Ireferensiya Inaphwanyeya va Yoochariha ya Muthukumano Okumi ni Muteko Ahu Weekristu
2-8 A MARSU
MUHAKHU WA MASU A MULUKU | MAPHATXUWELO 22-23
“Muluku Aaheererya Nroromelo na Aaparahamu”
(Maphatxuwelo 22:1, 2)
w12 1/1 epaax. 23 ipara. 4-6
Ntakhara Heeni Muluku Amveka Aparahamu wi Amvahe Mwanawe Ntoko Mukucho?
Moone masu Yehova aalonceiye wa Aparahamu: “Omukushe mwaanaa yoole mmoharu, Isaaki, yoowo onamukhwelaa oyeno makupa ooMoriya, wamuhelele weiwo mukucho woopahiwa.” (Map 22:2) Moone wi Yehova aamuloca Isaki ntoko mwaana “yoowo onamukhwelaa.” Yehova aanasuwela wi Isaki aari oochuneyaxa wa Aparahamu. Muluku tho aakhalano moonelo mmohamoha wa mwanawe, Yesu. Yehova aanamusivela vancipale Yesu, ophiyerya wi mu ikwaha piili aaloca wirimu, mmukhalelo wooluluwanya ariki “weyo wa mwanaka mmoharu kinamukwelaaka.”—Mar 1:11; 9:7.
Moone tho wi yooveka ya Yehova wa Aparahamu yaaphitaanyerya masu awi “[khoo].” Mulipa oohuserya miyaha sa Piipiliya onnaloca wi nthowa na Muluku opharihela masu yaala enooniherya wi “APWIYA anniiwexexa owalamela waya yeeyo awo yaavenkaaya.” Yooveka yeela yaahimuruuhela Aparahamu okhala othanana. Mmukhalelo woolikana, nnawerya wiiwexexa osooseya murima Yehova onneiye vaavaa aamonneiye Mwanawe oosiveliwa ahooxeyaka ni okhwa. Mweeparipari waari wiicela otokweene Yehova onneiye.
Hiihaa, naamwi akhweya nikhalaka ookacamiheya pahiru nawuupuwelelaka yooveka ya Yehova wa Aparahamu, ti yaphaama wuupuwela wi Owo heemerenrye wi Aparahamu ayeno vahoolo mukucho awe. Owo aaheeriha wi Aparahamu ahimuyelele mwanawe, nenlo naahaala okhala nikacamiho ntokweene; heemerenrye wi Isaki akhwe. Mwa yeeyo, Yehova haamwaakihe “mwanawe-mwanawe, nto amveleela wi akhwe wa nthowa na hiyo oothene.” (Aro 8:32) Ntakhara heeni Yehova aaheemererya ohoolela wiicela yoola otokweene? Owo eenreno yeela “wi hiyo nikhaleno okumi mwa yoowo.” (1 Yoh 4:9) Ela ennanuupuxerya osivela otokweene Muluku oreiyeno ni hiyaano! Hannatannyeya murima waakhulela osivela yoola?
(Maphatxuwelo 22:9-12)
(Maphatxuwelo 22:15-18)
w12 15/10 epaax. 23 epara. 6
Mmwiiwelele Muluku Nave Mwaakhele Soolaiherya Seiho Olipenleiye
Wi aakhaviherye achu oocheka, Yehova Muluku aalipela tho, apharihelaka masu ntoko “Kinnalipela okumi aka yoola, miyo Apwiya, Apwiya [Yehova].” (Ezek 17:16) Piipiliya onnaloca ikwaha opwaha makhumi maxexe Yehova aalipenleiye. Yootakiherya esuweliwe vancipale akhweya ori meerelo awe ni Aparahamu. Mu iyaakha sincipale, Yehova aapaka soororomeliha sincipale wa Aparahamu, mwa soothene, enooniherya wi Muyareriwo waalaiheryiwe waahaala orwa mwa Aparahamu oorweela wa mwanawe Isaki. (Map. 12:1-3, 7; 13:14-17; 15:5, 18; 21:12) Voocharela Yehova aaheeriha wi Aparahamu ahoolele yaweeha yoovila, amulamulelaka wi amvahe mwanawe oosiveliwa ntoko mukucho. Moohilekela, Aparahamu aamwiiwelela nave aari ooreheryeya wi amvahe mukucho Isaki ophiyerya wi munkeelo a Muluku aamuhiiha. Muluku aalipela: “Kinnalipela nsina naka wi kinarwa kooreeliha chiri nave kinarwa koovaha okhala nikholo na mmiso muncipale. Waaca waya wa achu aa eni okhale ntoko itheneeri wirimu, nave ntoko ehaava ya ophareya. Anarwa ekusha ipooma sa amwiicani wi ikhale sawaya. Mwa achu aa, oothene eelapo ya vathi anarwa ereelihiwa, ntakhara weyo wookiiwelela.” —Map 22:1-3, 9-12, 15-18.
