Okhalano Moonelo wa Soorempwa wa Ovitha Muruchu​—Nikupa 1

¹ Mu mwaha woothene, achu annahooxeya ni wiicela wa okhwa. Achu a Muluku tho annahooxeya. Moolikana ni Yesu, Akiristu eeparipari annathanana vancipale vaavaa onakhweiye nthamwene nari mmusi. (Yoh. 11:33, 35) Ovilela okhwa wa oosiveliwa ti nikacamiho, nave alipa ookhweliwa annachuna ohakararya ni nikhaviheryo nahu noosivela. Ela ti yookacamiha xaxaxa mmapuro mancipale weiwo malavi ni owoova achu ookhwa onavolowelaaya mwakuru okumi wa nihiku nnihiku. Mmapuro yaawo, Mukiristu poti okhinyereryiwa ni amusi oohiroromela ni amwaacamani wi apake sookhovelela sa ovitha muruchu sihiniiwanana ni soorempwa. Nnii niwerye hai ovilela othanana wa okhwa nihipuruliwe opaka saweera ni sookhovelela sa ovitha muruchu seiyo sinamunanara Muluku?

² Osuwela Eparipari Vooloca sa Okhwa: Piipiliya mookhweya onnaloca: “Akumi annasuwela wi anamukhwa. Nto akhwile hanasuwelaru etxhu . . . Okhwelana waya, ohikhwelana waya ni ehatxhe aya inamala ni okhwa . . . Mmahiyeni honeriwamo etxhu nave mwemmo hiwamo wupuwela, osuwela ni miruku. Nave ti mwemmo onayàwemo.” (Ekle. 9:5, 6, 10; Sal. 146:4) Vaavaa muchu onakhweiye, owo hanasuwela echu. Owo hanawerya wuupuwela, hanawerya oloca, nave hanawerya wiiwexexa yeeyo akina analocaaya nari aneeraaya. Wa Akiristu eeparipari, ela eparipari yoopacerya ya Piipiliya yeeyo enavolowela moonelo aya ni meecelo aya vaavaa nnakumanaahu ni okhwa.

³ Mwiikasope wa Nihusiheryo Nnamunyemula Muluku: Mu emaca ya Eeteni, Yehova aamuleela Aatamu ni Haava wi awo yaahaala ‘okhwa chiri‘ yaahiiwelela nlamulo Nawe. (Map. 2:17) Nyenya, Satana, aahaaleela awo wi yaahimwiiwelela Muluku ‘hekhwaru.’ (Map. 3:4) Muhoolo Satana aapaceryiha yawootha ekina: Owo aaloca wi alipa ookhwa hakhwile nyenya wi awo annasuwela echu nave ari akumi mu elapo ya minepa. Yawootha ela yoomunyemula Yehova nave yooruuha munyemu wa nsina nawe. Wa alapeli a Yehova, yoororomela yawi alipa ookhwa annasuwela echu nave annawerya ovolowela okumi wa achu akumi nihusiheryo nawootha. Ti ekaruma etokotoko yeeyo Satana onaphariheleiye wi aahuwelihe achu ni okhuwa eparipari ya Piipiliya. Nla nihusiheryo nenlo alipa oomusivela Muluku oothene anaphwanelaaya wiica chiryene. (Arom. 12:9) Nyuwano munniica?

⁴ Yehova aahaalamulela Aisarayeli wi emwalane moomalela ni sookhovelela soothene sinapharihana ni yoororomela yeela yawootha. (Malam. 18:9-13) Moolikana Akiristu a nsana noopacerya yaanasepa sookhovelela soothene sinapharihana ni yeeyo. (2 Akor. 6:15-17; Yaw. 21:8) Anamoona a Yehova olelo, moohipwacha nloko naya, nihimo, nari mukhalelo, anniica tho sookhovelela soothene seiyo siniiwanana ni yoororomela yawi alipa ookhwa annasuwela echu nave annawerya waavolowela achu akumi.

