Munnamusivela Mukhwinyu Ntoko Muniisivelaanyu?
“Omukhwele mukhwa-à ntoko onikhwelawe.”—MATEU 22:39.
MACIPO: 73, 36
MUNANWERYA WAAKHULA?
Ntakhara heeni ninnaphwanela otakiherya osivela wa Yehova?
Teevi eri esisapo ya osivela mu othela?
Achu a Muluku anooniherya hai waasivela akhwaaya?
1, 2. Piipiliya onooniherya hai wi osivela ti woochuneya?
OSIVELA mukhalelo mutokweene wa Muluku. (1 Yohani 4:16) Yesu Kiristu ntoko yoopatuxiwa yoopacerya, aamaliha iyaakha sincipale wirimu ni Tiithi awe nave aahuserya wi Yehova Muluku, toosivela. (Kolosi 1:15) Yesu onnooniherya osivela mmohamoha mu okumi awe woothene, wirimu ni veelaponi yavathi. Mwawiihiiha nnaphwanela ororomela wi Yehova ni Yesu wiiliwiili anahaala olamulelaka mmukhalelo woosivela.
2 Vaavaa muchu mmoha aamukonheiye Yesu tinivi naari nlamulo ntokweene na mmalamulo, Yesu aaloca: “Wakhwele Apwiya Muluku-à ni ikuru sà sothene. Nla nri nlamulo ntokotoko ni nopatxerya. Nlamulo nanawili nnalikana ni nopatxerya, ti nla: omukhwele mukhwa-à ntoko onikhwelawe.”—Mateu 22:37-39.
3. Taani ori ‘mukhwihu’?
3 Ti wookhweleya wooniherya osivela mu waataana wahu woothene. Yesu ooloca wi nnaphwanela omusivela Yehova nave tho omusivela mukhwiihu. Nyenya taani ori ‘mukhwihu’? Wakhala wi moothela, mukhwinyu ti iyanyu naari mwaarinyu. Mukhwiihu tho anaphitaanyerya anna ni arokora ahu mmulokoni vamoha ni achu nnaaphwanyaahu mu orummwa. Mmwaha yoola, nnahaala ohuserya mukhalelo nnaphwanelaahu wooniherya osivela ni mukhwiihu.
MMUSIVELE OOTHELANA ANYU
4. Othela onii okhumelele hai naamwi nri oohiphaameya?
4 Yehova aampatuxa Aatamu ni Haava nave aahaaphitaanya vamoha. Ola waari othela woopacerya. Muluku aachuna wi ekhale oohakalala mu othela nave esaryeihe elapo ni anamwane aya. (Maphatxuwelo 1:27, 28) Vaavaa yaamuchekenlaaya Yehova, othela waya waapahuwa, nave yoocheka ni okhwa woonivolowela oothene ahu. (Aroma 5:12) Naamwi hiiha, olelo othela onanwerya okhumelela phaama. Mpiipiliyani, Yehova Mpatuxa a othela, onnavaha mathipelo aphaama wa atheli.—Mwaalakhanye 2 Timóteo 3:16, 17.
5. Teevi eri esisapo ya osivela mu othela?
5 Piipiliya onnooniherya wi osivela weeparipari ti wookhweleya wi waataana okhale woohakalaliha. Eyo enneereya mu othela. Murummwa Paulo onnaloca osivela weeparipari ariki: “Okhwela ti wovilela, ti wa orèra murima. Hiwano nrima. Honìthamala, nari honìkusererya. Okhwela honera etxhu yohiphwanelela, honasya ophura waya. Honanyenyeya, nari honupuwelela mathowa. Okhwela honahakalala ni sohokolola, nto onahakalala ni eparipari. Okhwela onnalevelela sothene, onnaroromela sothene, onnaweherya sothene, nave onnavilela sothene. Okhwela horwa omalaru.” (1 Korinto 13:4-8) Nuupuwelela masu a Paulo ni opharihela, nnanwerya okhala oohakalala mu othela.
6, 7. (a) Tiheeni Piipiliya onaloceiye sa okhala muhooleli? (b) Akiristu anaphwanela waakhaliha hai asaaraya?