Mphwanye Muhakhu Woomunepani
(Maphatxuwelo 22:5)
Yehova Aamwiichana Owo Ntoko “Nthamwene”
Ahaakumve waahiya akapuro awe, Aaparahamu aaloca: “Nyuwano muhale vava ni phùru. Miyano ni mmiravo ola nnaya iwe wi namwepese Muluku. Nnamukòka.” (Map 22:5) Masu a Aaparahamu yaataphulela eheeni? Apwanne aamootha vaavaa aalonceiye wi aahaala okooka ni Isaki, asuwelaka wi aaya omvaha ntoko mukucho? Hooye. Piipiliya onaloca wi Aaparahamu aasuwela wi Yehova aanwerya omviiha Isaki mookhwani. (Mwaalakhanye Ahebri 11:19.) Aaparahamu aasuwela wi Muluku aahimvaha ikuru sa okhalano mwaana naamwi yene ni Saara yuuluvanle. (Ahe 11:11, 12, 18) Mwawiihiiha ahuupuwela wi hiyaavovo echu enamvila Yehova. Haasuwela yeeyo yaahaala weereya nihiku nenle. Nyenya aakhalano nroromelo nawaakhwanela, wi Yehova aanwerya omviiha mwanawe ophiyerya wi soolaiherya soothene sa Muluku ikhwaneele. Ti nthowa nene Aaparahamu oniichaniweiye “nikholo na yale othene anroromela.”
(Maphatxuwelo 22:12)
it-3 epaax. 315 ipara. 2-3
Ovareryela sa Muhoolo
Wiivyakiha wa ovarerya sa ichu sa muhoolo. Meerelo a wiivyakiha ovareryela ichu sa muhoolo naari owerya wa wavasulu Muluku oreiyeno, waaphwanela wiiwananaka ni malakiheryo a mwaneene Muluku ni yoochuna yawookololowa ya Muluku nave okhala mwawiiwanana ni yeeyo onaloceiye sa yene mu Masu Awe. Moohiyana ni nihusiheryo na ovareryela ichu sa muhoolo, soorepa sincipale sinnooniherya wi, wa Muluku ennakhala yeeparipari wi yoolakelela yeereye ni mathipelo ookwakwaleya.
Mu Maphatxuwelo 11:5-8 Muluku onnalociwa ntoko onnakookela waapwacha achu, oonaka mukhalelo wo Papulu, nave mu elukuluku yeele, wi eerevo echu wi aahiihe muteko woohikhala weekhaikhai waapakiwa weiwo. Vaavaa achu oonanara murima yaasaren’yaaya o Sotoma ni Komora, Yehova aamuleela Aparahamu yoolakelela awe wi asuwele sincipale (orweela wa ankeelo) wi yoone “wari hiihaa ntoko kiiwenlaaka nari hooye. Kinakhwela osuwela evelevelo.” (Map 18:20-22; 19:1) Muluku aaloca wi ‘iikhovelelihe ni Aparahamu,’ nave vaavaa Aparahamu eehiweiye wi amvahe mwanawe Isaki ntoko mukucho, Yehova aaloca: “Vano koosuwela wi onnamwiiwelela ni omoova Muluku, ntakhara homuwatiihale mwanaa mmoharu.”—Map 18:19; 22:11, 12; mulikanyihe ni Neh 9:7, 8; Gal 4:9.
9-15 A MARSU
MUHAKHU WA MASU A MULUKU | MAPHATXUWELO 24
“Muthiyana wi Akhale Mwaara a Isaki”
(Maphatxuwelo 24:2-4)
wp16.3 epaax. 14 epara. 3
“Aai, Kinamuyawo”
Aparahamu aahimweeriha Eliyeseri olipela wi haahaala omuthanla naari mano muthiyana mmoha o Kanani wi akhale mwaara a Isaki. Ntakhara heeni? Ntakhara wi achu o Kaanani hiyaachariha nave hiyaamulapela Yehova Muluku. Aparahamu aasuwela wi mu elukuluku yoophwanelela, Yehova aahaala waathoriha achu yaala nthowa na ichu soonanara yeeraaya. Aparahamu haachuna wi mwanawe oosiveliwa akhaleno ohima ni achu yaale ni meerelo aya oocapaheya. Owo tho aasuwela wi Isaki aakhalano murici woochuneyaxa wi aakhwaniherye yoochuna ya Muluku.—Map 15:16; 17:19; 24:2-4.