⁵ Waalikhela Soororomela: Soorempwa sinnooniherya wi tahi sookhovelela soothene sinapharihana ni yoororomela yeela yawootha. Ntoko yawooniherya, muruchu wa Yesu, ‘waahuruweliwa ni ikuwo sa shúkha vamoha ni sawunkhela, ntoko mwa makhalelo a aYuda a ovitha murutchu.’ (Yoh. 19:40) Nyenya, sookhovelela sikina, seiyo saapharihana ni yoororomela yawi alipa ookhwa nlelo akumi saanakhoociwa moomalela ni achu a Muluku. (Onam. 21:5; 19:27, 28; Malam. 14:1, 2) Veelaponi yoothene olelo, mihapo ni saweera sincipale vooloca sa okhwa sinniiwanana ni yoororomela yeela. Mmosampike tho enneereya. Ti wookhweleya vancipale wa hiyo ovyakiha ‘masuwelelo ahu ohiyaniha yaphaama ni yoonanara.’(Ahe. 5:14) Ela enahaala onikhaviherya osuwela sookhovelela siniiwanana ni eparipari ya Piipiliya ni seiyo sihiniiwanana. Malakiheryo taani a Piipiliya anawerya onihoolela mmwaha yoola?

⁶ Opharihela Malakiheryo: Yaale anachuna mahala a Muluku hanaphwanela omakiwa mu nipisi ni oohiroromela. Mu Piipiliya, hiyaano ninnaleeliwa: “Khumani véri vaya, nave mwalanani, ani Apwiya, nave muhitannye etchu yothanyiwa.” (2 Akor. 6:14, 17) Nuupuwelaka nlakiheryo nenla, hiyaano nnaphwanela wiikoha mukhatihu, ‘Yookhovelela yeela ya ovitha muruchu ennapharihana ni yoororomela yawi minepa sa alipa ookhwa sinnavolowela okumi wa achu akumi?’ Opharihana iwo waahaala weeriha yookhovelela eyo okhala echu ekina ohiya wooniherya othanana pahiru. Eyo yaahaala okhala yaweera ya malapelo oowoka. Yaweera eyo yaahaala okhala yoocheka wa Yehova, yooheemereryiwa ni Muluku a eparipari.​—Mulikanyihe Juizes 2:12.

⁷ Nlakiheryo nanawiili nnaphwanyeya mu 1 Akorinto 10:32: “Khalani óhikwachuliha, nari aYuda, nari aHelene, nari muloko wa Muluku.” Nlakiheryo nla nnaphwanela ophariheliwa hai? Anamoona a Yehova annasuweliwa phaama wa ohusiha eparipari ya Piipiliya wi alipa ookhwa hanasuwela echu nave wi hanawerya waakhaviherya nari waapahula achu akumi.Tiheeni yaahaala weereya wakhala wi muchu a mmulokoni ohuuka yookhovelela yeeyo enapharihana ni owoova alipa ookhwa? Wuuka wawe yookhovelela yeeyo yaahaala waakwaculiha yaale anasuwela yeeyo Anamoona a Yehova aneemereryaaya ni anahusihaaya vooloca sa alipa ookhwa. Owoona akina ekwaculiwaka ennamuthananiha Yehova nave ennawooceeliha achu waakhela muchaka wa Omwene.​—Mat. 18:6; Luka 11:52.

⁸ Mwiice Yeeyo Eri Yoonanara: Vaavaa oohiroromela anapakaaya saweera seiya, awo hanasuwela wi anapaka malapelo awootha. Nave wiiliwiili awo haniiwexexa okhooca wahu wuuka mihapo soonanara. Mwawiihiiha, wooniherya moonelo ahu mmwaha yoola, poti ovila nave poti weeha osivela wahu wa Yehova ni ororomeleya wahu wa yoowo. Nyenya, hiyaano nnachuna okhala “óhitcheka ni épariapari, . . . óhikhalano murala.” (Afil. 2:15) Osivela wahu wa Yehova onnaneeriha ‘wiica yoonanara ni waakeelela yaphaama.’ (Arom. 12:9) Hiyaano ninnasuwela phaama wi yaahaala okhala yoonanara, nari yoowoka, wa hiyo wuuka yaweera eri yoothene enapharihana ni yoororomela yawi alipa ookhwa nlelo annasuwela echu nave annawerya waavolowela achu akumi. Mu ekamaama ya malakiheryo yaala, hankooni naalikhele phaama sookhovelela ikina sawunlaana mu mukuma ahu.

Sookhovelela sa Ovitha Muruchu

⁹ Orehererya Muruchu: Poti weereya wi muruchu orapihiwe ohaakumve ovithiwa wi okhale waweela. (Saw. 9:37) Nyenya, honaphwanela okhalavo opharihana ni yoororomela ehiniiwanana ni soorempwa yawi muchu hanakhwa ntoko muhapo wa omurehererya mulipa ookhwa wi aakhele okumi ‘mu elapo ekina.’