6 Yehova oolakelela taani onaphwanela okhala muru wa echoko. Paulo onnathariha: “Kinnakhwela wosuwelihani wi muru wa atxhu othene ti Kristu, ni muru wa muthiyana ti mulopwana, nave muru wa Kristu ti Muluku.” (1 Korinto 11:3) Nyenya Yehova onaweherya wi alopwana ekhale ahooleli oosivela ohiya oohooxa. Yehova taphaama nave muhooleli oosivela. Ntoko yookhumelela, Yesu onnacicimiha olamulelo wa Muluku. Owo aaloca: “Kinnàkhwela Atithi.” (Yohani 14:31) Yesu hii oone mmukhalelo yoola waakhanle wi Yehova aari oowali.
7 Naamwi alopwana ekhanle muru wa athiyana, Piipiliya onnaaleela wi yaacicimiheke asaaraya. (1 Pedro 3:7) Mulopwana onii eereno hai? Owo onaphwanela othokororya sookhwela sa mwaariye ni ocicimiha seiyo inamusivela. Piipiliya onnaloca: “Nyuwotho, alopwana, mwakhweleke asarinyu, ntoko Kristu okhwenleiye [muloko] ni ivelenleiye.” (Éfeso 5:25) Aai, Yesu oovaha okumi awe ntakhara oomuchara awe. Wakhala wi mulopwana muhooleli oosivela ntoko Yesu, onahaala okhala wookhweya muthiyana ocicimiha ni wiiwelela soolakelela sa iyawe.—Mwaalakhanye Tito 2:3-5.
MWAASIVELE ANNA NI AROKORA ANYU
8. Nnaphwanela waakhaliha hai anna ni arokora ahu?
8 Olelo, macikhwi aachu a elapo yoothene annamulapela Yehova. Awo anna ni arokora ahu. Nnaphwanela waakhalihaka hai? Piipiliya onnaloca: “Niwereleke saphama atxhu othene, ntosa yale ari asinnihu munroromeloni.” (Galasya 6:10; mwaalakhanye Aroma 12:10.) Murummwa Petro aarepa wi “wiwelela eparipari” ennakumiherya “okhwelana wonna.” Petro tho aaloca wa Akiristu: “Opwaha itxhu sothene mukhwelaneke vatokovene.”—1 Pedro 1:22; 4:8.
9, 10. Ntakhara heeni achu a Muluku tawiiwanana?
9 Marehereryo ahu a elapo yoothene tawiiwanana. Ntakhara heeni? Nthowa nawi nookhalano osivela weeparipari wa anna ni arokora ahu. Echu ekina, nthowa na omusivela wahu Yehova ni wiiwelela malamulo awe, owo onnanikhaviherya ni munepa awe waweela. Munepa wa Muluku onnanikhaviherya okhala awiiwanana ni annihu a elapo yoothene.—Mwaalakhanye 1 Yohani 4:20, 21.
10 Paulo aaceenyerya ochuneya waya wooniherya osivela variyari va Akiristu akhwiihu ariki: “Warani murima wa ikharari, waphama, wawiyeviha, womala ni wovilela. Mukhale òvilela ni akhwinyu, nave mulevelelaneke wakhalavo nthowa ni mukhwinyu. Ntoko Apwiya olevelenlayani, ni nyuwotho, mwaleveleleke akhwinyu. Opwaha sothene iha warani murima wa okhwelana t’ori nimakelo na wakhwanela.” (Kolosi 3:12-14) Ninnathamalela osivela yoola ori “nimakelo na wakhwanela,” onooneya variyari va hiyo moohipwacha elapo ene!
11. Tiheeni enasuwanyeiha marehereryo a Muluku?
11 Osivela weeparipari ni wiiwanana wa akapuro a Yehova onnaasuwanyeiha ntoko nikhuuru nri mmalapelo eeparipari. Yesu aaloca: “Mwa yeyo atxhu othene anamusuwela wi muri amuhuseryaka, nyuwo mwakhwelanà, mukina ni mukhweiye.” (Yohani 13:34, 35) Nave murummwa Yohani aarepa: ‘Mwa ela t’anoneyaya anamwane a Muluku ni anamwane a Musaserya: othene yole ohinera yawokololowa ni ohinamukhwela munnawe, hanarwa wa Muluku. Mutxhaka mwiwalanyu ovinya wopatxeryani ti ola: nikhwelaneke mukina ni mukhwawe.’ (1 Yohani 3:10, 11) Osivela ni wiiwanana onnaasuwanyeiha Anamoona a Yehova ntoko oomuchara eeparipari a Kiristu, achu yaawo Muluku onaaphariheleiye wi elaleerye michaka saphaama sa Omwene veelapo yoothene.—Mateu 24:14.