(Maphatxuwelo 24:11-15)
wp16.3 epaax. 14 epara. 4
“Aai, Kinamuyawo”
Eliyeseri aaloca wi, vaavaa aaphin’yeiye veehimeni waacamela o Harani, aavekela wa Yehova Muluku. Mweeparipari, owo aavekela wa Yehova wi amuthanle mwali yoowo aahaala othelana ni Isaki nave wi mwali yoowo eereiye amuthanle aaruule veehimeni. Vaavaa owo eereiye aveke maahi oowurya, aaphwanela wiivaha wi amvahe ohiya pahiru yene nyenya tho akamelu awe. (Map 24:12-14) Nave aari Repeka aaruule ni eerano hiiha ntoko aavekenleiye. Nkaanyiheryani mukhalelo Repeka onneiye akhweya vaavaa aamwiiweiye Eliyeseri aloca yaweereya yeela!
(Maphatxuwelo 24:58)
(Maphatxuwelo 24:67)
wp16.3 epaax. 14 ipara. 6-7
“Aai, Kinamuyawo”
Isumana vakhaani muculi, Eliyeseri aaloca sa yeela ni Aparahamu. Owo aamukoha: “Nkha oomwi muthiyana owo ahichuna okichara?” Aparahamu aahaakhula: “Vaavaa nto onarwa otaphuwa mu lipela wu.” (Map 24:39, 41) Mu echoko ya Petuwele, moonelo wa mwali Repeka waari woochuneya. Eliyeseri aahakalala vancipale ni yookhumelela wa murici awe. Mwa yeeyo, mmeeloni mwaya, aamukoha waakhanle wi aanaphwanela omukeriha o Kanani. Nyenya amusi yaachuna wi aakhanle ni yaawo akhweya mahiku khumi. Mwa yeeyo, yaavaanela omwiichana Repeka emukoha: “Onnamuchara mulopwana yoola?”—Map 24:57.
Vano, Repeka, aaphwanela opaka yoolakelela yeeyo yaahaala otoroka okumi awe. Tiheeni aahaaleiye weera? Apwanne aahaala opharihela omoriwa ikharari wa atiithi awe ni munnawe wi ahiyewo wa muchu yoowo aahaamusuwenleiye? Naari wi aahaala woona okhala ekari etokweene okhaviherya waakhwanela yoochuna ya Yehova? Naakhulo nawe, nohooniherya moonelo awe vooloca sa matorokelo yaala awaakuveya mu okumi awe. Tahi waari wookhweya, nyenya naamwi hiiha owo aahaakhula ariki: “Aai, kinamuyawo.”—Map 24:58.
Mphwanye Muhakhu Woomunepani
(Maphatxuwelo 24:19, 20)
wp16.3 ipaax. 12-13
“Aai, Kinamuyawo”
Nihiku nimoha, amanle osareiha muno awe, mulopwana mmoha awuuluvala aamuchimakela. Owo aahi: “Okihiye kiwurwe maahi a mmunoni mwaa, kinamooveka.” Yaari yooveka yookhweya nave epakiwe mmukhalelo woocicimiheya. Repeka aamoona wi mulopwana ola aarwa woorakamawo. Moohilekela, yene aakuruxa muno mmachurini mwawe, nave amvaha maahi mulopwana yoola. Hiwaari pahiru owuurya omoha, nyenya yaari awaakhwanela wi amalihe nchanana. Owo aawoona akamelu khumi vakhiviru vaavale ekokhonre, nave nipuro anawuryavo akamelu hiyaarivo maahi awaakhwanela. Repeka ahiiwexexa wi mulopwana ooreera murima aanamvarerya moopwacha. Owo aachuna wooniherya mahala, mwa yeeyo aahi: “Kinamwaavaha tho akamila anyu vaavaa anakhwelelaaya.”—Map 24:17-19.
