Yooloherya Yeeyo Eri Yoochuneya wa Nyuwaano

1. Tiheeni Yehova eenreiye Atamu ni Haava emanle ocheka? (Maphatxuwelo 3:15)

ATAMU ni Haava emanle ocheka, Yehova aahaavaha anamwane aya ewehereryo yootikhiniha moorweela wa yooloherya yoochuneya. Yeeyo owo olonceiye enaphwanyeya mu Maphatxuwelo 3:15.—Mwaalakhanye.

2. Ntakhara heeni yooloherya yeela ti yoochuneya?

² Yooloherya enaphwanyeya mu liivuru oopacerya a Mpiipiliyani. Nyenya aliivuru akina a Mpiipiliyani anniiwanana ni yooloherya yeela mmukhalelo mmoha. Hiiha ntoko makupa anacopaanyera ipapeli sa liivuru awiimprimiiriwa, masu analociwa mu Maphatxuwelo 3:15 anniiwananiha sooleeliherya sa liivuru ti liivuru a Mpiipiliya wa muchaka mmoha wawi, Moopoli aahaala orumihiwa wi amutoloxe Musaserya ni oomuchara awe oothene.b Ela enahaala okhala yoohakalaliha wa yaale anamusivela Yehova!

3. Tiheeni nnahaalaahu othokororya mmwaha yoola?

³ Mmwaha yoola, nnahaala waakhula makoho anacharela vooloca sa yooloherya ya Maphatxuwelo 3:15: Taani analociwa vaavaa? Yooloherya yeela yaakhwanenle hai? Nave ti mwawiihai nnaphuraahu moorweela wa yeela?

TAANI ANALOCIWA MU YOOLOHERYA?

4. “Enowa” taani, nave nnasuwela hai yeeyo?

⁴ Anaromoliwa mu yaweereya enaphwanyeya mu Maphatxuwelo 3:14, 15 anaphitaanyerya: “enowa,” “anamwane” a enowa, “muthiyana,” ni “mwaana” a muthiyana. Piipiliya onnanikhaviherya omusuwela mmoha ti mmoha a yaawo.c Hankooni nipacerye ni enowa. Enowa yeeparipari hiyaahaala wiiwexexa yeeyo Yehova aalonceiye mu emaca ya Eteni. Mwawiihiiha othoriha wa Yehova waaya wa yoopatuxiwa ya miruku. Yoopatuxiwa taani? Wupulula 12:9 onnathariha mookwakwaleya vooloca sa taani ori enowa. Yoorepa yeela enaloca wi “enowa yakhalayi” ti Satana Musaserya. Vano anamwane a enowa taani?

5. Taani ari anamwane a enowa?

⁵ Vaavaa Piipiliya onaloceiye sa anamwane mmukhalelo woolikanyiha, owo onawaaha yaale aneerano ni wuupuwela ichu mmukhalelo ntoko tiithi aya oosiphela. Mwawiihiiha anamwane a enowa anaahiwa soopatuxiwa soomunepani ni achu yaawo moolikana ni Satana, anamukhooca Yehova Muluku ni owiica achu awe. Awo anaphitaanyerya ankeelo yaawo yaahin’ye mirici saya wirimu mmahiku a Nowa ni achu oonanara murima yaawo anapaka ichu moolikana ni tiithi aya Musaserya.—Map. 6:1, 2; Yoh. 8:44; 1 Yoh. 5:19; Yuda 6.

6. Ntakhara heeni muthiyana aahaaphwaneleiye okhala Haava?

⁶ Vano nnahaala omusuwela muthiyana. Owo haahaala okhala Haava. Ntakhara heeni? Muthokororye nthowa nimoha pahi. Yooloherya enaloca wi mwaana a muthiyana aahaala ‘ophoreiha’ naari onyaanya muru wa enowa. Hiiha ntoko nthokoronryaahu, enowa yoopatuxiwa yoomunepani yoowo ori Satana nave haavo muchu oohiphaameya a muyareriwo wa muthiyana aahaala owerya omunyaanya yoowo. Vano ti mwawiihai Satana aahaaleiye otoloxiwa?

