Okhalano Moonelo wa Soorempwa wa Ovitha Muruchu​—Nikupa 3

Ovitha Muruchu Weekiristu​—Wookhweya, Waphaama, ni Woocicimiheya

¹ Yaale ahiniiwexexa mukhalelo weeparipari wa alipa ookhwa, anneemererya wi makhalelo matokotoko ni ootikiniha a ovitha muruchu tookhweleya wi emuhakalalihe ookhwa nave wi owo ahiweerele yoonanara amusi ari akumi. Wa oohiroromela, opaka “woselela okumi” wa sookhalano sa mulipa ookhwa nari sa amusi awe ti yookhweleya. (1 Yohane 2:16) Wiiliwiili munepa wa owanawana ohiri weekiristu onniikhalela weiwo ancipale aneereryaaya ovirelela mukhalelo wa akina wa ovitha muruchu. Mwawiihiiha mwaha ola onnavahiwa esisapo yawaaca ophiyerya wi, naamwi mu imusi soohaawa sinniivoliiherya mu makacamiho a ohikhalano ikhorowa nave annateteiwa wi epake “ovitha muruchu otokotoko” wi ehakalalihe soowehererya sa amusi ni achu a muceche.

² Moohiyana, achu a Muluku anniiwexexa phaama wi alipa ookhwa hanasuwela echu, nave wi hanasuwela wi annacicimihiwa ni othamaleliwa ti akina. Akiristu eeparipari hanapaka marehereryo a ovitha muruchu a waatikiniha akina. Wakhala wi hiyaano ninnatakiherya meerelo yaawo, soororomela sahu sahaala ohiyana ni sa elapo? (Yohane 17:16) Hinnahaala waavaha akina muupuwelo wa wii hiyaano ninnawoova alipa ookhwa? Osuwela wi owoova alipa ookhwa ori mpuwa mwa yookhovelela ya vanipuroni ni okumi wa achu, yahaala oneeriha okhalano ephoole ni woona ochuneya waya opaka marehereryo a ovitha muruchu ookhweya, ni oocicimiheya. (Masi. 11:2) Eyo eni yeeriweno hai?

³ Ikhorowa sa Ovithano Muruchu: Mmapuro makina, ovitha muruchu ohaakumve, onnapakiwa muthukumano wi ithukumanyiwe ikhorowa wi ovithiwe muruchu. Ikaarata sinnarumihiwa ivekaka ikhorowa. Akina annathukumanya “ikhorowa sa ovitha muruchu” wi ekhaviherye ovitha muruchu. Va makhwelo, onnaheliwavo meesa nari ikaaxa sa sooveleela soovaha ntoko mukhalelo wa othukumanya ikhorowa inarweela wa soovaha seiho. Saweera seiha inaphwanela wooniwa mwawiihai? Akiristu eeparipari hanaphwanela oveka ikhorowa sa ovitha muruchu mu makhalelo ntoko yaala.

⁴ Emusi yeekiristu enaphwanela osuwela wi terino murici wa waakhwaniherya soothowa sa ovitha muruchu.a Wakhala wi emusi chiryene hiyaano owerya wa olivela ovitha muruchu wookhweya, mwawiihiiha ahima akhweya ananwerya okhaviherya.b (1 Tim. 5:3; Moone od-T epaax. 132, epar. 1) Wakhala wi nlelo sookhalavo soothowa, achu akina nari muloko poti ovaha nikhaviheryo. (1 Yohane 3:17, 18) Nave, ti woochuneya okhalano ephoole. Vaavaa amusi oohiroromela anakohaaya vooloca sa sooveleela sa ovitha muruchu, awo anuupuwela wi aakhalano owerya wa oloca moota owo onaphwanelaaya orehereryiwa ni weecihiwa. Eyo enanwerya okumiherya makacamiho matokotoko vaavaa nneereryaahu opaka marehereryo a ovitha muruchu ohinavolowela meerelo ooriipiha. Ela henataphulela wi Mukiristu onaphwanela okhooca soovaha soothene soohivekiwa hiiho inarweela wa amusi. Nyenya wakhala wi mukina onoona wi waakhela sooveleela inahaala okumiherya ovolowela wa oohiroromela nari ochuna waya ohoolela makupa a ovitha muruchu, mwawiihiiha, yoovaha eyo enaphwanela okhoociwa mwa miruku.​—Masi. 27:12.