Moone wi Repeka haari pahiru ooreheryeya wi aavahe maahi akamelu khumi, nyenya aari oolakelela owetha wi amaliha nchanana. Kameelo mmoha onnawerya owurya iliitru (95 L) sa maahi. Waakhanle wi akamelu yaakhalano nchanana ntokweene, Repeka aahaala olapa iwora sincipale. Nyenya enooneya wi akamelu hiyaarino nchanana ntokweene. Nyenya wa Repeka haasuwela yeela. Owo aari ooreheryeya, naamwi murima waamwiipa, wi apake yeeyo yaari yoochuneya wi ooniherye owaakhela aleco yaale aahaasuwenleiye. Owo aanachimakela, wu ni wu, asareihaka muno ikwaha sincipale.—Map 24:20, 21.
wp16.3 epaax. 13, masu avathi
“Aai, Kinamuyawo”
Waahipacerya oxekuwavo. Yaweereya ela henooniherya wi Repeka aamaliha iwora veehimeni. Nyenya tho henanleela wi achu a veechokoni vawe yaamukona vaavaa owo aamalin’heiye muteko, naari mano haarivovo muchu aakele omvarerya wi asuwele ntakhara heeni aalekeleiye.
(Maphatxuwelo 24:65)
wp16.3 epaax. 15 epara. 3
“Aai, Kinamuyawo”
Noophiya nihiku nookuchula nnalociwa mmwaha yoola. Namuteko a Aparahamu ni akamelu yaari o Nikele, nave waaniila vaavaa Repeka aamooneiye mulopwana eecaka mmacani. Owo ooneya wi aari oothanana. Piipiliya onaloca wi Repeka “aakhuruwavo vakamilani.” Akhweya haawehenrye wi kamelu akokhore. Repeka aamukoha Eliyeseri: “Taani mulopwana yoole onoorwa mmacani mmwe anthikilelaka?” Vaavaa aasuwenleiye wi aari Isaki, owo aakhuneela muru awe ni ekuwo. (Map 24:62-65) Ntakhara heeni? Mwawooneya, meerelo yaala yaari eneneeryo ya ncicimiho wa muchu aahaaleiye othelanano muhoolo. Akhweya akina mmahiku ahu yaala enamoona wi mukhalelo yoola wa ncicimiho woovireliwa. Nyenya, mweeparipari, alopwana naari athiyana enanwerya ohuserya orweela wa Repeka. Oothene ahu nnaphwanela okhala awiiyeviha, chiryene ola mukhalelo waphaamaxa.
16-22 A MARSU
MUHAKHU WA MASU A MULUKU | MAPHATXUWELO 25-26
“Esawu Onnatumiha Otokweene Awe”
(Maphatxuwelo 25:27, 28)
it-2 epaax. 464
Yakopo
Moohiyana ni Esawu, mwaana ookhweleyaxa wa a tiithi awe, yoowo aari namasaya mmoha amutakhwani, nave Yakopo onnalociwa ntoko muchu “aari oomaala [Ehepiri: tam], aahala ni miteko sa vaate,” yoowo aakuxa ekumi yookhweya ya okhapelela muhuwo wa vaate, yoowo xaxaxa aasiveliha amannya. (Map 25:27, 28) Masu yaala a Ehepiri tam ennaphariheliwa mmakupa makina wi etharihe wa yaale yeemereryiwe ni Muluku. Ntoko yootakiherya, “anamaahita annamwiica muchu aphaama,” mweeparipari, Yehova onnaroromeliha wi “muchu amurecele onarwa akhala phaama.” (Masi 29:10; Sal 37:37) Mulopwana oororomeleya Yupu “aari muchu awookololowa murima oomoova Muluku ni oorapela yoonanara.”—Yobi 1:1, 8; 2:3.
(Maphatxuwelo 25:29, 30) Nihiku nimoha, Yaakopo aahaapeya mushi wa chipampa, Esawu eera akhumaka otakhwani, ookhulumuweene. 30 Esawu aaloca: “Okivahe echu eyo ehiya ophilivila. Kootepa okhulumuwa.” Esawu tichaneliweiye Etomu.
(Maphatxuwelo 25:31-34)
Ntakhara Heeni Wooniherya Othamalela?
Moothananiha achu akina analociwa Mpiipiliyani hiyoonihenre othamalela. Ntoko yootakiherya, naamwi Esawu aaphuiwale ni asitiithi yaawo yaamusivela nave yaamucicimiha Yehova, owo haathamalenle ichu saweela. (Mwaalakhanye Ahebri 12:16.) Moonelo awe woohithamalela woonen’ye mwawiihai? Esawu moololo aahitumiha otokweene awe wa munnawe mwaamukhaani, Yakopo, ni muhusi wa chipampa. (Map. 25:30-34) Voocharela Esawu aahitepa onanariwa ni yoothanla aapankeiye. Nyenya owo hoonihenrye othamalela wa yeeyo aapankeiye, mwawiihiiha haaphwanela wiikhupanyerya vaavaa ahaakhenleiye mareeliho ntoko oopacerya oyariwa.
