MWAHA WA EKAAPA | NTAKHARA HEENI OKHALA OOROROMELEYA?

Ohiroromeleya Onoovolowelaani Hai?

“Sinnakhumelela saweereya sincipale inawerya omalihiwa ni ohiroromeleya.”—Samantha, Afrika Oohico.

Munneemererya masu yaala? Moolikana ni Samantha, oothene hiyo ninnakumana ni mikhalelo soovila. Mukhalelo nnaakhulelaahu yaweeha ya okhala oohiroromeleya, onnooniherya echu taani nnacicimihaahu. Ntoko yootakiherya, wakhala wi ninnuukhuwa ni wooniwa phaama ni akina, nnahaala okhala oohiroromeleya wi nikhwaaniherye yoochuna ahu. Vaavaa eparipari enuupululiwaaya, ohiroromeleya onnaruuha sookhumelela soonanara. Muthokororye enacharela.

OHIROROMELEYA ONNAPAHULA ONTHAMWENE

Waataana onarweela wa ororomeleya. Vaavaa achu eeli anaroromelanaaya, awo annoona okhala awaakiheya ni oolipiheya. Nyenya ororomeleya honaphacuwa mukhataaya. Achu annaroromelana vaavaa anamalihaaya elukuluku vamoha, elocihanaka ni okhaviheryana ni murima woothene. Ororomelana onnapahuwa moorweela wa echu ekhaani ya ohiroromeleya. Nave vaavaa ororomelana onapahuwaaya, onakhala woovila orehererya.

Montoko owokiwa ni muchu yoowo mwaamoonaanyu okhala nthamwene aphaama? Wakhala wi ti hiiha, moonne hai? Mwaasooseya mmurimani. Eyo ti yawiiwexexeya. Hiwaavo minikwa wi ohiroromeleya onnapahula onthamwene waphaama.

OHIROROMELEYA ONNAKUMIHERYA OHIROROMELIWA

Mulipa ootholathola miyaha sa anakoso a Universitate a Kaliforniya ooloca wi “ohiroromeleya ti wawunlaana.” Mwawiihiiha, ohiroromeleya onalikana ni ereca yoorava—vaavaa muchu onakhaleiye ni muchu oowoka ti wookhweya “orava” ohiroromeleya.

Munii musepe hai omorela mmuraakho wa ohiroromeleya? Piipiliya onahaala wookhaviheryaani. Muthokororye malakiheryo a Piipiliya, yaawo anahaala othokororyiwa mmwaha onacharela.