Muhipe Murima—Mwaha ola onarweela mu Anuário das Testemunhas de Jeová de 2013
Miyanmar
Epaaxina 138, eparakrafo 3 ophiyerya epaaxina 139, eparakrafo 3
Ohihiya Mithukumano Seekiristu
Ntoko yawooniherya, muthokororye yaweereya ya Cin Khan Dal, yoowo aakhala ni echoko awe mmuceche wa Sagaing. Owo onnaloca: “Hiyaano naachuna oya o kongreso a edistritu o Tahan, mukwaha wa mahiku meeli ni mwaaceya ni ekaaro. Nyenya haavovo aya ohala wi aakhapelele anakhu ahu nri ocai. Hiyaano naamuroromela Yehova nave naaphiya o kongreso. Naachikenlaahu owaani naahoona wi yaarimeela anakhu 19—waari oyeleela otokweene. Nyenya, eyaakha emoha ohoolo, epara ahu ekhaani ya anakhu yaahaaca opwaha anakhu 60. Nave naamwi achu ancipale mmuceche owo yaahaayeleela anakhu aya muyakha yoole nthowa na ecikopa, anakhu ahu hiyaakhwile nari mmoharu mano.
Mutheli mukina aari oolipa mmunepani aari Aung Tin Nyunt ni mwaariye, Nyein Mya, yaawo yaakhala ni anamwane aya athanu naxexe o Kyonsha, muceche mukhaani ikilomeeturu 64 o moko wa Yangon. Aung Tin Nyunt onnaloca: “Yoolya ya echoko ahu yaari mvuka ni makukhu. Hiyaano hinaarino ikhorowa nari mano echu ya okuliha. Naari hiihaa hinaakhala oohaleeliheya. Kaahileela echoko aka: ‘Yesu haarino nipuro na ohelavo muru awe. Wakhala wi kinahaala okhala vathi va mwiri nari okhwa etala, miyaano kinahaala otitelela omulapela Muluku moororomeleya.’
“Nyenya nihiku nimoha, yoolya ahu yaahimala. Mwaaraka ni anamwane aka yaakivarerya ni ithoi sawuukhuwa. Kaahaaroromeliha, ‘muhuukhuwe, Muluku onahaala onikhaviherya.’ Nimanle olaleerya wooxixelo woothene, kaahaakuxa anamwane aka wi namese ihopa. Naaphanre ihopa sa yoolya emoha pahiru. Naahiya soomesano sahu omuhiceni, vakhiviru va malaxi a mmaahini, kaahaaleela anamwane aka: ‘Hiyaano nnahaala okooka, wamala muthukumano.’ Oxekuwa yoole yaatepa woopa echeku. Vaavaa naakonkaahu naahoona wi ihopa sincipale saari vathi va manaxi a mmaahini, saavyaka voochawelavo nthowa na echeku. Hiyaano naahireya soomesano sahu nave naaphara ihopa sincipale, naatumiha seiyo nithuma yoolya ya esumana yantero.”
Itila sincipale, arummwa a Yehova o Miyanmar aalawiha okhwaaniheryeya wa yoolaiherya ya Muluku enalipiha murima: “Nkirwa kohiyaru nari, nari woriha.” Mwawiihiiha awo annaloca: “Mulipa-okikhaviheryaka ti Apwiya; nkirwa-kóva; Mutchu ani arwe-akerele sheni?”—Ahe. 13:5, 6.