¹⁰ Mmapuro makina yookhoveleliwa wi achu oothanliwa a emusi erehererye muruchu wi wavithiwe. Wakhala wi mulipa ookhwa owo Mukiristu, nnaphwanela wiikasopa wi amusi oohiroromela ehikuxe muruchu ni opaka mihapo saya soonanara wiiphini. Chiryene eyo yaahaala okhala echu yeeyo munna nari murokora ahu ookhwa owo aahaaleiye okhooca. Nyenya, wakhala wi amusi annaakeelela okuxa muruchu moohipwacha wiilipixerya wahu, nnaphwanela wiikasopa wi nihivolowele saweera saya soonanara. Nave hiyaano poti ohakararyeya va osuwela wi oohiroromela awo hanawerya weera echu enahaala ovolowela okumi wa omwaahiyu wa oosiveliwa ahu. Munna nari murokora owo aakhwile ari oororomeleya nave ori awiichaala mmuupuwelo wa Yehova.

¹¹ Okhunula Muruchu wi Wooniwe: Okhunula muruchu nari hooye wi wooniwe yoolakelela ya muchu mukhateiye. Wakhala wi amusi aathanla opaka yookhovelela yeela nthowa na olakelela waya, awo hanaphwanela waakaahiwa. Wakhala wi aalakelela okhunula muruchu wi wooniwe, ennaphwanela wuupuweleliwa phaama wi yeeriwano mmukhalelo onooniherya ncicimiho wa soororomela Seekiristu.

¹² Mmapuro makina, ti yawunlaana okumiha muruchu mu ekaxawu ni oheliwa va munlini wooreera. Muthiyana ookhwa poti owarihiwa evestido yaweela ya othela ni ichu sooreera, epweto, ni sawiicikichela. Yookhoveleliwa opaka malaya, ilenso, mikhova, akoopho, ni ichu ikina ni eruku ya mulipa ookhwa owo. Ichu seiya sinnapakiwa nave sinnakaiwa wi siwariwe nave iteexiwe va ovithiwa. Ifootu ikhaani sa muchu owo sinnapateelihiwa mu soowara sa yaawo ari vaava. Waahaala okhala wa miruku ochara saweera seiyo sa elapo? Hooye. Chiryene, eyo eneemelela olapela soophwaniherya sa muchu owo okhwile.

¹³ Naamwi Piipiliya hanaloca ichu soothene sa marehereryo a ovitha muruchu, yaale arino ekamaama yoomunepani annasuwela wi wooseela ichu ‘honarweela wa Atithi nyenya weelapo.’ (1 Yoh. 2:15, 16) Ochara saweera seiyo yaahaala waatuunyerya oohiroromela opaka saweera soonanara, ntoko wunla woohikhala mphimo, ohela ikhorowa ni ichu ikina va muruchu, okhupaarela muruchu ni olocano ntoko mukumi. Wakhala wi ela yoheereya va ovitha muruchu wa Mukiristu, yahaala onyemuliha vancipale nsina na Yehova ni achu awe. Chiryene, osepa sookhovelela seiye siri sawunlaana, inapakiwa ni yaale ari mu epiphi yoomunepani ti mukhalelo waphaama wa otitelela okhalano meecelo oomaala, a ncicimiho, oophwanelela wa Akiristu eeparipari.​—Aef. 5: 15-17.

¹⁴ Okoneleliwa Muruchu: Okoneleliwa muruchu ti othukumana oneeriwa veechokoni va mulipa ookhwa nari nipuro nikina wi olipeleliwe muruchu ohiyu woothene ohaakumve ovithiwa. Okoneleliwa muruchu onapacerya waaxekuwakavo nave onatitelela ohiyu woothene. Yookhovelela yeela henaphwanela waapanyeryiwa ni oxekurya echoko yoothanana va elukuluku yoophwanelela wi naavahe nihakararyo ni wooniherya othanana. Wuuka mu okoneleliwa muruchu echu yoohiyana. Wiiliwiili muruchu onnaruuhiwa veechokoni, nihiku nimoha ovitha ohaakumve. Achu annathukumana wi emalihe ohiyu yiipaka, evekelaka, nave emuthamalaka mulipa ookhwa owo. Eneemereryiwa wi yaweera ela ti yookhweleya wa okhapelela muruchu ohivithiwe ni amusi ahanle wa minepa yoonanara. Woona wi yookhovelela yeela enapharihana ni yoororomela yawi munepa wa mulipa ookhwa owo nlelo wookhala, Akiristu eeparipari mwa miruku anakhala ocai wa mihapo seiyo sa okoneleliwa muruchu sihiniiwanana ni soorempwa. Wuuka okoneleliwa muruchu, nari elukuluku tonto, hiyaahaala wiiwanana ni yoolakelelaahu ya ‘wiica yoonanara.’​—Arom. 12:9.