7. Ntoko yooniheryiwaaya mu Wupulula 12:1, 2, 5, 10, taani ori muthiyana yoowo onalociwa mu Maphatxuwelo 3:15?

⁷ Muthiyana onalociwa mu Maphatxuwelo 3:15 onnuupululiwa mu liivuru ookuchula a Mpiipiliyani. (Mwaalakhanye Wupulula 12:1, 2, 5, 10.) Ola tahi muthiyana a veelaponi yavathi! Owo ookhalano mweeri ori vathi va inaani sawe ni ekhara ya itheneeri 12 eri vamuru vawe. Owo aahimuyara mwaana ootikhiniha—Omwene wa Muluku. Omwene ori wirimu, mwawiihiiha muthiyana owo onaphwanela tho okhala wirimu. Owo oneemelela makupa a wirimu a marehereryo a Yehova ari ankeelo awe oororomeleya.—Gal. 4:26.

8. Taani ori nikupa noopacerya na muyareriwo wa muthiyana, nave ti liini owo okhanleiye? (Maphatxuwelo 22:15-18)

⁸ Masu a Muluku annanikhaviherya tho omusuwela voopacerya mwaana oopacerya a muthiyana. Mwaana aaphwanela okhala a muyareriwo wa Aparahamu. (Mwaalakhanye Maphatxuwelo 22:15-18.) Ntoko yaaloheryiwaaya, Yesu aari a muyareriwo wa nikholo nenla noororomeleya. (Luka 3:23, 34) Nyenya mwaana aaphwanela okhala akuruxa ompwaha muchu woona wi owo aahaala omutoloxa Satana Musaserya. Mwawiihiiha, vaavaa Yesu aareiyeno iyaakha 30, owo aathanliwa ntoko Mwaana oomunepani a Muluku. Vaavaa aathanliweiye, Yesu aakhala nikupa noopacerya na muyareriwo wa muthiyana. (Gal. 3:16) Yesu amanle okhwa ni oviihiwa mookhwani, Muluku ‘aanwariha yoowo ncicimiho ni ovuwa’ nave aamvaha yoowo “owerya woothene woolamula, wirimu ni veelaponi ya vathi,” ophitaanyerya owerya “wi anyaanye miteko ya musaserya.”—Ahe. 2:7; Mat. 28:18; 1 Yoh. 3:8.

9-10. (1) Taani ari nikupa nanaawiili na muyareriwo wa muthiyana nave ti liini awo akhanlaaya? (2) Tiheeni nnahaalaahu ohuserya voocharela?

⁹ Nyenya ohiya pahiru Yesu, akina yaahaala okhala nikupa nanaawiili na muyareriwo. Murummwa Paulo aahiloca makupa a muyareriwo yoola vaavaa aalonceiye wa Akristu oothanliwa yaawo yaari Ayuta ni yaawo yaari amalapo ariki: “Mwaari achu awe Kristu, chiri muri nloko na muhoolo na Aaparahamu, munaweherya waakhela mareeliho aroromelihiwe.” (Gal. 3:28, 29) Vaavaa Yehova onamuthanleiye Mukristu ni munepa waweela, muchu owo onnapaka makupa a muyareriwo wa muthiyana. Mwawiihiiha anapaka makupa a muyareriwo wa muthiyana ti Yesu Kristu ni a 144.000 yaawo anaya olamulela ni yoowo. (Wup. 14:1) Oothene awo anniilipiserya wuupuwela ni weerano ichu hiiha ntoko Tiithi aya, Yehova Muluku.

¹⁰ Vanonto nimanlaahu waasuwela achu yaawo enalociwa mu Maphatxuwelo 3:15, nnahaala ohuserya tiheeni Yehova eenreiye wi aakhwaniherye yooloherya yeela ni mukhalelo nnaphuraahuvo.

TIHEENI YEHOVA EENREIYE WI YAAKHWANELE YOOLOHERYA?

