Mwanwerya Waala Mmiso wa Eparipari wa Amusi Anyu?—Mwaha ola okuxiwe mu Anuário a Anamoona a Yehova a 2015
Repuplika Tominikana
Achu oopacerya ophwanya eparipari
Namurunku 1 a Apirili a 1945, Lennart ni Virginia Johnson yaawo yaavyakihiwa o Xileati, yaaphiya o Ciudad Trujillo (vano aniichaniwa Santo Domingo), epooma etokotoko ya Repuplika Tominikana. Awo yaari anamoona oopacerya mu elapo yeele yoosareya ni owanawana ni makacamiho. Anúario a 1946 (mu Enklesi) onnaloca: “Ela chiryene ekulucu yeeparipari ya muteko wa omisiyonaario. Anna yaala yaakhuma o Kiliyati yaahaala okhala oopacerya.” Mwaanyiherye: Hiyaariwo efiliyale, Empa ya Omwene, naari mano miloko. Mamisiyonaario hiyaamusuwenle muchu mu elapo yeele, hiyaasuwenle oloca espanoli, nave hiyaarino empa naari sookhalano. Tiheeni yaahaalaaya weera?
Lennart onnaloca: “Naaya mu Hotel a Victoria nave naaphwanya mpuro wa okona—wa oopiili hiyo naaliva itoolare 5 va nihikuni, ophitaanyerya olya. Mu othana yoole naakhalano yoohuserya ahu ya Piipiliya yoopacerya. Yeeren’ye mmukhalelo ola: Athiyana apiili naamuhuseryahu Piipiliya vamoha o Prokili yaakhala o Repuplica Tominikaana yaanivahererya masina a amusi aya ni achu yaasuwenlaaya mmoha a yaawo aari Dr. Green. Vaavaa naamuxekunryaahu, naamusuwela tho mwaacamani awe Moose Rollins. Emanle osuwela mukhalelo nikunxaahu masina aya ni nipuro anakhalaayawo, awo yaawiriyana phaama michaka sa Omwene nave yaaheemererya yoohuserya ya Piipiliya. Ohoolo waya Moose aakhala mulaleeryi a Omwene oopacerya.”
Repuplika Tominikaana
“Nihiku nimoha nnahaala waaphwanya”
Epaaxina 90, iparakrafo 1-3
Mu 1935, o Cibao Valley, Pablo Gonzalez aapacerya omwaalakhanya Piipiliya. Owo anathukumana ni Aprotestante, nyenya aahiya othukumanano vaavaa onneiye wi meecelo aya heniiwanana ni yeeyo owo aalakhannyeiye mu Soorepa. Mwawiihiiha, owo aatitelela ohuserya Masu a Muluku mukhateiye nave aanaaleela akina yeeyo aahuseryeiye—voopacerya wa emusi awe ni amwaacamani voocharela akina mu ikulucu sookhuveela. Owo aatumiha imaca sawe ni muhuwo nave aapharihela ikhorowa wi alivele mukwaha awe wa orummwa.
Ophiyerya 1942, Pablo anaxekurya imusi 200 mu ikulucu sookhuveela ni opaka mithukumano wiiliwiili, naamwi owo ahaakumanne ni Anamoona a Yehova. Owo ahaaceenyerya achu omwaalakhanya Piipiliya ni okhala mwawiiwanana ni yoowo. Ancipale yaahiiwelela yeeyo aahusinheiye nave yaahiya omulya soona ni waaceya.
Mmoha a yaale yiiwale masu a Mpiipiliyani orweela wa Pablo ti Rosário. Owo onnaloca: “Kirino iyaakha 17 sa oyariwa, mwaana a murokora a amama aka Negro Jimenez, aanapaka makupa a nikhuuru naahooleliwa ni Pablo Gonzalez. Owo aachekurya emusi aka nave aahaalakhanya soorepa sa Mpiipiliyani, eyo yaakeeriha ohiya ekerexa ya Katolika. Okerexa saalakhanyiwa ichu mu elocelo ya Latin, yeeyo naahiiwexexaahu. Moohilekela, Pablo Gonzalez aanixekurya nave aanilipiha. Owo aaloca: ‘Hannapaka makupa a ikerexa sincipale heiho hiyaano nsuwenlaahu, nyenya nookhalano anna orukurerya elapo. Hinnasuwela mukhalelo akhanlaaya naari nsina aniichaneliwaaya, nyenya nihiku nimoha nnahaala waaphwanya.’
[Epaaxina Ohirivo Echu 5, 6]