¹⁵ Vaavaa muchu a mmulokoni onakhweiye, nnaphwanela wiikasopa wi nihooniherye wi nnapaka mukhalelo ahu wa okoneleliwa muruchu. Ntoko yawooniherya, tiheeni yaahaala wooniwa, wakhala wi Anamoona aathukumana orivo muruchu ohiyu ovitha ohaakumve nave emaliha iwora sincipale yiipaka ni evekelaka? Naamwi awo erino mathowa aphaama, awo anaphwanela othokororya yawuupuxerya-ya-murima ya akina. (1 Akor. 10:23) Opaka yaweera yeela ohiyu yaahaala waakwaculiha anna, yaawo anasuwela mapacereryo a mihapo sa okoneleliwa muruchu? Achu oohiroromela yaahaala woona wi anamoona a Yehova, ntoko malapelo makina mancipale, annapaka okoneleliwa wa muruchu? Chiryene, sookhalavo ikari sincipale ikina saphaama sa ovaha onamoona ni waahakararya yaale anathanana nthowa na okhwa. Wuupuwelela malakiheryo yaala enaphwanela oneeriha osepa echu eri yoothene yeeyo yaahaala wooneya ntoko muhapo wa okoneleliwa muruchu. Weerano hiihaa yaahaala wooniherya wi hiyaano nri oohiyana ni elapo nave nri oolakelela omwalana ni “etchu yothanyiwa.”​—2 Akor. 6:17; Malak. 3:18.

¹⁶ Wookhalamo miruku sincipale mu yoolopola: “Muchu a miruku, onnona yawopiha, ipitha, ohirino miruku onnaya oholo, ùwela motakhaliwani.” (Masi. 22:3) Nlakiheryo nenla na Piipiliya ti neeparipari vooloca sa okoneleliwa muruchu. Saweereya sinnooniherya wi oruuha muruchu owaani nihiku nimoha ohaakumve ovitha ennatannya makacamiho. Makacamiho awaacereryeya annaphacuwa wakhala wi muruchu okerihiwe veechokoni va amusi oohiroromela. Nthowa na muruchu okhala veechokoni, amusi ni amwaacamane poti okhala oolipa nave woona okhala wookhweleya othukumana wi yiipe ni ovekela ohiyu woothene wi elipelele muruchu. Okoneleliwa muruchu onnatitelela ophiyerya ovithiwa muruchu. Wi nsepe yeela va ovithiwa wa Mukiristu, echoko yoororomela enaphwanela wuupuwelela phaama vooloca sa elukuluku awo anahaalaaya oruuha muruchu veechokoni nari va nipuro nikina. Wakhala wi ti wookhweleya wi muruchu oruuhiwe veechokoni, waahaala okhala wa “miruku” weerano hiihaa va nihiku na ovitha ohiya nihiku nikina. Chiryene, eyo poti okhala yoovila ni yookacamiha, nyenya yarehereryiwa phaama ni wiiwanana, eyo poti weereye. Mmukhalelo yoola hiyaano poti osepa waakwaculiha akina.​—Masi. 22:3.

¹⁷ Miseelo sookhweleya vooloca sa saweera sa ovitha muruchu inahaala othokororyiwa mu Orummwa Wahu wa Omwene mu miyeeri inoorwa. Miseelo seiyo inahaala waakhaviherya oothene osuwela ti mwawiihai ntoko Akiristu nnaweryaahu otitelela okhalano yawuupuxerya-ya-murima yaphaama ni osepa waakwaculiha akina vaavaa nnatitelelaahu okhalano moonelo wa Soorempwa wa ovitha muruchu.​—1 Akor. 10:32.