MWAHA WA EKAAPA | ANAMOONA A YEHOVA TAANI?
Anamoona a Yehova Taani?
“Kaamusuwela Mike mu iyaakha sincipale. Owo Namoona a Yehova. Nyenya wiiliwiili nkiiwexexa ichu sa malapelo awe. Ichu ntoko, Yehova taani? Ntakhara heeni Anamoona hanachapela mahiku a wiichuuwa? Teevi eri yoolakelela aya?”—Becky, Kaliforniya, E.U.A.
“Vaavaa amwaacamani aka yaapacenryaaya omuhuserya Piipiliya ni Anamoona Yehova, kaaniikoha: ‘Nsina nawi Anamoona a Yehova nnataphulela eheeni? Nave kuupuwela wi naari nsina nivyaani!’”—Senon, Ontario, Kanata.
“Mwaaraka ni miyaano nuupuwela wi Anamoona a Yehova yaaphiya wi evekele ntakhara othanana wahu nthowa na ohikhalano ekerexa. Woona wi ikerexa sincipale hisaano echu naachunaahu, nuupuwela tho wi Anamoona a Yehova hiyaarino.”—Kent, Waxinton, E.U.A.
“Mweeparipari miyaano nkaasuwela phaama Anamoona a Yehova ni yeeyo anaroromelaaya.”—Sesilia, Tinamarka.
Nyuwaano akhweya montoko owoona elaleeryaka empa ni empa naari vanlakani, evahaka soolaleeryiwa soorweela Mpiipiliyani, naari yaahusihaka achu Piipiliya vaate vaya. Akhweya nyuwaano mwaakhenle erevista yeela ni Anamoona. Naamwi hiiha, akhweya munnakhwa minikwa sa eparipari vooloca sa Anamoona a Yehova. Akhweya moonelo anyu ti woolikana ni moonelo wa achu aromoliwe woopaceryani.
Waakhanle wi mookhalano minikwa seiya, ti woowi munahaalaanyu ophwanyawo maakhulo? Munii musuwele hai yeeyo Anamoona a Yehova anaroromelaaya, muteko wa olaleerya ni mukhalelo mapuro aya a mithukumano analiveliwaaya, nave ntakhara heeni annaloca ni achu vaate vaya ni vanlakani?
Sesilia oromoliwe woopaceryani onnaloca: “Kaahaalakhanya miyaha mincipale vooloca sa Anamoona a Yehova mu interneti. Kaawiriyana miyaha sawootha seiyo achu yaalocaaya. Ntoko yookhumelela, kaakhalano moonelo woonanara vooloca sa Anamoona a Yehova.” Ohoolo waya, owo aaloca ni Anamoona a Yehova nave aaphwanya maakhulo oohakalaliha a makoho awe.
Mwaanachuna omaliha minikwa sanyu vooloca sa Anamoona a Yehova? Ninnoovekaani wi mwaavye miselo seeparipari ni Anamoona a Yehova yaawo apanke erevista yeela. (Masiposipo 14:15) Ninnaweherya wi mwaha onacharela onahaala wookhaviheryaani onisuwela phaama, osuwela soororomela sahu ni wiiwexexa muteko nnapharaahu.