it-3 epaax. 327
Mwaana Oopacerya Oyariwa
Ovinyerya ilukuluku sakhalai, mwaana oopacerya oyariwa aanaakhela ncicimiho veemusini nave ti yoowo aaraceela okhala muru wa echoko. Owo aanaakhela makupa makina a ichu sa atiithi awe. (Malam 21:17) Yosefe aakiraathi vahoolo va Rupeni vaava yaalyaaya yoolya mwawiiwanana ni ophwanelela wawe okhala mwaana oopacerya oyariwa. (Map 43:33) Nyenya tahi wi ikwaha soothene Piipiliya onnaacicimiha yaale ari oopacerya oyariwa moorweela wa ochariha muyareriwo. Ikwaha sincipale nipuro noopacerya onavahiwa mwaana yoowo ori oororomeleya, ohiya wa mwaana oopacerya oyariwa.—Map 6:10; 1Math 1:28; mulikanyihe ni Map 11:26, 32; 12:4; moone tho MUYARERIWO; MWAANA OPACERYA OYARIWA, EKARI YA.
Mphwanye Muhakhu Woomunepani
(Maphatxuwelo 25:31-34)
Makoho a Alipa Waalakhanya
Vano hankooni nimuchekele Ahebri 12:16, olonceiye: “Ahikhalevo muchu ooraruwa nari oonyemula, ntoko Esawu, yoowo aatuminhe otokweene awe woopacerya oyariwa ni olya omoharu weiwo.” Ntakhara heeni Paulo aarepa yeela?
Tahi wi Paulo aaloca sa taani yaari makholo a Mesiya. Ntoko mwaha onooniheryaaya, owo aaceenyerya Akristu alocaka wi “mookole iphiro sa manaani anyu.” Hiiha, awo hiyaaphwanela “oyeleela mahala a Muluku.” (Heb. 12:12-16) Paulo aaloca wi a kristu hiyaaphwanela opakaka ocapaheya. Waakhanle wi yaaheerano yeela, awo yaahaala okhala ntoko Esawu, aahicicimiha ichu saweela nave amuchekela Yehova.
Esawu aakhala variyari va achu yaamulapela Yehova. Mwawiihiiha, akhweya owo aakhalano ekari ya ovaha mukucho mu nipuro na emusi awe. (Map. 8:20, 21; 12:7, 8; Yobi 1:4, 5) Nyenya Esawu haateteiwa ni ichu soomunepani. Nnasuwela hai yeeyo? Nthowa nimoha ti nawi owo aavaha ikari sawe ni otoroka ni yoolya. Ohiya yeeyo, Muluku aaloca wi muyareriwo wa Aparahamu waahaala ohoolela makacamiho. Akhweya Esawu aachuna osepa yeeyo. (Map. 15:13) Esawu tho aahaathela athiyana yahaamulapela Yehova. (Map. 26:34, 35) Moohiyana ni Yakopo, yoowo aalakelenle othelana ni kapuro oororomeleya a Muluku!—Map. 28:6, 7; 29:10-12, 18.
(Maphatxuwelo 26:7) Alopwana a elapo yeele yaanamukoha sa mwaariye nave yoowo aanaakhula wi aari munnawe, oovaha wiiphiwa wi ehale ni Repeka vawi aatepa oreera.
it-2 epaax. 808 epara. 5
Wootha
Woona wi Piipiliya haneemererya wootha, eyo henataphulela wi muchu ookhalano owerya wa olokoha miyaha wa yaale ahirino ophwanelela osuwela. Yesu oovaha ekano: “Muhaannyeke alapwa yeeyo eri yaweelihiwa, nari muhiriheleke wa ikupa maluku anyu ookhweleyasha, wi ikupa iho ihinyikale nari alapwa yaarukunuwaka, ehoolumeeni.” (Mat 7:6) Ti nthowa nene Yesu, ikwaha ikina, ikasoopeiye omwaramwaxa miyaha naari waakhula makoho mooluluwanya, wa yeeyo yaahaala okumiherya namvutuka. (Mat 15:1-6; 21:23-27; Yoh 7:3-10) Mwawooneya, moonelo wa Aparahamu, Isaki, Rahapi ni Eliseu, mu ohilokoha naari omwaramwaxa miyaha wa yaale yahaamulapela Yehova, ennathokororyiwa mmukhalelo mmohamoha.—Map 12:10-19; ekapitulu 20; 26:1-10; Yos 2:1-6; Tiy 2:25; 2Mam 6:11-23.
