Soororomeliha Inahaala Waakhwanela

Michaka yaphaama sa Omwene wa Muluku sinnalaleeryiwa veelaponi yoothene ya vathi, hiiha ntoko Yesu aalohenryeiye. (Mateu 24:14) Liivuru a Taniyeli onnanleela wi Omwene yoowo ti olamulelo wa Muluku. Ecima yanaawiili ya liivuru yoowo onnaloca oraceelana wa olamulelo wa achu, ovinyerya o Papulu ophiyerya mmahiku ahu. Aloheryaka yeeyo yaahaala weereya, eciciri ya makhumi maxexe naxexe eni:

“Muluku a Wirimu onamoneiha omwene wohiweryeyaru omwaryiwa nave havoru mwene oni akuse yowo. Nto omwene owo onammaliha omwene okina nave onamukhala mahiku othene.”

Yooloherya yeela ya Piipiliya ni ikina sinnaloca wi Omwene wa Muluku onahaala oviihavo olamulelo woothene wa achu ni oruuha murecele ni waarehererya achu veelaponi. Okumi onaya okhala wawiihai mu olamulelo wa Omwene? Vala sookhalavo soororomeliha sootikhiniha seiho inahaala waakhwanela moohilekela.

Eyo enahaala otaphulela ekumi yoophaameya ehirino makuchuwelo mu parataiso veelaponi! Ti yeeyo Mpatuxa ahu oosivela, Yehova Muluku, ororomelinheiye.

• 

  HERWA EKHALAVO EKHOCO

  Salumu 46:9: “Apwiya [Muluku] annamaliha ikhotxo ophiyerya onakomelawo elapo. Annintaka minra ni annathikila mavaka, ni moro anneyela iyakiho.”

  Mwaanyiherye mukhalelo elapo yaahaalaaya okhala waakhanle wi ikhorowa ni elukuluku yincipale enamalihiwa ipakiwakano ikapuchi, siphariheliwe wi saakhaviherye achu ohiya owiipha! Yoororomeliha yeela enahaala okhala yeeparipari mu olamulelo wa Omwene wa Muluku.

• 

  HORWA OKHALAVO WIICELIWA

  Isaiya 33:24: “Havo oni ikhupanyeryeke wa nthowa na witxeliwa.”

  Mwaanyiherye mweelaponi ahikhanlemo muchu oni eeteteyeke nthowa na ereca ya murima, kanser, ereca ya nooxekuwa naari ireca ikina. Hokhalavo mapuro eekumi ni mirece. Ekumi yaphaama—anamukhalano achu anaya okhala veelaponi yavathi omwaahiyu.

• 

  HOKHALAVO OTHOWA WA YOOLYA

  Salumu 72:16: “Mmatxani onamukhalamo solya sintxipale, mmiyakoni onamwatxamo sawima.”

  Elapo eni enamvaha yoolya wa oothene, nave oothene anahaala okhalakano. Etala ni ohilya phaama horwa okhalavo.

• 

  HORWA OKHALAVO SAWIICELA, OTHANANA NI OKHWA

  Wupulula 21:4: “Muluku onanvuta mithori aya, nave horwa okhalavotho okhwa nari winla, nari ikutxho, nari witxela, wona wi sakhalai sòvira.”

‘ENAHAALA OKHWANIHERYEYA CHIRYENE’

Apwanne ichu soothene iha saphaama inahaala weereya? Naamwi achu ancipale yeemereryaka wi okumi ororomelihiwe ni onalociwa Mpiipiliyani ti woochuneya, mu mathowa oohiyana hiyana ancipale anoona wi muupuwelo wa okhalano ekumi yoohimala ti woovila wiiwexexa. Eyo tahi echu yootikhiniha, woona wi haavo muchu owenrye okhalano okumi ntoko yoowo wi anileele.

Achu annakhala akapuro a yoocheka ni okhwa nave annahooxeya, nave annakumanano makacamiho oohiyana hiyana mu ilukuluku sincipale ophiyerya achu ancipale anneemererya wi mukhalelo yoola wa okumi opakiwe hiiha. Nyenya owo ti woohiyanaxa ni yeeyo Mpatuxa ahu Yehova Muluku, aachuneiye wa achu.

Wi anikhaviherye othamalela ichu soothene ororomelinheiye, Muluku oocicimiherya masu awe ala: “Hanakookela wa miyo ehirino yookhumelelavo, nyenya anahaala weera chiri yeeyo kinakhwelaaka, nave enahaala okhwaaniherya chiryene mwa yeeyo kaaruminhaaka.”—Isaiya 55:11, Tradução do Novo Mundo.