?’ Khwoo muthokororye yeeyo Piipiliya onahusiheiye. Woopaceryani, hankooni naalikhele yeeyo Piipiliya onaloceiye sa okhwa. Voocharela nnahaala othokororya ewehereryo Masu a Muluku anavahaaya.
Tuuvi okhanle mukhalelo wa alipa okhwa?
NAAKHULO NA PIIPILIYA: “Akumi annasuwela wi anamukhwa. Nto akhwile hanasuwelaru etxhu, hanakhela ntxhuwelo nimoha mano, ntakhara àtxuwaliwa t’atxhu othene. Sothene onerawe wereke ni mata à, olipiseryeke wera phama, ntakhara mmahiyeni honeriwamo etxhu nave mwemmo hiwamo wupuwela, osuwela ni miruku. Nave ti mwemmo onayàwemo.”a—Eklesiyaste 9:5, 10, BNM.
Mmahiyeni, nipuro nenlo achu anayaayawo vaavaa anakhwaaya; nlo nipuro noosiphela naari mukhalelo yoowo muchu ohinasuweleiye echu naari ophara muteko. Mulopwana oororomeleya Yupu oona hai Mahiye? Yupu aahiyeleela muhakhu awe woothene ophitaanyerya anamwane awe mu nihiku nimoharu pahi, nave aahooxeya tho ni ereca etokweene mwiili awe woothene. Owo aavekela wa Muluku: “Pwiya, kinatxhuna wi mukivithe mmahiyeni.” (Yobi 1:13-19; 2:7; 14:13, BNM) Mwawiihiiha Yupu heemererya wi Mahiye naari nlici, nipuro nenlo aahaaleiye ohooxeya vancipale. Opwaha yeeyo uupuwela wi naari nipuro eereiye ahihooxeyeke.
Wookhalavo mukhalelo mukina wa ohuserya mukhalelo wa alipa ookhwa. Nnaphwanela waalikhela saweereya inaphwanyeya mu Soorempwa vooloca sa achu athanu nararu yaakookenle okhala akumi emanle okhwa.—Moone ekaaxa “Ovinya Mookhwani wa Achu Athanu Nararu Olociwe Mpiipiliya.”
Haavovo mmoha a yaale athanu nararu yaaviihiwe aalonce wi aari mu nipuro naphaama naari akhweya o mooro. Waakhanle wi achu yaala yaaviihiwe yaaya mapuro yaala, apwanne hiyaahaala waaleela achu vooloca sa yeeyo? Apwanne heki erempwe Mpiipiliyani wi achu oothene esuwele? Piipiliya hanaloca yeeyo. Mwawooneya achu yaale athanu nararu hiyaalonce echu. Ntakhara heeni? Ntakhara wi hiyaasuwela echu, yaakhala wi yaari mu ikhove itokweene. Chiryene, mu ilukuluku ikina Piipiliya oopharihela ikhove wi asipele okhwa. Ntoko yootakiherya, alopwana oororomeleya Tavite ni Stefano oopiili “árupa [mookhwani].”—Saweriwa Tarummwa 7:60; 13:36.
Ewehereryo taani erivo wa alipa ookhwa? Apwanne anahaala ovinya mu orupa weiwo?
[Nsu na vathi]
a Mu Bibiliya Nsu na Muluku (BNM), nsu “Mmahiyeni” nnaphariheliwa wi ntaphulele nsu na Eheepri “Seol” ni na Ekriki “Hade.” Apiipiliya akina anapharihela nsu “nlici,” nyenya nsu nawi nipuro na mooro nnaahooxa achu ookhwa hinnarweela mu Piipiliya.
[Ekaaxa va epaaxina 4]
OVINYA MOOKHWANI WA ACHU ATHANU NARARU OLOCIWE MPIIPILIYAb
Mwaana a naamukhwele Mulipa a miririmu Eliya aamviiha mookhwani mwaana mwaamulopwana a naamukhwele yoowo aakhala o Sarepta, omoko wa Isarayeli.—1 Mamwene 17:17-24.
Mmiravo o Sunami Mulipa a miririmu Eliseu yoowo aamuracenle Eliya aamviiha mmiravo o Sunami nave aamukeriha wa asitiithi awe.—2 Mamwene 4:32-37.
Mulopwana mu nihiye Mwiili wa mulopwana waariheliwa mu nihiye nimohamoha yaarimo makhuva a Eliseu. Vaavaa mwiili wa mulopwana ole waakonenlaaya makhuva a Eliseu, owo aakookela okhalano okumi.—2 Mamwene 13:20, 21.
Mwaana a naamukhwele o Nayini Yesu aakwatelela muteko wa ovitha muruchu waacamela o Nayini wi amviihe mookhwani mmiravo ni omveleela wa amannya yaawo yaari oothanana.—Luka 7:11-15.
Mwaana mwaamuthiyana a Xairo Xairo yoowo aari mutokweene a sinakooka, aamveka Yesu wi amukhaviherye mwanawe awiiceliwa. Yesu aamviiha vaavaa aakhwileiye.—Luka 8:41, 42, 49-56.
Lasaro, nthamwene a Yesu Variyari va anamoona ancipale, Yesu aamviiha Lasaro evinre mahiku maxexe ari ookhwa ene.—Yohane 11:38-44.
Torika Murummwa Petro aamviiha naamukhwele ola yoowo aasuweliwe nthowa na mahala awe.—Saweriwa Tarummwa 9:36-42.
Utiko Mmiravo Utiko aakhwa vaavaa aamonreiye va exanela yoosulu; murummwa Paulo aamukookiherya okumi.—Saweriwa Tarummwa 20:7-12.
[Nsu na vathi]
b Ovinya mookhwani woochuneyaxa—oviihiwa wa Yesu Kiristu—ti woohiyana ni oviihiwa wa achu yaala athanu nararu, ntoko enooniheryiwaaya mmwaha onacharela.