⁵ Wiiwexexa wahu phaama mukhalelo wa alipa ookhwa onaphwanela onivaha olipa murima wi neecihe ovitha muruchu ohirino mukhalelo pure wa yookhovelela ya elapo yeeyo eri yawunlaana veeri va yaale anamwiiwexexa vakhaani Piipiliya. (Aef. 4:17-19) Hiyo hinnachuna waakwaculiha akina moorweela wa ovirelela mukhalelo wookhweya, niheemererye wi elapo enikhinyererye waatakiherya yaale ari mu epiphi yoomunepani. (Arom. 12:2) Nuupuwele wi Yesu ari muchu mutokweene yoowo aakhanle, nave owo aavithiwe mmukhalelo wookhweya ni woocicimiheya. (Yoh. 19:40-42) Wa yaale arino muupuwelo wa Kiristu, weerano mmukhalelo woolikana tahi yawuuliha muru. (1 Akor. 2:15, 16) Mwawiihiiha wi esepe oveka sooveleela soovaha, waapoleya akina, nari opaka evaale, emusi Yeekiristu enaphwanela mwa miruku opaka marehereryo ookhweya aphaama, ni oocicimiheya mwa wiiwanana ni yeeyo awo anaweryaaya okhalano.​—Luka 14:28; Mulikanyihe 2 Akor. 8:12.

⁶ Weeciha Muteko Wa Ovitha Muruchu: Woona wi michaka vooloca sa okhwa sinneeca mwawaakuveya, mwawiihiiha hori woochuneya olokoha okhwa ni marehereryo a ovitha muruchu otribuna wa muloko mukina ohiya mmuloko mulipa ookhwa owo aathukumaneiyewo. Tahi woochuneya tho orumiha ikaarata wa miloko mikina ni yoochuna yeela. Chiryene, waahaala okhala woohiphwanela ohipaka nari otoroka mithukumano sa muloko nthowa na miteko sa ovitha muruchu. Moorweela wa okuha mpuro woopacerya miyaha soomunepani, ninnakhaviheryiwa okhalano moonelo waphaama wa okhwa ni otitelela okuha mpuro woopacerya soochuna sa omwene mu ikumi sahu.​—Mat. 6:33, 34.

⁷ Vaavaa mansiau a muloko aneemereryaaya, mwaha wa mPiipiliyani poti orehereryiwa o Empa ya Omwene nari wakhala wi amusi aheemererya, mwaha poti weeriwano vaate va mulipa ookhwa nari nipuro nikina. Namaloca othanliwe ti amusi akhweliwe, ikwaha soothene onaphwanela opharihela mwaha orehereryiwe ni marehereryo a Anamoona a Yehova. Mwaha wa ovitha muruchu onaphwanela okhala woohakararya, ni woolipiha omunepani. Namaloca onaphwanela wooniherya iponto sa mwaha nave hanaphwanela ophitaanyerya mwaha pure onarweela mu soororomela satheru. Ntoko yootakiherya, oloca wi okhwa onarweela mu wuulumeliwa nari oloiwa honarweela mu eparipari ya Piipiliya nave, eyo yahaala ovaanya owerya wa Yehova wa owaakiha akapuro awe. (Masi. 18:10) Namaloca onaphwanela okhalano ephoole wi yeeyo owo onaloceiye mu mwaha nari mu nivekelo ehivahe muupuwelo wawi onamulocela mulipa ookhwa ntoko wi nlelo mukumi. (Ekle. 9:5, 10) Vaava kapuro oororomeleya a Yehova onakhweiye, namaloca poti ophitaanyerya mwaha wawaakuveya wa okumi awe ni ororomeleya wawe variyari va okumi awe. (Ahe. 6:12) Yahaala okhala yoohiphwanelela, weemererya wi achu ekhale a weemela elukuluku ya ovitha muruchu ni ovaha yooveleela nari nthamalelo ohaakumve ovithiwa muruchu, mu elukuluku ya ovitha muruchu nari omanle ovithiwa muruchu.