11. Mmukhalelo taani muyareriwo wa muthiyana waahaalaaya ophoreihiwa nchica?

¹¹ Mwawiiwanana ni yooloherya enaphwanyeya mu Maphatxuwelo 3:15, enowa yaahaala ophoreiha “nchica” na muyareriwo wa muthiyana. Ela yaahaakhwanela vaavaa Satana aapharihenleiye Ayuta ni Aroma wi emwiiphe Mwaana a Muluku. (Luka 23:13, 20-24) Hiiha ntoko nikhwaca neeparipari nnakhala va nchica nnamweerihaaya muchu ohiwerya weeca, okhwa wa Yesu mu elukuluku tonto waamuhiiha owo opaka echu vyakala nave owo aakhala o mahiye mahiku mararu.—Mat. 16:21.

12. Ti mwawiihai nave ti liini muru wa enowa onahaalaaya onyaanyiwa?

¹² Yooloherya enaphwanyeya mu Maphatxuwelo 3:15 ennooniherya wi Yesu haahaala otitelela okhala mmahiyeni. Ntakhara heeni? Nthowa nawi mwawiiwanana ni yooloherya, muyareriwo wa muthiyana waahaala onyaanya muru wa enowa. Ela enataphulela wi Yesu aahaala oviihiwa mookhwani. Nave mweeparipari owo aaviihiwa mookhwani! Mu nihiku naneeraru Yesu amanle okhwa, owo aaviihiwa mookhwani ntoko yoopatuxiwa yoohikhwa yoomunepani. Mu elukuluku yoophwanelela ya Muluku, Yesu onahaala omutoloxa Satana moomalela. (Ahe. 2:14) Kristu vamoha ni yaawo anahaala olamulela ni yoowo anahaala waatoloxa amwiicani a Muluku, ela tiwi muyareriwo wa enowa.—Wup. 17:14; 20:4, 10.d

TI MWAWIIHAI NNAPHURAAHU ORWEELA WA YOOLOHERYA YEELA?

13. Nnaphuravo hai orweela wa waakhwanela wa yooloherya yeela?

¹³ Mwaari mulapeli a Muluku, munnaphura orweela wa waakhwanela wa yooloherya yeela. Yesu aarwa veelaponi yavathi ntoko muchu. Owo aahitakiherya phaameene mikhalelo sa Atiithi awe. (Yoh. 14:9) Mwawiihiiha, orweela wa Yesu ninnamusuwela ni omusivela Yehova Muluku. Ninnaphura tho orweela wa mahusiheryo a Yesu ni ohoolela wawe muloko Weekristu olelo. Owo oonihusiha mukhalelo wa opharihela okumi ahu onahaala omuhakalaliha Yehova. Nyenya nthowa na Yesu ophoreihiwa nchica naari okhwa, oothene ahu ninnaphuravo. Mwawiihai? Amanle Yesu oviihiwa mookhwani, Yehova aaheemererya mukucho woophaameya wa Mwanawe yoowo ‘onanrapiha wa soocheka soothene.’—1 Yoh. 1:7.

14. Nnasuwela hai wi yooloherya Yehova aalonceiye mu Eteni hiyaawaakhwanenle mu elukuluku yeele? Mutharihe.

¹⁴ Yeeyo Yehova aalonceiye mu emaca ya Eteni yaahooniherya wi hiyaahaala waakhwanela mu elukuluku yeele. Yaahaala oviravo elukuluku wi muthiyana amuyare mwaana oolaiheryiwa, wi Musaserya aathukumanye oomuchara awe ni wi okhalevo wiicana variyari va makhuuru yaala meeli. Hiyaano ninnaphura osuwela yooloherya yeela ntakhara ela ennanlopola wi elapo enalamuleliwa ni Satana yaahaala owiicaka alapeli a Yehova. Ohoolo waya Yesu aavaha olopola woolikana wa oohuserya awe. (Mar. 13:13; Yoh. 17:14) Mweeparipari hiyaano nohoona waakhwanela wa makupa a yooloherya yeela, xaxaxa mu iyaakha nsana ivirale. Mwawiihai?

