Mwiirehererye Hiihaano wi Mukhale mu Elapo Yahiihaano

“Yereke saphama . . . wi epharashe okumi-kumi owo.”​—1 TIM. 6:18, 19.

MACIPO: 125, 40

MWAAHAALA WAAKHULA HAI?

Makhalelo taani oomunepani nnaweheryaahu opuha mu elapo yahiihaano?

Nnii niireherye hai hiihaano wi nikhale mu elapo evyaani? Soolakelela soomunepani inii sinikhaviherye hai wiirehererya ntakhara okumi mu elapo yahiihaano ya Muluku?

1, 2. (a) Mareeliho taani oomwiilini munaweheryaanyu mu Parataiso? (Moone eruku yoopacerya.) (b) Mareeliho taani oomunepani anahaala okhala mu elapo yahiihaano?

“OKUMI-KUMI OWO.” Wa ancipale a hiyo masu ala annanuupuxerya ewehereryo ya okhala mu Parataiso a veelaponi ya vathi okhala wookhala. Murummwa Paulo aalikanyiha “okumi wohimala” ni “okumi-kumi owo.” (Mwaalakhanye 1 Timoteo 6:12, 19.) Ninnaweherya okumi woohikuchuwa yoowo onahaala oruuha murecele ni ohakalala woohaalakhanyeya. Hannawerya waanyiherya ohakalala nneeraahu nikhaleno ovinya mahiku oothene ni ekumi yaphaama. (Yes. 35:5, 6) Muupuwele ohakalala onarweela wa okhala vamoha ni asinthamwene ahu, ophitaanyerya yaale enii eviihiwe mookhwani! (Yoh. 5:28, 29; Saw. 24:15) Nnnahaala tho okhalano ekari ya waaceererya mavyakelo ahu mu ohuserya, wiipa, oteka naari masuwelelo makina.

² Naamwi niweheryaka ichu seiya saphaama, mareeliho oochuneyaxa mu elapo evyaani enii ekhale mareeliho oomunepani. Enahaala okhala yoohakalaliha osuwela wi nsina na Yehova noheelihiwa nave wi olamulelo awe wohooneya! (Mat. 6:9, 10) Nnahaala otepa ohakalala woona waakhwanela wa yookhwela ya Yehova ntakhara achu ni elapo yavathi. Nave muupuwele mukhalelo taani onahaalaaya okhala wookhweya waataana ni Yehova vaavaa nnaacamelaahu ophaameya!​—Sal. 73:28; Yak. 4:8.

3. Nnaphwanela wiireherya hiihaano ntakhara eheeni?

³ Mareeliho yaala anahaala okhala awihu, woona wi Yesu oniroromeliha wi “itchu sothe sene siri soweryeya ti Muluku.” (Mat. 19:25, 26) Nave waakhanle wi ninnachuna okhala mu elapo evyaani, nnaphwanela weeravo echu hiihaano ‘wi nipharashe’ okumi woohimala. Nikhale niweheryaka okuchuwa wa elapo ela yoonanara, nave nnaphwanela weera yeeyo enachuneya wi niirehererye ntakhara okumi mu elapo evyaani. Nnii neereno hai nniiha nikhalaka mmukhalelo yoola wa ichu?

MUKHALELO WA WIIREHERYA

4. Mooniherye ti mwawiihai nnahaalaahu wiireherya ntakhara okumi mu elapo evyaani.

⁴ Nnii niireherye hai hiihaano wi nikhale mu elapo evyaani ya Muluku? Mwaanyiherye wi ninchuna othaamela elapo yookhopela. Naahaala wiireherya hai? Nnaphwanela opacerya ohuserya elocelo ya achu anakhala weiwo. Waahaala okhala wa mphurelo ohuserya mihapo saya. Akhweya nnanwerya otakiherya soolya saya. Ninnapacerya okhala ntoko nri mweelapo yeeyo. Moolikana, nnanwerya wiireherya ntakhara elapo evyaani moorweela wa okhala hiihaano ntoko nri mweelapo yeeyo nnaweheryaahu. Mmukhalelo yoola, muthokororye sootakiherya inacharela.

5, 6. Ohuserya wiiwelela marehereryo oomuluku onanikhaviherya hai?