⁸ Ennakhala yookhovelela ya anna othukumana o Empa ya Omwene va nihiku na ovitha muruchu wi yiipe macipo a Omwene iwora sincipale ophiyerya eprograma opacerya. Macipo a Omwene poti ophariheliwa wi opaceriwe nari okuchuliwe mwaha wa ovitha muruchu, opwaha yeeyo, yaahaala wooneya wi nnaatakiherya akiristu oowoka wakhala wi nikhuuru na anna noothukumana nave nniipa elukuluku yincipale mwaha wa ovitha muruchu ohipacenrye. Eprograma ya ovitha muruchu wiiliwiili henavirelela aminutu 30 nave enaphwanela opacerya mu elukuluku. Opaceryiha mwaha wa ovitha muruchu ni nivekelo ti yoothanla. Hori woochuneya ompharihela muhooleli a nikupa wi apacerihe nari akuchule mwaha wa ovitha muruchu. Wakhala wi onnaphariheliwa muhooleli a nikupa, sooloca sawe inaphwanela okhala vakhaani nave sooluluwanya eponto. Hori woochuneya wuuluulela iponto hiiho ilociwe ti namaloca nari ovaha “nthamalelo” wa alipa oowiriyana. Muruchu wamala ovithiwa, poti ovahiwa ikomentaario vakhaani otakhwani wi okuchuliwe muteko, wakhala wi amusi annachuna. Ntoko yawuupuxerya, oohiroromela hanaphwanela opaka makupa mu weeciha nari oloca mu nikupa nimoharu mano na muteko o Empa ya Omwene nari otakhwani.​—2 Akor. 6:14-18.

⁹ Okhalano Moonelo Waphaama: Tuuvi onaphwanela okhala moonelo ahu vaavaa nnayaahu omakhwelo? Vaavaa murima ahu onakhalaaya woothanana, hiyo ninnachuna okhala oohakararyiwa moorweela mu Soorempwa. Mwawiihiiha, yaale anaya omakhwelo wiiliwiili anaphwanela wuupuwela omuruuha Piipiliya aya. Omuchariha namaloca vaavaa onaalakhanyeiye ni otaphulela soorepa sa Piipiliya ennateka nroromelo nahu na yoororomeliha ya omwaahiyu ya ovinya mookhwani vaavaa okhwa onahaalaya omala. (Yaw. 21:4) Hiyaano nookhalano ekari yaphaama ya wuuka masu oohakararya ni emusi ekhweliwe ni ooxekurya akina. Vaavaa nnakhalaahuno moonelo yoola waphaama, ninnawerya ohiya pahiru waalipiha akina nyenya tho ninnamaaliha othanana wahu moorweela wa wiikhalela mu yoowehererya yoohakalaliha ya omwaahiyu vaavaa okhwa onahaalaaya omala.​—Yes. 25:8.

¹⁰ Ancipale annoona wi othanana wawaaca onnooniherya othamalela, ncicimiho ni omusivela mulipa ookhwa owo. Ntoko yookhumelela, mu elukuluku ya mwaha wa ovitha, nari otakhwani, mukina poti moohiithokororya opacerya ohihimerya, wuupureya nari olocela ekaxawu ntoko wi mulipa ookhwa nlelo mukumi. Akina annakuxeya opharela muruchu, weererya ocuphela mu ekaxawu nari weererya ophitaana ni mulipa ookhwa mu mahiye a oosiveliwa aya. Mwawiihiiha okhwa elukuluku ya othanana otokweene wa hiyo oothene, achu a Muluku hanooniherya othanana woohiphwanelela. Ntakhara heeni? Ntakhara wi hiyo hanri oohisuwela sa yaale anarupa mookhwani. Hiyo hanri oohaleeliheya vooloca sa mukhalelo wa alipa ookhwa. Hiyo nookhalano ewehereryo yeeparipari ya ovinya mookhwani. (Yoh. 5:28, 29) Ninnaphwanya olipihiwa moorweela wa yoowehererya yeela, mwawiihiiha nihikhale “awiniwa murima, ntoko yale ahiri ni owehererya.”​—1 Ates. 4:13, Bibiliya Nsu na Muluku.

