Asiya ni Metiyo Oriente—Mwaha ola onarweela mu Anuário a Anamoona a Yehova a 2014

Nikhaviheryo wa Mulopwana Oohoona, Oohiiwa ni Oohiloca

Epaaxina 59, eparakrafo 1, ophiyerya epaaxina 62, eparakrafo 1

Mu 1999, muloko wa elocelo ya ineneeryo o Kobe, Xapau, waakhalano mulopwana oohiiwa iichaniwa Hirofumi. Vaavaa munna mmoha eerenryeiye omuxekurya Hirofumi, amannya hiyeemerenrye. Munna ole aamuxekurya mootitelela nave aahaaveka amannya, nave vookuchulani amannya a Hirofumi yaamukumiha. Maihi ni ipweto sawe saari soorakama ni soomwaramwaxeya. Owo akhala ntoko muchu aakhala mu ntakhwa na evilivili iyaakha sincipale. Owo hawerya oloca. Tahi wi aari oohiiwa pahiru owo tho aari oohoona. Munna ole aari ootikhiniheya nyenya aavarerya matata a Hirofumi nave aapacerya opaka ineneeryo mmatani mwawe. Hinaarivo naakhulo. Hirofumi aakhala ocai wa achu nave hantonko okhala ni muchu vyakala mu iyaakha khumi opacerya vaavaa aayeleenleiye woona wawe arino iyaakha 31.

Munna ole aakookelawo evinre mahiku meeli. Amannya a Hirofumi yaatikhina yuupuwelaka wi munna aahaala okhulumuwa amanle woona mukhalelo wa Hirofumi. Wanaawiili munna aahaaveka amannya wi aloceno, mwawiihiiha awo yaamukumiherya Hirofumi vaate. Ovinrevo mweeri mmoha amuxekuryaka Hirofumi nlelo ehirivo yookhumelela, amannya a Hirofumi yaamuleela munna ole wi haaphwanela omuxekurya wanaawiili. Naamwi hiiha, munna aatitelela. Owo aanamuruuhela yoolya nave aaneera yeeyo aaweryeiye wi amooniherye ompwacha wawe. Ivinre miyeeri miili nlelo ehirivo yookhumelela, munna aapacerya woona wi wiilipixerya wawe waari mahaleene.

Munna aalakelela omuxekurya ekwaha yookuchula. Ahaakumve ocimula, aavekela wa Yehova wi amukhaviherye osuwela waakhanle wi aanaphwanela otitelela omuxekurya Hirofumi. Vaavaa munna aaphiyaleiye veechokoni, owo aapharela ntata na Hirofumi nave aapaka ineneeryo wi ookhala Muluku a wirimu awiichaniwa Yehova yoowo aamukhapelela moohihiyererya nave oniiwexexa phaama masooso awe ompwaha muchu mukina. Yehova aanampwacha nave aanachuna omoopola mmakacamiho awe. Ti nthowa nene Namoona awe aaruuleiye wa yoowo. Woopaceryani Hirofumi hoonihenrye waakhulela; nyenya voocharela moolipa aavaha mooni ntata na munna, nave aamoriha miithori. Atannyen’ye murima ni yeeyo, munna ole aamoriha tho miithori. Yaapacerya yoohuserya ya Piipiliya.

Ivinre iyaakha 11 ehuseryaka, Hirofumi aapacerya othukumana ni muloko wa vakhiviru opwaha weeca mukwaha oya o muloko wa elocelo ya ineneeryo ntoko eereiye woopaceryani. Haavo mmoha a mmulokoni aasuwenle ompakela ineneeryo, nyenya moovira wa miyeeri sawaakhwana 18, anna ni arokora 22 yaanawerya ompakela ineneeryo, mwawiihiiha yaanamukhaviherya Hirofumi. Mu Yaneru a 2012, Hirofumi aapaka mwaha awe woopacerya mu Exikola ya Orummwa Woomuluku, muchu mukina aanataphulela ineneeryo sawe. Mu Otupro a eyaakha emohamoha, aakhala mulaleeryi oohipatisiwa.

Asiya ni Oriyente Metiyo

“Koomwaavya Iyaakha 30”

Epaaxina 67, eparakrafo 2

Agnes, misiyonaario a Intonesia, aalaleerya wa muthiyana mmoha aari oorupala. Muthiyana owo aatumiha yoolya mmusika wa nipuro nenle. Owo aanasiveliwa waalakhanya soolaleeryiwa sahu ni ochekula vooloca sa Piipiliya vaavaa akhaleiyeno elukuluku. Nihiku nimoha, vaavaa Agnes aakeleiye omusika omuxekurya muthiyana ole, owo haamphwannye. Iyawe aamuleela wi owo oyara. Agnes aalakelela omuxekurya. Aamukuxa Liivuru Aka a Myaha sa Piipiliya ammanke mu epapeli ya mahala. Muthiyana ole aatikiniheya vaavaa onneiye wi Agnes aarwa omuxekurya nave tho aatikiniheya vancipale vaavaa Agnes amuvanheiye yamahala eyo. Owo aamutaphula liivuru, amvarerya oohakalala ene nave aaloca: “Omuruuhale woowi liivuru ola? Koomwaavya iyaakha 30! Koomwaavya mmapuro oothene onatumihiwamo aliivuru nave kookoherya voothevene. Haavo aarino liivuru ola, haavo aamusuwenle nave haavo liivuru mukina onalikana ni yoola.” Vaavaa muthiyana owo aareiye mwaana, aanasiveliwa omwaalakhanya liivuru Myaha sa Piipiliya aataata awe. Vano hiihaano owo onnamwaalakhanya liivuru owo wanaawiili, nave mwanawe mutokweene amwaamuthiyana onnasiveliwa tho omwaalakhanya. Yaapaceryiwa yoohuserya ya Piipiliya ni yaawo.

[Epaaxina Ohirivo Echu 5, 6]