⁵ Mu elapo evyaani, olamulelo wa Muluku onahaala wiiweleliwaka. Olamulelo owo onahaala okhala woohiyana ni olamulelo wamutano wa Satana! Olelo, omwaryeya ni wuumelela soochuna sa muchu mukhateiye ti sawunlaana, nave teevi enakhala yookhumelela ene? Okhooca wiiwelela ohoolela wa Muluku onnakumiherya ipahu ni ohooxeya. (Yer. 10:23) Ninnaweherya ni murima woothene elukuluku yeeyo achu oothene eneeraaya yiiweleleke olamulelo wa Yehova!

⁶ Enahaala okhala echu yoohakalaliha ochariha marehereryo a Yehova mu elapo evyaani nlapaka wi nireerihe elapo yavathi, naahusihaka achu ooviihiwa mookhwani, nave neerakano yoochuna ya Yehova. Nyenya hanka wakhala wi noovekiwa ophara muteko ohinanisivela? Apwanne naahaala wiiwelela moorweela wa owetha ophara muteko owo moohakalala? Ancipale a hiyo naahaala waakhula wi aai! Apwanne ninnachariha ohoolela wa marehereryo a Yehova hiihaano? Wakhala wi ninneerano yeeyo, ninniireherya ntakhara okumi woohimala niiwelelaka olamulelo wa Yehova.

7, 8. (a) Ntakhara heeni nnaphwanela wiilipixerya okhala awiiwelela? (b) Matorokelo taani Akiristu akina akumannaayano? (c) Tiheeni nnaphwanelaahu ororomela vooloca sa okumi mu elapo evyaani?

⁷ Nnanwerya wiireherya ntakhara okumi mu elapo evyaani moorweela tho wa wiilipixerya okhala oohakalala ni awiiwanana. Wakhala wi ninniiwanana ni yaale anahoolela olelo, akhweya moorweela wa ohakalala ni muteko muvyaani nivahiwaahu, moohikhwa minikwa nnahaala okhalano moonelo mmohamoha mu elapo evyaani. (Mwaalakhanye Ahepri 13:17.) Mu Elapo ya Nlakano, Aisarayeli yaamukaweliwa nipuro nookhalavo. (Nam. 26:52-56; Yos. 14:1, 2) Olelo hannasuwela ti woowi muchu ti muchu a hiyo onahaaleiye okaweliwa wi akhalekevo mu elapo evyaani. Nyenya wiiwanana onahaala oruuha murecele ni ohakalala vaavaa nneeraahu nipakeke yookhwela ya Yehova moohipwacha nipuro nnahaalaahu okhalaka mweelukuluku yeeyo.

⁸ Onachuneya wiilipixerya wi naakhele ekari ya okhala vathi va olamulelo wa Omwene moorweela wa wiiwanana ni marehereryo a Yehova ni ophara phaama miteko soomuluku. Nave mikhalelo sahu sinanwerya otorokeya moovira wa elukuluku. Ntoko yootakiherya, anna akina a emusi ya Peteli ya Estatu Unitu yaavekiwa orumeela mmuteko wa mmacani, awo annapuha mareeliho mancipale mmuteko aya wa elukuluku yoothene. Nthowa na wuuluvala naari echu ekina, akina yaari mmuteko wa weeceeca vano ahaakhela muteko wa opiyoneero wavameekhaaya. Wakhala wi ninnakhala oohakalala, ninnamveka Muluku nikhaviheryo nave ninnawetha mmuteko awe, nnahaala okhala oohakalala ni opuha mareeliho mancipale mmahiku yaala oovila okhala. (Mwaalakhanye Masiposipo 10:22.) Hanka vooloca sa ewehereryo ahu ya omwaahiyu? Nnanwerya waanyiherya nipuro naahaalaahu osiveliwa okhalavo, nyenya akhweya nnahaala ovekiwa wi nikhaleke mu nipuro nikina. Moohipwacha weiwo nnahaalaahu orumeelawo ni yeeyo nnahaalaahu olapaka, ninnaroromela wi nnamukhala oothamalela ni oosareya ohakalala.​—Neh. 8:10.

9, 10. (a) Mmikhalelo taani onahaalaaya okhala woochuneya opixa murima mu elapo evyaani? (b) Nnii nooniherye hai wi nri oopixa murima?

⁹ Mu elapo evyaani enamukhala elukuluku nnahaalaahu ochuna okhala oopixa murima. Ntoko yootakiherya, nnanwerya wiiwa michaka sa ovinya mookhwani wa muchu yoowo aari nthamwene naari mmusi a achu akina. Onahaala ochuneya owehererya oviihiwa wa oosiveliwa ahu. Wakhala wi eyo yoheereya, apwanne nnahaala ohakalala ni akina ni okhala oopixa murima? (Arom. 12:15) Ohuserya okhala ooweherya waakhwanela wa sooloherya sa Yehova hiihaano enahaala onikhaviherya okhala oopixa murima omwaahiyu.​—Ekle. 7:8.