23-29 A MARSU
MUHAKHU WA MASU A MULUKU | MAPHATXUWELO 27-28
“Yakopo Onnaakhela Mareeliho Oophwanelela”
(Maphatxuwelo 27:6-10)
w04 15/4 epaax. 11 ipara. 4-5
Repeka Aari Muthiyana Oowetha Aamoova Muluku
Piipiliya hanaloca waakhanle wi Isaki aanasuwela wi Esawu aahaala omulapaka Yakopo. Mmukhalelo mukina, Repeka naari Yakopo yaanasuwela wi mareeliho yaahaala okhala awawe. Hiiha, Repeka aanasuwela vaava iiwaleiye wi Isaki aanachuna omureeliha Esawu vaava owo aahaaleiye orehererya yoolya. Owo haayelenle moonelo ni mvai yoowo wooneiha omiravo awe. Owo aamuruma wi Yakopo amuruuhele ipuri piili. Owo aahaala orehererya yoolya yeeyo aiyawe yaasiveliwaayano. Voocharela, Yakopo aaphwanela wiipaka ntoko Esawu wi aakhele mareeliho. Yakopo aavaanya. Atiithi awe mweeparipari yaahaala osuwela wootha weiwo nave tho yaahaala omuulumela! Repeka aamutiteliha: “Kuulumeliwe miyaano mu nipuro naa, mwanaka,” owo aaloca. Voocharela owo aapaka yoolya, aanwariha Yakopo soowara sa Esawu nave amuruma oya wa aiyawe.—Map 27:1-17.
Piipiliya hanathariha ntakhara heeni Repeka eenreiyeno yeela. Akina annaakaaha meerelo awe, nyenya Piipiliya haneerano yeeyo, naari vakhaaniru mano Isaki haanyeenyen’ye vaava aasuwenleiye wi Yakopo aahaakhela mareeliho. (Map 27:29; 28:3, 4) Repeka aanasuwela tiheeni Yehova aalohenryeiye vooloca sa anamwane awe. Mwa yeeyo eenreno yeela wi ooniherye wi Yakopo aakhele mareeliho yaawo yaamphwanela. Eyo yaari mwawiiwanana ni yookhwela ya Yehova.—Aro 9:6-13.
(Maphatxuwelo 27:18, 19)
w07 1/10 epaax. 31 ipara. 2-3
Makoho a Alipa Waalakhanya
Piipiliya hanavahererya sooleeliherya soothene vooloca sa Repeka ni Yakopo mathowa ene yaaweerinhe weerano mmukhalelo yoola, nyenya onathariha wi yaweereya ela yeeren’ye moohiwehereryeya. Nnanwerya woona wi Masu a Muluku haneemererya naari othoriha yeeyo Repeka ni Yakopo yenraaya, ehivahereryaka moonelo wa wootha naari owoka. Mwawiihiiha, Piipiliya annavahererya sooleeliherya sookwakwaleya vooloca sa mwaha yoola.
Voopaceryani, yaweereya ennahiya vanlakamvene wi Yakopo aakhalano ophwanelela waakhela mareeliho wa a tiithi awe, nyenya Esawu hooye. Vaculi vaya, Yakopo aathuma ophwanelela wa mwaana oopacerya wa mukhweiye oohithamalela amaphapo, yoowo aamutumihenre ni yoolya wi ipheno etala. Esawu “aanyemula otokweene awe.” (Map 25:29-34) Mwawiihiiha, waaphiyerya atiithi awe, Yakopo aavya mareeliho yaawo yamuphwanela.
(Maphatxuwelo 27:27-29)
it-1 epaax. 332 epara. 5
Mareeliho
Muceche yoowo achu yaamulapela Yehova, tiithi aanakhovelela waareeliha anamwane awe ahaakumve okhwa. Waari mwaha woochuneyaxa, nave waanathokororyiwa vancipale. Hiiha, Isaki aamureeliha Yakopo, uupuwelaka wi owo aari mwaana awe oopacerya oyariwa, Esawu. Isaki aaloca wa Yakopo wi aamukhalano muhakhu muncipale, vahoolo wa munnawe Esawu, moohikhwa minikwa apakaka yooveka yeela wa Yehova wi akhwaanyiherye mareeliho yaala, woona wi Isaki aari eevaasi ni awunnuwelavo. (Map 27:1-4, 23-29; 28:1, 6; Ahe 11:20; 12:16, 17) Ohoolo waya, Isaki, ni yawuupuxerya-ya-murima-yaphaama, aaheemererya nave innuwiha mareeliho yaawo. (Map 28:1-4) Ahaakumve okhwa, Yakopo aahaareeliha anamwane eeli a Yosefe, voocharela, anamwane awe. (Map 48:9, 20; 49:1-28; Ahe 11:21) Moolikana, Mose, ahaakumve okhwa, aareeliha nloko ntokweene na Aisarayeli. (Malam 33:1) Mu saweereya seiha, sookhumelela sinnooniherya wi awo yaaloca mooloherya. Mmikhalelo mikina, woovahererya mareeliho yaala, ntata na mulipa ooreeliha naanakuhiwa vamuru wa yoole aareelihiwa.—Map 48:13, 14.
