MWAHA WA EKAAPA | ANAMOONA A YEHOVA TAANI?
Anamoona a Yehova achu a mukhalelo taani?
Hiyaano nnapaka makupa a marehereryo a veelaponi yoothene ahinapwexeheryana ni malapelo makina. Nipuro nahu ntokweene nri o Estatu Unitu, nave Anamoona ancipale anakhala mu ilapo ikina. Anamoona 8.000.000 annaahusiha achu Piipiliya mu ilapo soopwaha 230. Ninneerano yeela mwawiiwanana ni masu a Yesu: “Nave mutxhaka ola wa Omwene omamulaleyiwa mwelaponi yothene wi ovahe onamona maloko othene.”—Mateu 24:14.
Moohipwacha nipuro nnakhalaahu, ninniiwelela malamulo. Nave ninniilipixerya ohipaka makupa a miyaha sa elapo. Ninneerano ela nthowa nawi nniiwelela nlamulo na Yesu nawi Akiristu “tahi a mwelaponi.” Mwawiihiiha hinnapaka makupa mmiyaha sa elapo naari ekhoco. (Yohani 15:19; 17:16) Ntoko yoothoonyerya, variyari va Ekhoco Yanaawiili ya Elapo Yoothene, Anamoona a Yehova yaawaleliwa, ni ohooxiwa, naamwi hiiha hiyeemerenrye wi eyo yaaceecheihe. Pispu o Alemanya aarepa: “Awo yaanakhooca opaka okhaviherya ekhoco nthowa na malakiheryo a Mpiipiliyani.”
Hiyaano, hanniivalaanya. Yesu aavekela wa Muluku ntakhara oomuchara awe: “Nkinoveka wi wavìhemo mwelaponi.” (Yohani 17:15) Akhweya munnanoona nlapaka, nthumaka, nave niyaaka oxikola ni mmaparu makina.
[Yooleeliherya va epaaxina 4]
“[Anamoona a Yehova] aakhalano meecelo aphaama. Naaphwanela waapharihela achu a mukhalelo yoowo mmiteko mitokweene sa miyaha sa elapo—nyenya hinneerano. . . . Awo anniiwelela olamulelo wa achu nyenya aneemererya wi Omwene wa Muluku tonahaala omaliha makacamiho oothene a achu.”—Eyornali Nová Svoboda, Czech Republic.
[Eruku va epaaxina 4]
ILAPO ORIMO ANAMOONA ANCIPALE
Estatu Unitu 1.190.000
Mexiko 800.000
Prasili 770.000
Nixeriya 330.000
Italiya 250.000
Xapau 220.000
[Ekaaxa va epaaxina 4]
Moone exilema Congresso Especial em Israel mu www.jw.org/pt, nave moone mukhalelo Anamoona a Yehova o Isarayeli ni o Palestina yaavonthaaya owanawana wa maloko. (Muye QUEM SOMOS > CONGRESSOS)