YAWEEREYA YA OKUMI

Yehova Ookivaha Opwaha Kinaphwanelelaaka

Elociwe ni Félix Alarcón

Kaarino iyaakha 17 sa oyariwa nave kaakhalano soochuna ni minkhela ntoko amiravo akina. Kaanasiveliwa othata, weekha ni omvonya mphirya ni asinthamwene aka. Nyenya mu nihiku nimoha okumi aka waatorokeya vancipale. Kaathoowa kipakaka mapokha ni moota, eyo yaakeeriha ohooxeya opacerya muxikoni ophiyerya vathi. Eyo yeeren’ye iyaakha 30 muculi, nave kinakhala mu empa enakhapeleliwamo areca ophiyerya olelo.

Kinnunwe mu epooma ya Alikante omoko wa Espanya. Emusi aka yaari yoohiiwanana, mwawiihiiha ntoko mmiravo kaanamaliha elukuluku yincipale mmakhwaalani. Waacamela owaani naakhalavo nipuro na oreherya ikaaro. Weiwo kaakhala nthamwene a José María, yoowo aari namalapa. Aari mulopwana aphaama yoowo aakithokororya. Mweelukuluku ya makacamiho, yene aari ntoko munna aka​—nthamwene eeparipari naamwi aarino iyaakha 20 okipwaha miyaano.

José María aanamuhuserya Piipiliya ni Anamoona a Yehova. Owo aanasiveliwa ni Soorepa, nave wiiliwiili aanakileela iparipari sa Mpiipiliya. Kaanawiriyana mwa ncicimiho, nyenya nkaapwacha yeeyo aaloceiye. Murima aka wa omiravo waari wawuukhuwa ni ichu ikina. Nyenya eyo yaatorokeya moohilekela.

YAWEEREYA ETORONKE OKUMI AKA

Nkinasiveliwa oloca sa othoowa waka mu ramphani. Echu kinachunaaka oloca ti yawi waari olosowa. Mu nihiku nimoharu okumi aka waatorokeya moomalela. Kaari mmiravo oosareya ikuru, nyenya moohilekela nkaawerya weera echu nave kaakhala o nipuro na alipa eekumi. Waari woovila weemererya mukhalelo aka. Kaaniikoha, ‘Apwanne okumi wookhalano mphurelo aya?’

José María aarwa akixekurya, nave mwawaakuveya aapaka marehereryo wi Anamoona a Yehova a muceche ekixekuryeke o nipuro na alipa eekumi. Oxekurya iwo waatannya murima aka. Vaavaa kaapacenryaaka wookosera, kaapacerya omuhuserya Piipiliya. Kaasuwela ntakhara heeni achu annahooxeya ni okhwa nave ntakhara heeni Muluku onneemererya ichu soonanara. Kaahuserya tho yoororomeliha ya Muluku ya omwaahiyu​—Vaavaa elapo yoothene eneeraaya esareye ni achu oophaameya ni mwemmo ohinahaala okhalemo muchu onii “ikhupanyeryeke wa nthowa na witxeliwa.” (Isaiya 33:24, BNM) Kaapacerya okhalano ewehereryo yaphaama mu okumi aka.

Vaavaa kaakhumalaaka o nipuro na alipa eekumi, kaayano vahoolo omuhuserya Piipiliya. Kaanaya mmithukumano sa Anamoona a Yehova ni olaleerya kipharihelaka ekatera ya maroota. Mu 5 a Novempuru a 1988, kaapatisiwa, kirino iyaakha 20. Yehova Muluku onnakikhaviherya okhalano moonelo waphaama. Nave tiheeni kaahaalaaka weera wi kooniherye othamalela?

OYA VAHOOLO MOOHIPWACHA MAKACAMIHO AKA

Kaalakelela oheemererya wi mukhalelo aka okihiihe ophara muteko wa Yehova. Kaanachuna oya vahoolo. (1 Timoteo 4:15) Woopaceryani eyo hiyaari yookhweya, woona wi emusi aka yaanaakaaha nroromelo naka. Nyenya kaakhalano asinthamwene a mu nroromelo yaawo yaari anna ni arokora aka oomunepani. Awo yaanakikhaviherya wi kihiyeleele mithukumano nave wi kipake makupa mmuteko wa olaleerya.

Moovira wa elukuluku, kaahoona wi kaanachuna othokororyiwa elukuluku yoothene. Kimanle otholathola, kaaphwanya nipuro noophwanelela wa achu oorakala o epooma ya Valensiya, mastatiya 160 orakamela o Alikante. Nipuro nlo tekhanle empa aka.

Naamwi kikhalaka mu empa enakhapeleliwamo areca koolakelela otitelela omurumeela Yehova. Kipharihelaka soolivela wa achu oorakala, koomuthuma komputatore nave onakhala waacamela munli aka. Koomuthuma tho telefone. Vano, mahiku oothene mukhaviheryi onnamuhula komputatore ni telefone. Kookhalano ekhankoonya enakhala vapwetoni enakikhaviherya ompharihela komputatore. Kookhalano tho ekopo enakhala vayanoni vaka. Ekopo eyo ennakikhaviherya orepa michaka ni waavya manturu mu telefone aka.