Mphwanye Muhakhu Woomunepani
(Maphatxuwelo 27:46–28:2)
w06 15/4 epaax. 6 ipara. 4-5
Muni Mulocihaneke Hai ni Oothelana Anyu?
Mpwanne Isaki ni Repeka yaahunnuwiha olocihana waphaama? Amanle mwaana awe, Esawu, ni anamwane awe apiili aasithiyana o Hete, naakhumelela nikacamiho ntokweene va echoko. Repeka aaloca ni Isaki: “Koosokonyereya ni athiyana yaala a aHeeti . . . Yaakopo amuthela muthiyana eelapo yeela, muHeeti, miyo kinii kikhwe.” (Map 26:34; 27:46) Ti yawooneya wi owo aahooniherya wuukhuwa wawe.
Isaki aaloca ni Yakopo, munna oomaphapo Esawu, wi ahimuthele muthiyana mmoha a Okaanani. (Map 28:1, 2) Eyo ennooniherya wi Repeka aawerya ohiya moonelo awe mookwakwaleya. Mutheli ola yaahiiwanana phaama vaava yaathokororyaaya nikacamiho mu echoko, evahaka yootakiherya yaphaama wa hiyaano. Hanka wakhala wi mutheli hanawerya ophwanya makuchuwelo oophwanelela? Tiheeni enaphwanela weeriwa?
(Maphatxuwelo 28:12, 13)
w04 15/1 epaax. 28 epara. 6
Miyaha sa Vasulu Sinarweela mu Liivuru a Maphatxuwelo—II
28:12, 13—Teevi yaari yootaphulela ya yooloha ya Yakopo vooloca sa “eshikata yeemeshiwe?” “Eshikata” yeela akhweya yooneya wi ti yoothitimana erino makupa oowela ni okhuruwa ya maluku, yooneiherya wi waakhalavo olocihana orweela wirimu ni veelaponi ya vathi. Moorweela wa owoona ankeelo a Muluku ewelaka naari ekhuruwaka wa yoowo ennooniherya wi ankeelo aakhalano murici woochuneyaxa olapa ni Yehova ni achu yaawo erino weemereryiwa ni yoowo.—Yoh 1:51.
30 A MARSU–5 A APIRILI
MUHAKHU WA MASU A MULUKU | MAPHATXUWELO 29-30
“Othela wa Yakopo”
(Maphatxuwelo 29:18-20)
w03 15/10 epaax. 29 epara. 6
Yakopo Aanacicimiha Ichu Soomunepani
Muteko waalampwa wa muchu aachuna othela, waaliviwa mwawiiwanana ni yooveka ya amusi a muthiyana aayeiye omuthela. Ohoolo waya, Nlamulo na Mose naahiloca ikhorowa saaphwanela oliviwa, saanaakhwana isiikulu 50 sa eparata wi atheliwe mwali, seiho moovira wa elukuluku saavukuliwa. Muhusiha Gordon Wenham onoona wi “ela yaari yamahala etokweene mu othela” yaaphwanela oliviwa, yeeyo mu ikwaha sincipale “saari savakhaani.” (Malam 22:28, 29) Nyenya Yakopo haaphwanela oliva. Naamwiihiiha aahiivaha omulapa Lapani mu iyaakha thanu napiili. “Woona wi anamalapa ikwaha ikina yaanaakhela eparata emoha variyari va mweeri mu ilukuluku sa Apapulu” (42 ophiyerya isiikulu 84 sa eparata mu iyaakha thanu napiili), Wenham onnaaceererya ari, “Yakopo aamvaha Lapani yamahala ya othela mmatani mwa Rakeli.” Lapani aaheemererya ni murima woothene.—Map 29:19.