OTHUKUMANYIWA WA “MULOKO MUTOKWENE”
12, 13. Tiheeni aneeraaya ale anapaka makupa a “muloko mutokwene”, nave tiheeni anaweheryaaya moohilekela?
12 Akapuro ancipale a Yehova olelo anapaka makupa a “muloko mutokwene” yaawo anarwa mmakupa oohiyana hiyana a elapo, nave awo annakhaviherya Omwene. “Ala ti yala arule mohosiwani otokwene. Àvasa ni àhèliha sowara saya munikhamini na eputxeputxhe” moorweela wa wooniherya nroromelo mmukucho wa woopola wa Yesu. Yaale a “muloko mutokwene” annamusivela Yehova ni Mwanawe, nave annamulapela “othana ni ohiyu.”—Wupulula 7:9, 14, 15.
13 Moohilekela, Muluku onahaala otoloxa elapo yeela yoonanara mu ‘yohosa etokwene.’ (Mateu 24:21; mwaalakhanye Yeremiya 25:32, 33.) Nyenya Yehova onahaala waakhapelela ni waahoolela akapuro awe ovolowa mu elapo evyaani nthowa na waasivela wawe. Ntoko olaihenryeiye mu iyaakha 2.000 ivirale, “Muluku onanvuta mithori aya, nave horwa okhalavotho okhwa nari winla, nari ikutxho, nari witxela.” Munnaweherya okhala mu Parataiso ohirimo onanara makacamiho ni okhwa?—Wupulula 21:4.
14. Tuuvi ori waaca wa muloko?
14 Omapacereryo wa mahiku ookuchula mu 1914, yaariwo akapuro vakhaani a Muluku. Moorweela wa waasivela akhwaaya nave nnikhaviheryo na munepa waweela wa Muluku, nikhuuru nla nikhaani na Akiristu oothanliwa naanalaleerya michaka saphaama sa Omwene naamwi mmakacamiho. Tuuvi waari mphurelo ene? Muloko mutokweene yoowo orino ewehereryo ya okhala veelaponi yavathi onnathukumanyiwa. Olelo, aakhalavo Anamoona oopwaha 8.000.000 mmiloko soopwaha 115.400 orukurerya elapo yoothene, nave enamvira yaaceereryeyaka. Ntoko yootakiherya, Anamoona avyaani 275.500 aapatisiwa mu eyaakha ya muteko ya 2014. Ela ti wi 5.300 yaanapatisiwa isumana soothene.
15. Ti mwawiihai ancipale anawiriyanaaya michaka saphaama olelo?
15 Ti yootikhiniha woona mukhalelo ancipale anawiriyanaaya michaka saphaama sa Omwene. Olelo soolaleeryiwa sahu sinnaphwanyeya mu ilocelo soopwaha 700. Mulipeleli erevista yeeyo enakaiwa vancipale mu elapo yoothene. Ikoopiya soopwaha 52.000.000 sinnakumihiwa mweeri ti mweeri mu ilocelo 247. Nave liivuru Piipiliya Onahusiha Eheeni Chiryene? a weecihano soohuserya sa Piipiliya ootaphuleliwa mu ilocelo opwaha 250. Ophiyerya olelo, ikoopiya soopwaha 200.000.000 sookumihiwa.
16. Ntakhara heeni marehereryo annatitelela oya vahoolo?
16 Marehereryo ahu annaya vahoolo nthowa nawi nookhalano nroromelo wa Muluku nave ninneemererya wi Piipiliya Masu awe ooveereliwa. (1 Tesalónika 2:13) Ninnatitelela opuha mareeliho a Yehova, naamwi nihooxiwaka ni mutakhali, Satana.—2 Korinto 4:4.
MWAASIVELEKE AKINA
17, 18. Tiheeni Yehova onaweheryeiye wa hiyaano vooloca sa yaale ahinamulapela Yoowo?