¹⁰ Nnanwerya tho wiireherya ntakhara okumi mu elapo evyaani moorweela wa okhala oopixa murima vooloca sa wuupululiwa wa iparipari sa Mpiipiliya. Apwanne ninniilipixerya hiihaano ohuserya ni opixa murima vaavaa wiiwexexa wahu iparipari sa Piipiliya onuupululiwaaya vakhaani vakhaani? Wakhala wi ti hiiha, moohikhwa minikwa hokhala woovila wooniherya opixa murima mu elapo evyaani vaavaa Yehova oneereiye asuwelihe malamulo awe wa achu.​—Masi. 4:18; Yoh. 16:12.

11. Tiheeni Yehova onanihusiheiye vooloca sa wiiwanana wa achu, nave eyo enii enikhaviherye hai mu elapo evyaani?

¹¹ Mukhalelo mukina onahaala onikhaviherya okhala mu elapo evyaani ori okhurumuwela. Variyari va Olamulelo wa Kiristu wa Iyaakha Ekonto, enahaala omaliha elukuluku wi achu eekhaikhai ni oohikhala eekhaikhai ehiye mikhalelo soohiphaameya. (Saw. 24:15) Apwanne nnahaala owerya ovilelana mukina ni mukhwaawe mweelukuluku yeeyo? Wakhala wi opacerya hiihaano ninnahuserya okhurumuwela ni osepa omwarya onthamwene, enahaala okhala wookhweya weerano emohamoha omwaahiyu.​—Mwaalakhanye Akolose 3:12-14.

12. Mutharihe wiiwanana orivovo variyari va ewehereryo ahu ya omwaahiyu ni mukhalelo ahu wa okumi hiihaano.

¹² Okumi mu elapo evyaani honataphulela wi nnahaala okhalakano yeeyo nnachunaahu nihenre echu. Okumi owo onahaala ophitaanyerya okhala oothamalela ichu soothene vaavaa nnaphuraahu orweela wa wiiwelela olamulelo wa Yehova. Onahaala ochuneya opharihela mikhalelo seiyo Yehova onanihusiheiye olelo. Moorweela wa ohuserya okhala mwawiiwanana ni ewehereryo ahu, ninnannuwiha mikhalelo seiyo inahaala okhala soochuneya okhala wookhala. Ninnalipiha nroromelo nahu mu waakhela “elapo enorwa eyo.” (Ahe. 2:5; 11:1) Mwawaaceererya, ninnooniherya wi ninnachuna ekhaikhai yeeyo enahaala okhala veelaponi. Chiryene ninniirehererya wi nikhale mu elapo evyaani ya Muluku.

MWAAVYE SOOLAKELELA SOOMUNEPANI

13. Miteko taani inahaala okhala soochuneyaxa mu elapo evyaani?

¹³ Muthokororye mukhalelo mukina wa wiireherya ntakhara okumi wa muhoolo. Naamwi eroromelihiwe wi mu elapo evyaani enahaala okhalamo yoolya yincipale nave wi soothowa ikina inahaala ohakalalihiwa, nnahaala ophwanya ohakalala otokweene moorweela wa waakhwaniha soothowa sahu soomunepani. (Mat. 5:3) Miteko soomunepani sinahaala okhala soochuneyaxa wa hiyo, nave nnahaala ophwanya ohakalala mwa Yehova. (Sal. 37:4) Moorweela wa okuha makupa oopacerya ichu soomunepani hiihaano, ninniireherya ntakhara okumi weeparipari wa omwaahiyu.​—Mwaalakhanye Mateyu 6:19-21.

14. Soolakelela taani soomunepani inahaala waakhaviherya amiravo otikitherya okumi woohimala mmuupuweloni?

¹⁴ Nnii naaceererye hai ohakalala mmiteko sahu soomunepani? Mukhalelo mmoha ori otikitherya soolakelela soomunepani. Waakhanle wi nyuwaano mwa mmiravo nave munnuupuwelela omurumeela Yehova, ti yaphaama othokororya soolaleeryiwa sahu seiyo irino sooleeliherya vooloca sa mikhalelo soohiyana hiyana sa orummwa wa elukuluku yoothene ni otikitherya seiyo.a Muloce ni muchu yoowo omalinhe iyaakha sincipale mmuteko wa elukuluku yoothene. Moorweela wa opaka orummwa okhala muteko anyu, munniirehererya wa muteko woohimala wa Muluku mu elapo evyaani, mwemmo onahaalaaya okhala woochuneya wiivyakiha wanyu woomunepani.