(Maphatxuwelo 29:21-26)
w07 1/10 ipaax. 8-9
Yaweereya Yookacamiha ya Athiyana Oomayi Omoha “Yaayanre Anamwane Ancipale mu Emusi ya Yakopo”
Apwanne Liya alakelenle onwoka Yakopo? Naari pahi aakhinyereriwe owiiwelela atiithi awe? Nave Rakele aari woowi? Apwanne aanasuwela yeeyo yeereya? Waakhanle wi aanasuwela, onne ahi? Aahaala okhoromaniha yookhwela ya atiithi awe? Piipiliya hanaakhula makoho yaala. Yeeyo Rakele ni Liya yaahoolenlaaya, yaari meerelo ooruwana wa Yakopo. Nave aari Lapani Yakopo aalonceiyeno: “Kaalapa wi mukinnye Rakele, ntakhara sheeni okiwoka?” Lapani aahaakhula: “Tiwi, elapo ahu yeela hiniikhovelenle otheliwa mwaana mukhaani, ahiiwa mutokotoko. Nto mukhwaaniherye mahiku mathanu namiili a othela ola, munammukusha tho mukina wi mmuthele, mweemereryaru okilapa muyaakha mikinaku mithanu namiili.” (Map 29:25-27) Mmukhalelo yoola, Yakopo aakhinyeereryeya waaceya yoowo waahaala okumiherya ehace etokweene.
it-1 epaax. 459 epara. 4
Othela
Efesta ya othela. Naamwi meerelo a othela wahaari woochuneya weeriwavo echu yavameekhaaya, ifesta sa othela o Isarayeli, sakhala ilukuluku soohakalaliha. Mu nihiku nootheliwa, vaate vawe, mwali aanapaka marehereryo avameekhaaya. Yoopacerya, owo aanarapa ni aaniicikichela makhurwa. (Mulikanyihe ni Rut 3:3; Ezek 23:40.) Ikwaha ikina, akhaviheriwaka ni athiyana akina, owo aanawara yoowara yaweela ya othela, nave yaari yawunlaana okhala yoosoniwa phaama, mwawiiwanana ni owerya wawe. (Yer 2:32; Wup 19:7, 8; Sal 45:13, 14) Owo aanawara soowara sooreera, wakhala wi ookhalano owerya (Isa 49:18; 61:10; Wup 21:2), nave aaniikhuneela ni ekuwo yooveya, ntoko evewu, yeeyo yaakhuneela muru ophiyerya mmeconi. (Isa 3:19, 23) Ela ennooniherya ntakhara heeni Lapani aawerya onwoka mookhweya Yakopo, ophiyerya wi Yakopo haasuwela wi Lapani amvanhe Liya, omuhiya Rakele. (Map 29:23, 25) Repeka aakhuneela muru awe ni ekuwo vaavaa aamwaacameleiye Isaki. (Map 24:65) Eyo yaasiphela wiiwelela wa mulipa ootheliwa wa yoowo aahaaleiye othelanano—otokweene awe.—1Kor 11:5, 10.
(Maphatxuwelo 29:27, 28)
Mphwanye Muhakhu Woomunepani
(Maphatxuwelo 30:3)
it-1 epaax. 52
Mwaana Oohimuyara
Rakele ni Liya yawoona anamwane yaayariwe ni Yakopo orweela wa akapuro aya ntoko anamwane aya, ‘eyariwe orweela mmeconi mwaka.’ (Map 30:3-8, 12, 13, 24) Anamwane awo yaari muyareriwo vamoha ni anamwane a asaariye Yakopo. Yaari anamwane ookhweleyaxa a atiithinya, nave akapuro awo yaari yamahala wa asaariye, Rakele ni Liya yaakhalano ekari ya okhala asineene a anamwane awo.
(Maphatxuwelo 30:8, 24, 25)
Mutitelele Owaniha wi Mwaakhele Mareeliho a Yehova
Mwaara a Yakopo, Rakele, aanawerya tho woona mukhalelo Yehova eereiye akhwaaniherye yeeyo aamulaihenryeiye iyawe. Nyenya naakhalavo nikacamiho. Rakele haawerya okhalano anamwane. Mu ilukuluku sakhalai, eyo yaanaathananiha vancipale athiyana. Rakele aatitelenle hai owaniha moohipwacha mukhalelo awe wooceecheiha? Rakele haayelenle ewehereryo. Moohiyana, owo aatitelela owaniha moorweela wa ovekela wa Yehova ikwaha sincipale. Yehova aawiriyana nivekelo neeparipari na Rakele, nave aahiisoona okhala ooreelihiwa vaavaa aareiyeno anamwane. Ti nthowa nene aalonceiye: “Kòtepa owana . . . nto kòvòtha.”—Map 30:8, 20-24.