MWAHA WA EKAAPA | VAAVAA OOSIVELIWA AHU ONAKHWEIYE

Nvilele ni Osooseya Wanyu Murima

Sookhalavo ikano sincipale mmwaha yoola. Nave tahi wi soothene sinnakhaviherya. Ntoko yootakiherya munahaala woona wi akina annahiiha winla naari wooniherya moonelo vyakala. Akina anamoleelaani weerano moohiyana nave wi mooniherye moonelo anyu woothene. Piipiliya ni otholathola wahiihaanoru sinnanikhaviherya ookhalano moonelo waphaama.

Mu sookhovelela ikina enooniwa ntoko yoohiphwanelela mulopwana winla. Nyenya apwanne nookhalavo nthowa na wuuliwa muru okumiha miithori, naamwi ori vanlakani vene? Alipa oohuserya a ekumi anneemererya wi ti yaphaama winla va makhwelo. Mu ilukuluku ikina winla onanwerya wookhaviheryaani ohooleela phaama osooseya wanyu murima. Ohinla onamukumiherya echu yoonanara. Piipiliya hanakhaviherya masu awi ti yoonanara naari mulopwana okumiha miithori sa osooseya murima. Ntoko yootakiherya, muupuwele sa Yesu. Naamwi aasuwenle wi ookhalano owerya wa omukookiherya okumi muchu okhwile, owo aahinla vanlakani ntakhara okhwa wa nthamwene awe oosiveliwa Laasaro!—Yohani 11:33-35.

Wiikhupanyiha onneereya va makhwelo, xaxaxa wakhala wi muchu owo okhwile mootutuxa. Aakhalawo mathowa mancipale anamweeriha muchu okhweliwe okhala awiikhupanyerya, vaavaa muchu oocicimiheya onaloceiye masu moohuupuwelela. Mulopwana o Afrika Oohico oniichaniwa Mikeya onnaloca: “Miyaano kaarino pahiru iyaakha 14 atiithi aka yaakhwilaaya. Omahiye muhooleli o Aklikana aaloca wi Muluku onachuna waakuxa voopacerya achu aphaama.a Nkaasiveliwe nthowa nawi naanachuna atiithi ahu. Naamwi ivinrevo iyaakha 63, nlelo ennakiicela.”

Hanka vooloca sa wiisoona okhalano nthowa? Xaxaxa okhwa wootutuxa, muchu okhweliwe wiiliwiili onnuupuwela, ‘akhweya ela hiyaahaala weereya waakhanle wi koopaka ela naari ele.’ Naari okumana wanyu wookuchula ni muchu owo okhwile akhweya waavolowela waakhulana. Eyo enanwerya waaceererya wiisoona okhalano nthowa.

Wakhala wi munnawana ni mukhalelo ntoko wiisoona okhalano nthowa ni wiikhupanyerya, ti yaphaama ohuupuwela moonelo yoowo. Moohiyana, muloce ni nthamwene yoowo onahaala woowiriyanaani ni woohakararyaani, wi moonelo ntoko yoowo ti wawunlaana wa achu ancipale akhweliwe. Piipiliya onnaleela: “Nthamwene onamukhwela nthamwene’awe mahiku othene, onnakhala munnawe, elukuluku y’epahu.”—Masiposipo 17:17.

Nthamwene aphaama a muchu okhweliwe onaphwaneleiye okhalano ti Mpatuxa ahu, Yehova Muluku. Mmiinele murima anyu wa yoowo mu nivekelo nthowa nawi “ti yowo onokhapelelani.” (1 Pedro 5:7) Opwaha yeeyo, owo onnalaiherya wi yaawo aneera hiiha, moonelo ni muupuwelo aya inamukhapeleliwa ni “muretxele wa Muluku, onapwaha miruku sothene.” (Filipi 4:6, 7) Nave tho, mweemererye wi Muluku ookhaviheryeeni openuwa moorweela wa Masu awe oohakararya, Piipiliya. Murepele soorepa soohakararya. (Moone ekaaxa enacharela.) Akhweya munamuchuna okuha mmuupuweloni ikina sa seiyo. Wuupuwelela soorepa iho enahaala okhala yookhaviherya xaxaxa ohiyu vaavaa munakhalaanyu meekhinyu nave muhinaweryaanyu orupa.—Isaiya 57:15.

Hiihaanoru, mulopwana a iyaakha 40, oniichaniwa Jack, oomuyeleela mwaariye nthowa na ereca ya Kanser. Jack olonce wi mweelukuluku aya ahoona omeekha. Nyenya onnaphwanya nikhaviheryo mu nivekelo. Owo onnathariha: “Vaavaa kinavekelaaka wa Yehova, nkinoona omeekha. Wiiliwiili kinnavinya ohiyu eriyari, nave nkinawerya okookela orupa. Kimanle waalakhanya ni wuupuwelela soorepa soohakararya ni omiinela murima wa Yehova, kinnamaaliheya ni murecele onarweela wirimu, weerihaka wi murima ni muupuwelo aka wiichuuwe nave kiwerye orupa.”

Mwali oniichaniwa Vanesa ohaayeleela amannya nthowa na ereca. Owo tho onnoona ikuru sa nivekelo. Owo onnaloca: “Mu ilukuluku saka sookacamiha, pahiru kaaphwanela wiichana nsina na Muluku nave kaanakokhora kinnlaka. Yehova aanawiriyana mavekelo aka nave wiiliwiili aanakivaha ikuru kaachunaaka.”

Alipa anaavaha ikano achu ookhweliwa annaalaka yaale anawana ni wiicela yoola mu wiivoliiherya waakhaviherya akina naari omaliha elukuluku aya epharaka muteko va nipuro anakhalaayawo. Weerano hiiha ennaruuha ohakalala nave enanwerya ovukula osooseya wa muchu. (Saweriwa Tʼarummwa 20:35) Akiristu ancipale akhweliwe ahoona wi waakhaviherya akina onnaaruuhela nihakararyo ntokweene.—2 Korinto 1:3, 4.

[Nsu na vathi]

[Ekaaxa va epaaxina 5]

SOOREPA SOOHAKARARYA SA MPIIPILIYANI

• Muluku onnathanana ni osooseya wanyu murima.—Salumu 55:22; 1 Pedro 5:7.

• Moopisa murima Muluku onnawiriyana mavekelo a akapuro awe. —Salumu 86:5; 1 Tesalónika 5:17.

• Muluku onnakhalano munkhela wa achu yaale akhwile.—Yobi 14:13-15.

• Muluku oolaiherya waaviiha achu ookhwa.—Isaiya 26:19; Yohani 5:28, 29.