Ikaruma seiya inakikhaviherya hai? Ennakikhaviherya ompharihela jw.org ni BIBLIOTECA ONLINE. Chiryene ikaruma iha sinnakikhaviherya! Kinnamaliha elukuluku yincipale kihuseryaka ni kaalikhelaka soolaleeryiwa soorweela Mpiipiliya wi kisuwele sa Muluku ni mikhalelo sawe sootikhiniha. Nave vaavaa kiniisoonaaka okhala meekhaaka naari oothanana, kinnaphwanya echu mu jw.org yeeyo enakihakalaliha.

Komputatore aka onnakikhaviherya tho owiriyana mithukumano. Kinnawerya ovaha maakhulo, opaka nivekelo, oloca mwaha ophitaanyerya omwaalakhanya Mulipeleli vaavaa kinavekiwaaka weerano yeeyo. Naamwi kihiweryaka okhala mmithukumano seiyo, kinnoona wi kinnapaka makupa a muloko.

Telefone ni komputatore sinnakikhaviherya tho ophara muteko wa olaleerya. Eparipari wi nkinawerya oya empa ni empa ntoko Anamoona a Yehova ancipale aneeraaya. Nyenya eyo henakimaaliha. Kipharihelaka ikhankoonya seiya kinnawerya waaleela akina nroromelo naka. Kinnasiveliwa ovaanela mu telefone ophiyerya wi atokweene a muloko aakivaha murici wa ovareryela mikipici sa olaleerya ni telefone. Mikipici seiya sinnaakhaviherya achu a mmulokoni yaawo ahinawerya ovinya vaate vaya.

Nyenya okumi aka hori pahiru opharihela ikhankoonya. Mahiku oothene, asinthamwene aka annakixekurya. Awo annarwa vamoha ni asuweli aya yaawo anasiveliwa ni Piipiliya. Wiiliwiili, annakiveka wi kihoolele ovaanela miyaha sa Piipiliya ni yaawo. Mu ilukuluku ikina kinnawompwa wi kipake makupa a malapelo eechoko. Kinnasiveliwa vaavaa amiravo anakaacamelaaya ni okileela echu enaweeriha omusivela Yehova.

Kinnasiveliwa oxekuryiwa. Ekwartu aka ennasareya ni asinthamwene a vakhiviru ni oorakamela yaawo anarweela okixekurya. Othokororya yoola onnaatikhiniha akhaviheryi a nipuro nenla. Mahiku oothene kinnamuthamalela Yehova nthowa na okeemererya opaka makupa a onna wa elapo yoothene.

OWANIHA

Vaavaa muchu onakixeliheiye, kinnaakhula kiriki, “Nlelo kinanwaniha!” Koosuwela wi tahi meekhaaka kiri mu owaniha yoola. Moohipwacha mikhalelo sahu, Akiristu oothene ari mu ekhoco—“ekhocho yaphama ya nroromelo.” (1 Timoteo 6:12) Tiheeni enakikhaviherya owaniha mu iyaakha sincipale? Mahiku oothene kinnavekela wa Yehova nave kinnamuthamalela okivaha yoolakelela ya okumi. Nave kinniilipixerya oweiwa mmuteko wa Muluku ntoko kinaweryelaakavo, kitikitheryaka muupuwelo aka mu ewehereryo ya omwaahiyu.

Wiiliwiili kinnuupuwelela elapo evyaani ni yoohakalaliha ya owerya ochimaka ni ocupha wanaawiili. Ikwaha ikina, kinnapaka orocolo ni nthamwene aka José María yoowo onahooxeya ni ereca ya polio​—kilocaka sa ochimaka vamoha mu mapokha. Miyaano kinnamukoha: “Taani onii avoothe?”. Owo onnaakhula: “Hori woochuneya omusuwela taani onahaala ovootha. Echu yoochuneya ori okhala mu Parataiso ni owerya ochimaka.”

Hori wookhweya otitelela ovilela ni makacamiho aka. Koosuwela wi ntoko mmiravo, kaapaka echu moolosowa, nave eyo ennakuukhula vancipale. Naamwi hiiha, kinnathamalela woona wi Yehova hakinyanyanle. Owo onnakivaha ichu sincipale​—emusi etokweene yoomunepani, nchuno na okhalano okumi, ohakalala mu waakhaviherya akina ni ewehereryo yootikhiniha ya omwaahiyu. Wi kiloce moonelo aka mmasu vakhaani, kaahaala wi Yehova ookivaha opwaha kinaphwanelelaaka.

[Yooleeliherya va epaaxina 31]

Naamwi kikhalaka mu empa enakhapeleliwamo areca, koolakelela otitelela waaleela akina nroromelo naka

[Eruku va epaaxina 31]

Ni ekopo kinnawerya waavya manturu mu telefone aka

[Eruku va epaaxina 30]

Eecihaka yoohuserya ya Piipiliya

[Eruku va epaaxina 30]

Va malapelo eechoko ni asinthamwene awe

[Eruku va epaaxina 31]

José Maria