17 Achu annaakhulela olaleerya wahu mmukhalelo woohiyana hiyana. Achu akina annaniwiriyana, nyenya akina anniica michaka sahu. Tiheeni Yehova onaweheryeiye wa hiyaano vooloca sa yaale ahinamulapela Yoowo? Moohipwacha mukhalelo achu anaakhulelaaya michaka sahu, hiyaano ninnachara miruku sinaphwanyeya Mpiipiliyani. Owo onnaloca: “Malotxelo anyu mahiku othene ekhaleke òsivela, oweleliwa ni màkha, nave musuwele omwakhula mutxhu ti mutxhu.” (Kolosi 4:6) Vaavaa nnaakihaahu soororomela sahu, nnachuna weerano eyo ‘mwantxitximiho’ nthowa nawi ninnaasivela akhwiihu.—1 Pedro 3:15.
18 Vaavaa achu anaakaahaaya ni okhooca michaka sahu, ninnooniherya osivela wahu wa akhwiihu nave ninnachariha yootakiherya ya Yesu. Yesu “aruwaniwaka, hakhula ni oruwana. Opopihiwaka, hopopiha.” Ohiya yeeyo, Yesu aamuroromela Yehova. (1 Pedro 2:23) Mwawiihiiha, ilukuluku soothene, ninnooniherya wiiyeviha ni opharihela miruku iha: “Muhiliveke yonanara ni yonanara, nave oruwana ni oruwana. Nto mwakhuleke ni masu a ntxitximiho.”—1 Pedro 3:8, 9.
19. Nnaphwanela waakhaliha hai amwiicani ahu?
19 Wiiyeviha onnanikhaviherya wiiwelela malakiheryo ookhweleya avahiwe ni Yesu. Owo aathariha: “Mùhiwa elotxiwe: Omukhweleke mukhwa à ni omwitxe mwitxana à. Nto miyo kinnolèlani wi mwakhweleke amwitxana anyu, ni mwaleveleleke yale anawikarani. Hiha munarwa mukhala ana a Atithinyu ari wirimu, anakumiha nsuwa wa atxhu aphama ni ònanara murima nave anarupiha epwila wa awokololowa ni wa òhokolola.” (Mateu 5:43-45) Ntoko akapuro a Muluku, nnaphwanela otitelela waasivela amwiicani ahu moohipwacha onikhaliha waya.
20. Nnasuwela hai wi omusivela Muluku ni akhwiihu onamusareya veelaponi yoothene? (Moone eruku yoopacerya.)
20 Ilukuluku soothene nnaphwanela wooniherya wi ninnamusivela Yehova ni akhwiihu. Naamwi achu eniicaka ni okhooca michaka sahu, ninnaakhaviherya yakhala oothoiwa. Murummwa Paulo aarepa: “Mankau muneranyu mukhaleno ekhale a okhwelana pahi, wona wi onamukhwela mukhweiye òhakhwaniha malamulo. Malamulo analotxa: ohiraruwe, ohiphe, ohiye, ohikhweleke itxhu sa mwanene, ni malamulo makina othene athukumanyiwe mwa masu ala: omukhweleke mukhwa-à ntoko weyano onikhwelawe. Okhwelana honamwerela yonanara mukhwaya. Vanonto okhwelana ti onakhwaniha malamulo.” (Aroma 13:8-10) Mu elapo yeela yookawanyeya, ya nlala ni yoonanara enalamuleliwa ni Satana, akapuro a Muluku annooniherya osivela weeparipari wa akhwaaya. (1 Yohani 5:19) Yehova amanle omutoloxa Satana ni masololo awe, vamoha ni elapo yeela yoonanara, osivela onahaala osareya veelapo yoothene. Mareeliho taani oohakalaliha owoona achu oothene emusivelaka Yehova ni akhwaaya!
[Ekaaxa va epaaxina 26]
MASU ATHARIHIWE
Mukhwiihu: Wiiliwiili nnuupuwela wi mukhwiihu ti muchu nnakhalaahuno naari muchu nnuukaahuno ichu vamoha. Nyenya, mukhwiihu tho onaphitaanyerya oothelana ahu, anna ni arokora a mmulokoni, ni achu nnaaphwanyaahu mu orummwa. Yesu oonihusiha wi nnaphwanela waasivela akhwiihu