Olaleerya Masu mu Elukuluku Yoohiphwanelela—Mwaha ola onarweela mu Anuário a Anamoona a Yehova a 2012
Epaaxina 72, eparakrafo 1-2—Indiya
ONAMOONA MUKALAPOSO. O Indiya, arokora ahu eeli yaaphariwa nthowa na olaleerya nave ewaleliwa mahiku mathanu mukalaposo. Mmoha a yaawo onnaloca: “Nimanle owaleliwa, mapilisa yaahinikoha nthowa taani naawaleliwaahu, eyo yaanivaha ekari yaphaama wi niweerele onamoona. Woona wi naaphariwe mu orummwa wa mmacani nikerihiwa opolisiya, hiyaano naakhalano irevista ni itratado sincipale. Naaweerela onamoona oothene nave naahikawa soolaleeryiwa sincipale. Naalipihana mukina ni mukhwaawe, naavekela, nave naahaalakhanya soolaleeryiwa naaryaahuno.
“Voocharela, naathaamiheryiwa o ekalaposo ekina mmucecheni. Mwawaakuveya, alipa oowaleliwa akina yaanikoha ntakhara heeni naawaleliwa. Eyo yaanivaha ekari ya waaleele yeeyo naalaleeryaahu ni wiisuwanyeiha mukhatihu ntoko Anamoona a Yehova. Namalapa mmoha a mwaamuthiyana aahiniiwa nave aahi: ‘Nyuwano muwaleliwe nthowa na olaleerya vaate, vano nyuwano munalaleerya mukalaposo!’” Arokora ahu vano anachuna waaxekurya alipa oowaleliwa oonihenrye ochuna eparipari.
Epaaxina 156 eparagrafo 1 ophiyerya epaaxina 157 eparagrafo 1—Noruega
OVOOTHA OHIPHELA WOONANARA WA IKARUMA
Xaxaxa variyari va 1989 ni 1992, Anamoona a Yehova o Noruega yaanaloceliwa masu oonanara nave yaananyemuliwa vanlakani mu ijornali, irevista, radio ni TV. Nthowa nimoha neeriha wiikariwa waari wiiwelela wahu yeeyo Piipiliya onaloceiye vooloca sa meerelo ahu ni achu anakumihiwa mmulokoni. (1 Akor. 5:9-13; 2 Yoh. 10) Nthowa na soolokoha soonanara, Anamoona yaavilela ni soohooxa mu orummwa, omutekoni, oxikola, navetho ni amusi. Naamwi oomuchara a Yesu hanatikiniheya vaavaa aniikariwaaya, mukhalelo owo hiwaari wookhweya ovilela.—Mat. 5:11, 12
“Eyo yaari elukuluku yookacamiha,” onnaloca munna, “nyenya eyo tho yaakhalano mphurelo. Eyo yaakeeriha wuuluulela mathipelo a Soorempwa a soororomela saka. Eyo yaalipiha nroromelo naka wi kuupuwelele yoolya yaphaama yoomunepani nnaakhelaahu orweela wa kapuro oororomeleya ni amiruku. Ntoko yookhumelelavo, kinuupuwela wi hiyaano noolipihiwa wi nivoothe saweeha sa nroromelo.”
“Yaari echu yoolipiha woona olipa murima wa anna ni arokora mu elukuluku yeele,” onnuupuwela ooweherya a esirkwitu. “Hiyaano naahisuwela wi echu yaphaama nahaalaahu opaka wari wiilipixerya vancipale mu orummwa wa mmacani, ophitaanyerya onamoona wa muramphani. Moohakalala, Anamoona ancipale yaaheemererya weerano.”
Epaaxina 180, eparakrafo 1—Ruwanda
Phocas Hakizumwami onnuupuwela moohakalala: “Anna a muloko wa Nyabisindu yaari oopacerya ophariwa. Woona wi akina a hiyo naahalenle nawehererya ophariwa moohilekela nari muhoolo, naanasuwela wi ekulucu ahu yaahaala otorokeya ovinya vaate va kariposo oya mpuwa mwaya. Mwawiihiiha hiyaano naahilakelela olucuwiha muteko wa olaleerya mu ekulucu ahu ya ‘vaate.’ Naanaya mapuro a musika nave naahikawa irevista ni aliivuru ancipale. Naahimveka Yehova wi anikhaviherye omaliha ekulucu ahu nihaakumve owaleliwa. Yehova aahinikhaviherya, naahimaliha ekulucu 1 Outubro 1985. Hiyaano naahiwaleliwa yaamanlaaya mahiku mathanu nameeli.”
Epaaxina 110
“Owo Aari Waarya wa Nsuwa”
WILHELM UHRE
OYARIWA1901 OPATISIWA 1949
MUKWASU WA OKUMI Mulaleeryi oohakalala naamwi arino ereca yooceecheiha misiphe.
◼ WILHELM Aakhalano ereca ya misiphe yaarakalinhe meco sawe nave waakhala woovila owo oloca. Naamwi aari hiiha, vaavaa owo iiwaleiye michaka saphaama variyari va 1930, aapacerya waaleela akina vooloca sa iparipari sootikiniha owo aahuseryeiye. Owo aanapharihela ecika awe ya mutore ya maroota mararu wi aphare muteko woolaleerya nave wiiliwiili aanaya ephareya ya Sortland, o Vesterålen, wi arumihe mu fonografo miyaha sa Piipiliya soogravariwa ni okawa soolaleeryiwa. Nthowa na oceecheya ni okhala meekheiye, Wilhelm haapatisiwe ophiyerya 1949 vaavaa owo aapatisiweiye. Nyenya owo aari mulaleeryi amvai. Ancipale yeeca waacamela eniya yaahusenrye eparipari ni yoowo, nave akina a yaawo yaakhala Anamoona a Yehova.
Vaavaa Willhelm uuluvanleiye, owo aakhala empa ya alipa wuuluvala o Tromsø. Akhaviheriwaka ni alaleeryi akina, owo aatitelela olaleerya apharihelaka miseelo. Nthowa na mukhalelo awe waphaama ni woohakalaliha, owo aari ehime ya waalipiha akina, ophitaanyerya anamalapa mu empa ya alipa wuuluvala. Vaavaa owo aakhwileiye muhooleli aaloca: “Elukuluku yoothene yaari echu yoohakalaliha ovolowa mu ekwartu awe. Nthowa na nroromelo nawe owo aari waarya wa nsuwa.”