Osyaka Ntoko Inowa ni Awisumaliha Ntoko Ikakaiya—Mwaha ola okuxiwe mu liivuru Anuário das Testemunhas de Jeová de 2015
Europa
Ochuneya wa Ocicimiha
Epaaxina 73
Mu 30 a Marsu a 2014, Vasilii, munna opacenrye olapa khalai Opeteli ya o Russia, aanavaha onamoona apharihelaka meesa a soolaleeryiwa omuceche yoole. Mootutuxa, ekaaro ya mapilisa yaaphiya. Mpilisa mmoha aakhuruwa, nave mwa ncicimiho amveka munna wi amaalihe muteko awe wa olaleerya, woona wi akina a ekulucu yeele hiyaasiveliwa ni muteko awe. Mpilisa mukina aakaravaara ovaanela waya. Vasilii aalakelela owiiwelela mapilisa ni ohaakhulana naamwi aaphwanelela olaleerya. Vasilii aarowa, nave evinre mahiku meeli, munna aaveka wi aloce ni mutokweene a Mapilisa. Nave oveka wawe waaheemereryiwa. Vaavaa aaloceiye ni mutokweene, Vasilii aathamalela muteko mapilisa anapakaaya mu ekulucu, nave tho nthowa na oloca waya ni yoowo mwa ncicimiho. Mutokweene aamweha nthamwene awe, nave aloca: “Koomaliha iyaakha 32 kilapaka ntoko mpilisa, nyenya nkintonko omoona muchu athamalelaka muteko ahu!” Variyari va ovaanela waya, mutokweene ahiiwexexa wi muteko ahu wa olaleerya onneemereryiwa mwawiiwanana ni malamulo. Mutokweene aamukoha Vasilii, nthowa heeni owo naamwi aasuwela wi muteko awe waaneemereryiwa, haakhunle vaavaa mapilisa yamuwateelihaaya ophara muteko awe. Vasilii aahaakhula: “Waahaala okhala oyeleela ncicimiho wa mapilisa ni owuuliha muru veeri wa achu wi awo hasuwenle malamulo.” Mutokweene ni nthamwene awe yaatikhiniheya ni owo, nave yaamweemererya wi aphariheleke meesa awe a soolaleeryiwa.
Repuplika Tominikana
Ipaaxina 111-116
‘Yesu Tori Muru’
Donald Nowills, Athanliwa wi ahooleleke miteko sa efiliyale vaavaa mamisiyonaariyo yaaphariwaaya. Mu elukuluku yeele aarino pahiru iyaakha 20 sa oyariwa ni iyaakha 4 sa opatisiwa. Naamwi arumeenle mu miyeeri vakhaani ntoko ooweherya a ekulucu, muteko ofiliyale waari muvyaani. Munna Donald aakhalano ekupweete ekhaani owannyawe, yeeyo yaapakiwe ni miri vamoha ni mithipo nave vathi yaari echaya. Empa eyo yaari o Gualey, muceche wawoopiha wa Ciudad Trujillo. Nnikhaviheryo na Felix Marte, owo aanapaka erevista Mulipeleli wa elapo yoothene.
Mary Glass, aanamukhaviherya tho munna Donald. Mu elukuluku yeele aiyawe Mary Glass, yiichaniwa Enrique, yaari mukariposo. Owo onnaloca: “Miyaano koorowa omutekoni elukuluku ya 17:00, nave kaanaya okupweete ya munna Donald wi kamurepe Mulipeleli. Voocharela, munna Donald anapharihela maakina awiichaniwa mimeógrafo wi amukopiyaare Mulipeleli. Murokora mmoha a o Santiyako asuweliwe ntoko ‘munkeelo,’ aanakuha irevista ihe mmukoro wa iliituru 20 wa makhurwa. Aanakhuneela irevista ihe ni ekuwo, vasulu vene amuhelavo kholowa, makuchi naari caakwa. Voocharela aanawela mu ekaaro wi ahiye erevista emoha wa muloko ti muloko. Emusi ti emusi yaanapoleyana erevista wi yahuserye.”
ary onnaaceererya “Naanakhalano ekaasoope, ntakhara mixewe saasareya ni alamuleli yaawo yaachuna osuwela nipuro onapakiweiyewo Mulipeleli. Nyenya awo hiyawenrye osuwela. Ikwaha soothene Yehova aananikhaviherya.”
“Osyaka Ntoko Inowa ni Awisumaliha Ntoko Ikakaiya”
Yaari yoochuneya wi anna etitelele waakhela yoolya yoomunepani variyari va elukuluku ya wiikariwa, nyenya elukuluku yeele yaari yawoopihaxa wa akapuro a Yehova mu elapo yeele. Ancipale yaanawaleliwa mukariposo ikwaha sincipale.
Juanita Borges onnaloca: “Vaavaa kaahusenryaaka eparipari mu 1953, kaanasuwela wi waakhanle wi kaari Namoona a Yehova mu elukuluku yeele, kaahaala tho ophariwa. Ti yeeyo yeeren’ye mu Novempuru a 1958, vaavaa kaakelaaka omuxekurya Murokora Eneida Suarez, mapilisa yaaphiya nave yaanootherya wi naapaka muthukumano. Naawaleliwa mu miyeeri miraru nave tho naaliva ikhorowa sawaakhwana itoolare nsana nimoha mu elukuluku yeele.”
Alipa oolamulela yaaneerano soothene yaaweryaaya wi yaahiihe anna opaka mithukumano, nyenya anna hiyaahin’ye. Naamwi hiiha awo yaaphwanela okhala “osyaka ntoko inowa ni awiisuumaaliha ntoko ikakaiya.” (Mat. 10:16) Andrea Almanzar onnaloca: “Vaavaa nayaahu mmithukumano, naaphwanela ophiya elukuluku yoohiyana. Wiiliwiili naanamwalamwala ohiyu oriyari, ntakhara naaphwanela okhuma mmoha ti mmoha wi achu ehisuwele.”
Jeremias Glass ayariwaka, atiithi awe, Leon, yaari mukariposo. Owo aakhala mulaleeryi arino iyaakha 7 mu eyaakha ya 1957. Owo onnuupuwela elukuluku yeeyo mithukumano seeriwaya moovitheya owannyawe. Jeremias onnaloca: “Alipa oowiriyana oothene yaanaakhela epapeli yooniherya elukuluku muchu ti muchu aahaaleiye okhuma. Samala mithukumano, atiithi aka yaanakihela mmurupani wi yaakhwaniherye epapeli yaakaweliwaaya ya achu apiili apiili ni oya makupa ohiyana.”
Anna tho yaanakhalano ekaasoope mmukhalelo wa olakelela elukuluku ya mithukumano, yeeyo yaahaala okhala yoophwanelela wi ehiphariwe. Ntoko yootakiherya, Mercedes Garcia aahusenrye eparipari ni ataata awe, Pablo Gonzalez. Amannya yaakhwile Mercedes arino iyaakha 7 sa oyariwa, nave atiithi awe yaari mukariposo. Mwawiihiiha, anamwane khumi a emusi yeele yaahanle mukhataaya. Mu 1959 Mercedes arino iyaakha thanu naxexe aapatisiwa. Mwaha wa opatiso waalociwe vaate va munna elukuluku ya 3:30 a wooxixelo, wi ehooniwe, opatiso weeriweno mmuhice Ozama. Mercedes onnaloca: “Wooxixelo elukuluku ya 5:30 achu erikimvinyaru, hiyaano namurowa.”
[Epaaxina Ohirivo Echu 6]