Wunnuwiha Mavyakelo Ahu mu Orummwa​—Waaceererya Nchuno na Yoole Onasiveliwa ni Irevista

Ntakhara Heeni ti Yoochuneya: Achu ancipale annasiveliwa waalakhanya irevista sahu nyenya hanachuna omuhuserya Piipiliya ni hiyaano. Akhweya awo ari oohakalala ni malapelo aya, naari anuupuwela wi haano elukuluku wi ehuserye. Nyenya, vaavaa awo anaalakhanyaaya wiiliwiili irevista sahu, ananwerya osiveliwa ni Masu a Muluku. (1 Pet. 2:2) Mwaha mmoha onanwerya otannya murima aya, naari makhalelo aya ananwerya otorokeya. Wiiliwiili, oxekurya wa waakuveya onahaala oweeriha okhala ootaphuwa ni hiyaano nave onikhaviherya osuwela tiheeni anachunaaya ni yeeyo enawuukhula. Ikwaha ikina ennapaceryihiwa yoohuserya ya Piipiliya.

Mukhalelo wa Weerano Yeela:

• Mweeri ori woothene, mpake marehereryo wi mumvahe owo Mulipeleli ni Despertai! muvyaani. Akhweya munaphwanela omuxekurya elukuluku ekina variyari va mweeri wi mwaaceererye nchuno nawe mmwaha wa erevista muhin’yaanyu naari wi mumvahe yoolaleeryiwa enavahiwa mweeri yoole. Murepele phaama.​—Moone Orummwa Wahu wa Omwene Yaneru 2014, epaax. 3.

• Mwiirehererye wa oxekurya ori woothene. Ohiya pahiru omvaha irevista, mmuvoliiherye namakhala mu ovaanela nave mweererye olemeya ni yoowo, hiiha nyuwaano munanwerya waaceererya nchuno nawe.

• Mukhale oovarerya wa ikari sa opaceryiha yoohuserya. Wakhala wi mmoha a yaale yoonihenrye nchuno ohookohani tiheeni Piipiliya onaloceiye vooloca sa mwaha wammoori, mumvahe yoolaleeryiwa emoha ya ohuserya yeeyo erino naakhulo, nave muthokororye vamoha. Muhaakumve opwahavo, muhiye nikoho nave muthokororye mu oxekurya woocharela. Wakhala wi moohihiyererya munnakhalano othokororya wawaakuveya mmupharihelaka Piipiliya naari yoolaleeryiwa ahu ya ohuserya, nyuwaano muneeciha yoohuserya ya Piipiliya. Apwanne montoko omvaha namakhala eproxura Michaka Yaphaama nave mooniherya mukhalelo wa omuhuserya Piipiliya? Apwanne momooniha iviitiyu Ntakhara heeni omuhuserya Piipiliya? ni Como é um estudo Bíblico? Naamwi khalai muchu owo hoonihenrye nchuno na ohuserya, makhalelo annatorokeya. Apwanne yaahaala okhala ya mphurelo wa nyuwo weererya wanaawiili?

Mweererye Ela Variyari va Mweeri:

Mwaarepele oothene yaale anooniherya nchuno wa erevista. Mwaavahe irevista ivyaani, nave mwaaleele wi munahaala waaruuhela ivyaani inacharela.