Masu a Muluku Ari Awuupa​—Mwaha ola okuxiwe mu Anuário das Testemunhas de Jeová de 2013

Asiya

Epaaxina 57, eparakrafo 1 ophiyerya epaaxina 59, eparakrafo 3

Mulopwana aawara ikuwo seethiyana onnapaka matorokelo

Rek ophuiwe va emusi phyakala o Camboja, nyenya owo vamoha ni munnawe aayariweiyeno ntoko maphapo, opacerya eri anamwane yoona wi yaari athiyana. Awo yaanathata ni aboneka nave yaanasiveliwa owara ikuwo seethiyana. Amama aya yaanakacamiheya nave yaanuuliwa muru nave hiyaasuwela yaweera. Awo yaakhuma vaate ewanre ikuwo seelopwana, nyenya ehalaka ophiya oxikola yaanawara ikuwo seethiyana. Vaavaa yaaryaayano iyaakha 16 sa oyariwa, maphapo awo yaahiirepiha mu konkursu a ophwaneliwa wa alopwana anawara ikuwo seethiyana, nave yaasuweliwa ni industria ya othata. Yaaphiyerya owompwa wi epake makupa mu iprograma sa televisau ni iteatro sootheiha. Mu elukuluku vakhaani Rek apacerya okhalano meecelo a okonihana alopwanaru nave aapaka onthamwene ni akina tho yaawara ikuwo seethiyana.

Amama awe yaapacerya oya okerexa nave yaanamukhinyererya Rek wi eyeno vamoha. Owo aaheemererya owara ikuwo seelopwana, nyenya aakhooca okwasa maihi oorakama. Muhooleli ookerexa aanamukohakoha nave anamunyemula nthowa na meecelo awe. Naamwi hiiha, Rek oona wi yaari yaphaama omuhuserya Piipiliya okerexa. Esumana yoopacerya, owo aahipeherya eeciha ecika ikilomeeturu sincipale ayaaka okerexa, nave muhooleli haachuna omuhusiha nave aahaavya nthowa. Esumana yanaawiili, muhooleli haaruule, nave Rek aanyeenyeya vancipale.

Nyenya vaavaa Rek aakookenleiye owaani, munnawe aahimuleela wi muthiyana mmoha aahimvaha yoohuserya ya Piipiliya yamahala. Muthiyana owo aahimuhiya liivuru Piipiliya Onahusiha Eheeni Chiryene? Maphapo awo yaapacerya ohuserya ni murokora ni iyawe. Imanle miyeeri mithanu nammoha, munna a Rek ahoona wi haawerya opaka matorokelo wi atoroke meecelo a okumi awe, nave owo aahiya ohuserya. Nyenya yoorepa ya 1 Akorinto 6:9, 10 yaahimvolowela vancipale Rek, nave owo aahoona yeeyo aaphwaneleiye weera. Moorweela wa ohuserya wawiiseela, omwaalakhanya Piipiliya, ovekela ni ophiya mmithukumano, saamweeriha Rek weeliha okumi awe. Amama awe tho annahuserya nave annaya vahoolo. Vaavaa Rek aapatisiweiye, amama awe yaahiloca ni miithori mmiithoni mwaya, “Miyaano koohakalala omoona mwanaka apatisiwaka ntoko mulopwana.” Vano owo onarumeela ntoko piyoneero a elukuluku yoothene.

Namuku Onnatoroka Mukhalelo Awe

Or-Ya aari namuku ooloola, ni oolaka ni namaloherya sa muhoolo. Mutheli a mapiyoneero avameekhaaya yoowo aarumeela o Haifa, Israel aaloca ni yoowo alaleeryaka empa ni empa. Owo aahaaxeliha ni masu: “Mwarwenle oloca sa Muluku poti ovolowa.” Empa awe yaasareya ni mirece sa onamulosiwe. owo ahiloca ariki aanaakhela miseelo sa Muluku, mikina moorweela wa “munepa” wa namiruku yoowo aakhwile.

Or-Ya aahakalala vaavaa aavahiweiye yoohuserya ya Piipiliya mu Piipiliya Onahusiha Eheeni. Mahiku meeli oculi, owo aahimveka Muluku wi amurumihe muchu wi amuhusihe Piipiliya ohirivo ovolowela wa anamiruku yaawo yaakhwile. Mpuwa mwa mweeri mmoha ahuseryaka, owo aahikoha: “Aakhalavo achu akina arino soororomela ntoko sannyu?” Or-Ya aaya omuthukumano wa muloko nave aatikiniheya vancipale ni moota aakheliweiye. Opacerya vaava, owo aanaya mmithukumano moohihiyererya.

Saamanlaaya miyeeri miili ahuseryaka, Or-Ya aakoha: “Achu anapatisiwa o asembleiya? Vano mookhalano miyeeri miili wi mukireherye wi kapatisiwe!” Ntoko echu yoopacerya, owo aariha ichu soothene sa onamulosiwe, seiyo saari sa esisapo yoowalamela nave aahiya olapela, nave voocharela aapacerya ovaha onamoona ampharihelaka Piipiliya Onahusiha Eheeni ni irevista wa yaawo aawaapeeleiye. Vaavaa iiceliweiye aahikhooca opharihela mirece sawe sakhalai. Nthowa na ohiya muteko awe, Or-Ya aahikhala miyeeri mixexe ahirino ikhorowa. Naamwi hiiha, wi iivoliherye mmiteko soomuluku, owo aalakelela wi onahaala weemererya muteko​—wa mahiku maxexe va esumana, ni wa iwora thanu nammoha khata nihiku. Nave vookuchula vaya, aaphwanya muteko woophwanelela. Voocharela aatumiha empa awe etokotoko nave aapoleya empa ekhaani.

Voovira wa elukuluku Or-Ya aaphwanelela opatiso, nyenya esumana emoha ahaakumve asembleiya Or-Ya aahinteeya mweco. Ahikururyen’ye Or-Ya aapatisiwa ni mweco woomakiwa. Olelo Or-Ya mulaleeryi amvai. Or-Ya onnavaha onamoona wa yaale aawaapeeleiye nave onneeciha soohuserya sa Piipiliya.