‘Mwaasivele Anna Oothene’
Masu ooveereliwa a muru yoola yaarempwe waacamela iyaakha macikhwi meeli avinre. (1 Pet. 2:17) Nyenya nnaphwanela opharihela muteko hiihaano opwaha khalai! Nnii niwerye hai osivela echu etokotoko ntoko onna ahu wa elapo yoothene? Nave mu elapo yeela ehirimo osivela, nnii niwerye hai ororomela wi osivela wahu horwa omala? (Mat. 24:12) Nkoonani wakhala wi munanwerya waakhula makoho anacharela vaavaa munoonanyu eviidiyu Nossa Associação Inteira de Irmãos.
(1) Ti liini nipacenryaahu opaka makupa a onna ahu weeKiristu? (2) Miteko taani miraru nnapakaahu vamoha ni anna ahu veelaponi yoothene? (3) Annihu anooniherya hai olakelela waya olaleerya (a) mu mapuro oohikhaliwa a Alaska, (b) o porto etokotoko ya Europa, ni (c) mu matakhwa matokweene o Peru? (4) Ntakhara heeni hinnaphwanela wuupuwela wi olaleerya ti muteko phyakala? (5) Mvahe sootakiherya ti mwawiihai Anamoona a Yehova anahakararyaaya ni okhaviheryana mukina ni mukhwaawe (a) wavira ocikinyeya wa elapo, (b) yavira echeku etokotoko, ni (c) mu elukuluku ya ekhoco? (6) Mmakhalelo taani awooneya oothene hiyo nnaweryaahu wooniherya eneneeryo etokotoko ya onna ahu weeKiristu? (Yoh. 13:35) (7) Mphurelo taani wa olapa vamoha ntekaka Ipa sahu sa Omwene? (8) Annihu o Europa Oriental ni o Russiya yaavulunwe hai mmukhalelo woomunepani vaavaa muteko ahu waawateelihiwaaya? (9) Wiilipiherya taani otokotoko Anamoona ancipale anapakaaya wi eye o kongreso, nave ntakhara heeni? (10) Eviidiyu ela elipinhe hai olakelela wahu (a) wi mmulapele Yehova mmithukumano seeKiristu mwawiiwanana ni anninyu, (b) wi mwaakhaviherye akina mu ilukuluku sa makacamiho, ni (c) wi mulaleerye moororomeleya va elukuluku ni mukhalelo munaweryaanyu? (11) Ti mwawiihai nave ti liini nnaphwanelaahu opharihela eviidiyu yeela mu orummwa?
Nthowa ntokotoko nnaneeriha opaka makupa a onna ahu weeKiristu ori omusivela wahu Yehova. Mwawiihiiha ninnasivela ohuserya vooloca sa yoowo ni waahusiha akina vooloca sa yoowo. Nave ninnaasivela achu yaawo Yehova onaasiveleiye. Vaavaa nnaakhaviheryaahu awo mu ilukuluku sa makacamiho, hinnaweherya othamaleliwa ni Muluku. Moohiyana, hiyaano ninnamuthamalela Yehova ntakhara nnoona onna ahu weeKiristu ntoko yamahala yookhweleya onivanheiye. Vaavaa mahiku ookuchula a elapo ela ehirino osivela anamalaaya, hankooni ntitelele wooniherya osivela wa waataana ni anna ahu oothene!