Ohoolo wa Sookhovelela sa Ovitha Muruchu

¹¹ Muruchu wamala ovithiwa, ovitha woomala. Hiyaavo echu ekina enahaala opakeliwa mulipa ookhwa. Wamala ovithiwa muruchu achu poti ochuna waaxekurya amusi akhweliwe wi evahe nihakararyo. Mu elukuluku yeela, ninnakhalano ekari ya wuupuwelela mwa wiiseela okhuveya wa okumi ahu ni wi nihiku na okhwa ti naphaama opwaha nihiku na oyariwa. (Ekle. 7:1) Eyo yahaala okhala yaphaama ohakararya emusi ekhweliwe ohiya waaceererya murici moorweela wa waakhinyererya wi evahe yoolya, yoowurya ni wookonavo. Achu a Yehova aneemererya wi “Ovaha onnan réliha opwaha ni wakhela.” (Saw. 20:35) Ti yaphaama wuupuwelela vooloca sa yeeyo nnaweryaahu waavaha ookhweliwa mukhalelo wa ohakararya onarweela mu Soorempwa ni nikhaviheryo noomwiilini, ohiya wuupuwela vooloca sa yeeyo nnahaalaahu waakhela ntoko yoolya, yoowurya ni othata. Moorweela wa weera mu mukhalelo wa ncicimiho ntoko ohiwaaceererya murici amusi, hiyaano ninnooniherya epewe ni osivela Weekiristu.​—Akal. 6:2.

¹² Othotola ni Esatakha: Omanle ovithiwa muruchu, imusi ikina sinnapaka marehereryo a “Othotola”. Akina annarehererya esatakha wi emucicimihe ni omuupuwelela mulipa ookhwa. Mu saweera seiha, yoolya ni yoowurya sinnavahiwa, sinnoopiwa ikoma nave sinnathukumanyiwa sooveleela. Elukuluku ya sookhovelela seiha poti okhala soohiyana, wiiliwiili inapakiwa yamala mahiku 7, mahiku 40, nari elukuluku yincipale omanle ovithiwa muruchu. Ancipale anoona wi othotola ni esatakha makupa oochuneya a ovithiwa muruchu, aneemererya wi munepa wa mulipa ookhwa hokhala wawiichuuwa sihaakumve opakiwa sookhovelela seiha.

¹³ Oyawo nari Orehererya muthukumano wa esumana ya ovitha nari ovinre mweeri omanle ovithiwa muruchu, enooniwa ntoko ekari ya waakhela nari ovaha nihakaryaryiho wa ookhweliwa. Eyo poti wooniwa ntoko mukhalelo wa weemererya wi yaale ahiwenrye ophwanyeya va ovitha muruchu ekhaleno ekari ya omulaanya mulipa ookhweliwa. Akina anapharihela muthukumano yoowo ntoko mukhalelo wa omuthamalela mmusi a mulipa ookhwa yoowo okhavihenrye ovitha muruchu. Yahaala okhala yoophwanelela wuupuwela wi haavo meerelo a sookhovelela satheru, mu orehererya muthukumano wa othotola nipharihelaka muloko ni amusi?

¹⁴ Omanle ovithiwa muruchu, ahima vakhaani poti othukumana wiiphini wi yiiwanane vooloca sa ikhorowa iphariheliwe va ovitha muruchu; ni miyaha saweemereryiwa sikhumelenle mu makhwelo. Mwawaacererya akina poti ochuna ovaha nikhaviheryo noomwiilini, na mmuupuwelo, ni noomunepani wa alipa ookhweliwa omanle ovithiwa muruchu. Iha miyaha sa wiiphini, hori woochuneya ovoliiherya muloko woothene. Tiheeni yahaala weereya wakhala wi amusi anarehererya othotola epharihelaka muloko, amusi, ni asinthamwene? Opaka marehereryo yaala yahaala oweeriha akina wuupuwela wi Anamoona a Yehova aakhalano moonelo aya wa othotola nari wi annapaka esatakha. Weerano yeela yahaala mookhweya waakwaculiha akina yaawo anasuwela yeeyo Anamoona a Yehova anaroromelaaya ni anahusihaaya vooloca sa okhwa. (1 Akor. 10:32) Woona wi othotola ni esatakha sookhalano wiiwanana woolipa ni ororomela minepa sa achu ookhwa, malapelo eeparipari a Muluku anaphwanela osepa echu pure yeeyo enaphwanaphwana ni muthukumano wa othotola. (2 Akor. 6:17) Vaavaa nneeraahu hiiha, ninnooniherya mweeparipari wi ninniica yoonanara. (Sal. 97:10; Arom. 12:9) Hinkooni khata muchu a hiyo ahele mmurimani malakiheryo aphaama amanle othokororiwa wi neerihe wi ovitha wahu miruchu Seekiristu okhale wookhweya, waphaama, ni ohirino meerelo ooriipiha.