15. Soolakelela taani soomunepani siri sooweryeya wa alaleeryi a Omwene?

¹⁵ Soolakelela taani nnaphwanelaahu otikitherya ntoko alaleeryi a Omwene? Nnaphwanela olakelela orehererya mukhalelo mmoha wa orummwa. Naari wiilipixerya wiiwexexa malakiheryo a Piipiliya ni ophariheleya waya. Hanka vooloca sa oreeriha mavyakelo ahu a waalakhanya ni oloca vanlakani naari ovaha maakhulo mmithukumanoni? Moohikhwa minikwa aakhalavo makhalelo makina. Echu yoochuneya ti ela: Otikitherya soolakelela soomunepani enahaala waaceererya ohakalala wanyu mmiteko soomuluku, nave ela enahaala wookhaviheryaani wiirehererya ntakhara okumi mu elapo evyaani.

MAREELIHO AHU AAPACERYA!

16. Ntakhara heeni omurumeela Yehova mukhalelo waphaamaxa wa okumi?

¹⁶ Apwanne omaliha elukuluku niireheryaka ntakhara elapo evyaani ennanihiiha opuha okumi olelo? Hooye! Omurumeela Yehova mukhalelo woohakalalihaxa wa okumi. Tahi muteko wookhinyereryiwa pahiru wi nivuluwe mu yoohooxa etokotoko. Owo mukhalelo ahu wa okumi, yoowo onakumiherya ohakalala otokweene. Okhalano ohoolela wa Yehova ni opuha osivela wawe weeparipari echu yaphaamaxa opwaha okhalano mukhalelo wa okumi woovuhana ni yene. (Mwaalakhanye Salmo 63:1-3.) Hori woochuneya oweherya ophiya elapo evyaani wi nipacerye opuha mareeliho oomunepani yaawo anakhumelela mu omurumeela Yehova ni murima woothene​—mareeliho awo annaphwanyeya hiihaano! Chiryene, ancipale a hiyo ninnahaca mareeliho yaawo mu iyaakha sincipale, nave noosuwela orweela wa yaweereya ahu wi hiwaavo mukhalelo mukina wa okumi onaruuha ohakalala otokweene.​—Sal. 1:1-3; Yes. 58:13, 14.

17. Nipuro taani soochuna sahu ni ohakalala inahaalaaya okhalano mu Parataiso?

¹⁷ Soochuna sa muchu mukhateiye inahaala okhalano mpuro aya mu elapo evyaani ya Muluku. Muupuwele, apwanne Yehova aahaala onipatuxa ni yoochuna ya opuha okumi woohakalaliha nave ahaakhwanihe yoochuna eyo? (Ekle. 2:24) Mmikhalelo soothene, Yehova onahaala ‘ovoniha sothene iri ni ekumi.’ (Sal. 145:16, BNM) Othata ni ohakalala onahaala okhalano nipuro naya, nyenya ohakalala yoowo onahaala waaceereryeyaka moorweela wa okuha onthamwene ahu ni Yehova mu nipuro noopacerya. Owo tho onahaala okhala mukhalelo mmohamoha mu Parataiso veelaponi yavathi. Ti yaphaama ohuserya okuha soochuna sahu mu nipuro noophwanelela ni ohela soochuna sa Omwene mu nipuro noopacerya wi naakhele mareeliho oomunepani yaawo anaphwanyeya hiihaano wa achu a Yehova!​—Mat. 6:33.

18. Nnii nooniherye hai wi ninniireherya ntakhara okumi mu Parataiso?

¹⁸ Mu Parataiso onoorwa, nnahaala opuha ohakalala mmukhalelo nihintonkaahu woona. Hankooni nooniherye nchuno nahu na okhalano okumi weeparipari moorweela wa wiireherya opacerya hiihaano. Haya naavye okhalano mikhalelo soomuluku nave niphwanye ohakalala otokweene moorweela wa ophara muteko nivahiwaahu wa olaleerya Omwene mwa mvai. Niphwanye ohakalala otokweene orweela wa otikitherya soolakelela soomunepani. Nave ni nroromelo nawaakhwanela mu soororomeliha sa Yehova, hankooni nikhale hiihaano niweheryaka okumi mu elapo evyaani!

[Nsu na vathi]