Yesu “Aahuserya Wiiwelela”

Ilukuluku soothene Yesu aanamwiiwelela Yehova. (Yoh. 8:29) Mwawiihiiha, ntakhara heeni Piipiliya onaloceiye wi: “Owo aahuserya wiiwelela mwa ichu aahooxen’yeiyeno”?—Ahe. 5:8.

Vaavaa aareiye veelaponi yavathi, Yesu aahihoolela mikhalelo seiho owo aahihoolenleiye ari wirimu. Ntoko yootakiherya, asitiithi awe yaari oororomeleya wa Yehova, nyenya yaari oohiphaameya. (Luka 2:51) Owo aahihooxeya vaavaa aavileleiye ni ahooleli a malapelo a makhwankwa ni alamuleli oohookololowa. (Mat. 26:59; Mar. 15:15) Ohiya yeeyoru, owo “aahiiyeviha nave akhala awiiwelela ophiyerya okhwa,” chiryene okhwa wawiicelaxa.—Afi. 2:8.

Soothene seiya saahimuhusiha Yesu okhala awiiwelela mmukhalelo muvyaani wa yoowo. Mwawiihiiha, owo onanwerya okhala Mwene ni Mulipa a Mukucho Mutokweene oophaameya, oowerya wiiwexexa miyoonelo sahu. (Ahe. 4:15; 5:9) Amanle ohuserya wiiwelela orweela wa ichu seiyo aahooxen’yeiyeno, Yesu aahikhala oochuneyaxa ni oophariheleya wa Yehova. Emohamoha tho enanwerya weereya ni hiyaano. Wakhala wi nootitelela omwiiwelela Yehova moohipwacha mikhalelo soovila, nnanwerya okhala oochuneyaxa wa Yehova ni okhala oophariheleya mu etesikinasau vyakala yeeyo owo onanivaheiye.—Tiy. 1:4.