15. Ntakhara heeni elapo enaniicaaya vancipale nyenya ntakhara heeni nihiryaahuno mathowa a omoova Satana?

¹⁵ Elukuluku vakhaani Yesu amanle otikitheryiwa ntoko Mwene oothanliwa mu 1914, Satana aahiikariwa wirimu. Hiihava owo onakhala waacamela veelaponi yavathi, awehereryaka otoloxiwa wawe. (Wup. 12:9, 12) Nyenya owo harimoona omaala. Satana haano ewehereryo nave moosarasareya onnaahiphela achu a Muluku. (Wup. 12:13, 17) Wa nthowa na yeela elapo enamvira ewiicaka achu a Muluku. Naamwiihiiha, hiyaano hinaano mathowa a omoova Satana vamoha ni yaawo anamuchara. Moohiyana, nnanwerya okhalano nroromelo nimohamoha ntoko na murummwa Paulo yoowo orempe: “Muluku akhala wa hiyo, taani anii aniwerye?” (Aro. 8:31) Nnanwerya omuroromela Yehova ni murima ahu woothene, woona wi ntoko noonnaahu, makupa mancipale a yooloherya enaphwanyeya mu Maphatxuwelo 3:15 ahaakhwanela.

16-18. Ti mwawiihai Curtis, Ursula ni Jessica aphunryaaya orweela wa wiiwexexa yoorepa ya Maphatxuwelo 3:15?

¹⁶ Yoororomeliha ya Yehova enaphwanyeya mu Maphatxuwelo 3:15 enanwerya onikhaviherya vaavaa nnakumanaahu ni makacamiho mu okumi ahu. Curtis yoowo onarumeela ntoko misiyonaariyo o Guam ooloca: “Soheereya ichu mu okumi aka seiho seerinhe okhala woovila wa miyaano otitelela okhala oororomeleya wa Yehova. Nyenya wuupuwelela yaweereya enaphwanyeya mu Maphatxuwelo 3:15 yookikhaviherya okhala oororomeleya wa Tiithi aka a wirimu.” Curtis onnawehererya nihiku nenlo Yehova oneereiye amalihe makacamiho ahu oothene.

¹⁷ Murokora Ursula onakhala o Bavaria ooloca wi Maphatxuwelo 3:15 oomukhaviherya okhala oolekecheya wi Piipiliya oveereliwe ti Muluku. Owo aahoona mukhalelo sooloherya ikina iniiwananaaya ni yooloherya yeela nave aahitikhiniheyaxa ni yeela. Owo tho ooloca: “Vaavaa kaahusenryaaka wi Yehova aaheeravo echu mwawaakuveya wi anivahe ewehereryo, kaahoona wi Yehova onnakisivela vancipale.”

¹⁸ Jessica o Mikronesiya ooloca: “Nlelo kinnuupuwela mukhalelo kaakhanlaaka vaavaa kaasuwenlaaka wi koophwanya eparipari! Yooloherya enaphwanyeya mu Maphatxuwelo 3:15 yaanaakhwanela. Yooloherya ela yookikhaviherya woona wi tahi yeeyo Yehova aachuneiye wa hiyaano. Yooloherya yeela tho yoolipiha nroromelo naka wi omurumeela Yehova onnavaha okumi waphaama hiihaano ni okumi waphaamaxa muhoolo.”

19. Ntakhara heeni nnaphwanelaahu ororomela wi nikupa nookuchula na yooloherya nnahaala waakhwanela?

¹⁹ Ntoko noonnaahu, Maphatxuwelo 3:15 nlelo onnaakhwanela. Muyareriwo wa muthiyana ni muyareriwo wa enowa wootharihiwa mookwakwaleya. Yesu, yoowo ori nikupa noopacerya na muyareriwo wa muthiyana, nchica nawe noovola nave vano owo Mwene oowerya ni oohikhwa. Vano othanliwa wa yaale anaya olamulela ohanle vakhaani waakhwana. Woona wi nikupa noopacerya na yooloherya yeela nohaakhwanela, nookhalano mathowa oophwanelela wi nikupa nookuchula, na onyaanyiwa muru wa enowa onahaala waakhwanela. Alapeli a Muluku anahaala ohakalala vaavaa Satana onahaaleiye otoloxiwa! Ophiyerya elukuluku yeeyo, nihivelavele. Muluku ahu toororomeleya. Moorweela wa muyareriwo wa muthiyana, owo onahaala oruuha mareeliho oohaalakhanyeya wa ‘achu oothene a veelaponi yavathi.’—Map. 22:18.