“Ohòve, Kiri va, wi Kokhaviherye!”

MWAANYIHERYE wi munamweeca ohiyu eriyari. Mootutuxa munnamoona muchu oocharakaani oculi. Vaavaa muneemelaanyu, owo tho onneemela. Vaavaa munaakuvaanyu, owo onnaakuva. Moovaka munnachimakela vaate va nthamwenaanyu ori vakhiviru. Vaavaa nthamwene anyu onahuleiye mulako ni awaakhelaani, nyuwaano munnakhala awaakiheya.

Akhweya nyuwaano hamwitonko ophwanyeya mmukhalelo yoola. Nyenya nyuwaano mookhalano sawuukhula ikina mookumaanyu seiho sinoothananihani. Ntoko yootakiherya, munnawaniha ni sooceecheya sanyu seiho munachunaanyu ovootha nyenya nlelo hamunawerya? Mooyeleela muteko mu iyaakha sincipale nyenya nlelo hamunawerya ophwanya muteko mukina naamwi mwiilipixeryaka waavya? Nyuwaano munnoova wuuluvala naari makacamiho a ekumi anahaala okhumelelaka omwaahiyu? Naari yookhalavo echu ekina munoovaanyu?

Moohipwacha makacamiho munakumanaanyuno, ti yaphaama okhalano nthamwene yoowo muneeraanyu mmuleeleke ni onii anookhaviheryaani. Nyuwaano mookhalano nthamwene ntoko yoowo? Aai mookhalano! Yehova nthamwenaanyu aphaama hiiha ntoko aakhanleiye nthamwene wa mulopwana a nroromelo Aparahamu, ntoko enalociwaaya mu Isaiya 41:8-13. Eciciri 10 ni 13 Yehova onnaroromeliha wa muchu ti muchu a hiyo: “Ohòve, miyano kiri ni weyano. Ohithananeke, miyano ka Muluku à. Kinnolipiha, kinnokhaviherya, kinnawakiha ni mata aka a ikuru. Miyano ka Apwiya, Muluku à, miyano kinnopharela ntata kiriki: Ohòve, kiri va, wi kokhaviherye!”

“KINNAWAKIHA”

Masu a Yehova annanihakararya. Muupuwele tiheeni Yehova onanroromeliheiye. Eciciri ela henaloca wi nyuwaano muneeca waacamela Yehova ookonle ntata nawe. Waakhanle wi muneeca waacamela yoowo, ntata noolopwana na Yehova naahaala opharela ntata nanyu noothiyana. Ohiya yeeyo, owo ori ohoolo wanyu ookonle ‘ntata nawe nakuru’ nave ‘apharele ntata’ nanyu noolopwana wi awaakiheeni mmakacamiho. Vaavaa Yehova onaphareleiye ntata nanyu noolopwana, owo onnoolipihaani ariki: “Ohòve, kiri va, wi kokhaviherye!”

Nyuwaano munnamoona Yehova ntoko Tiithi anyu oosivela ni Nthamwene? Nyuwaano munneemererya wi owo onahaala wookhaviheryaani vaavaa munahoolelaanyu makacamiho? Yehova onnoothokororyaani nave onnachuna wookhaviheryaani. Vaavaa munahoolelaanyu makacamiho, Yehova onnachuna wi mutaphuwe. Ntakhara heeni? Ntakhara owo onnoosivelaani vancipale. Owo chiryene “yokhaviherya yophwanyeryiwa khuluwi m’masoso.”—Salmo 46:1, Nlakano Nahihano.

VAAVAA NNIISOONAAHU OKHALANO NTHOWA WA SOOHESA SA KHALAI

Ancipale annatitelela wuupuwelela soohesa saya sa khalai nave anniikoha waakhanle wi Muluku ohaakhurumuwela. Wakhala wi nyuwaano munoona hiiha, mmuupuwele Yupu mulopwana a nroromelo. (Yobi 13:26) Namarepa a salumu Tavite anniisoona mmukhalelo mmohamoha ophiyerya amveka Yehova ariki: “Muhùpuwele sotxheka sa womiravoni waka.” (Salumu 25:7) Woona wi naachu oohiphaameya, “atxhu othene àtxheka ni àthoiwa ovuwa wa Muluku.”—Aroma 3:23.

Masu anaphwanyeya mu Isaiya 41 yaarempwe wi yaahakararye Aisarayeli. Soocheka saya saari itokweene ophiyerya Yehova aloca wi aahaala waathoriha moorweela wa waaveleela mmatani mwa Apapulu. (Isaiya 39:6, 7) Mweelukuluku emohamoha, owo aaloca wi aahaala owoopola yaale yaahaala ocharuwa wi ekookele wa yoowo! (Isaiya 41:8, 9; 49:8) Yehova onnooniherya ikharari ni epewe emohamoha wa yaale anacharuwa soocheka saya ni omucicimiha yoowo.—Salumu 51:3.

Muthokororye yaweereya ya Takuya,a yoowo achuna ocharuwa yookhovelela awe yoonanara ya woona epwitikiri ni oceha. Mu mahiku mancipale owo aaneerano yookhovelela awe yeela. Nyenya iisoona hai? Owo onnaloca: “Kiisoona ohikhala a mphurelo, nyenya vaavaa kaamwaacamenlaaka Yehova mu nivekelo kivekaka nikhurumuwelo, owo aakihakararya.” Yehova eenreno hai yeeyo? Atokweene a muloko wa Takuya yaamuceenyerya wi alokohe orweela mu telefone wakhala wi oheerano wanaawiili. Owo onnaloca: “Hiwaari wookhweya waaleela, nyenya ilukuluku soothene kaalokohaaka, kaanalipiheya.” Voocharela atokweene yaapaka marehereryo wi ooweherya a ekulucu amuxekurye Takuya. Ooweherya a ekulucu aaloca wa Takuya: “Tahi wi koonne orwa. Koorwa nthowa nawi atokweene tachunne wi kooxekurye. Awo anachuna wi weyaano waakhele nikhaviheyro.” Takuya aaloca: “Miyaano kichenke, naamwi hiiha, Yehova ohaarumi atokweene wi ekikhaviherye.” Vakhaani vakhaani, Takuya aacharuwa sookhovelela sawe soonanara, akhala piyoneero a elukuluku yoothene, nave hiihaano owo onarumeela o Peteli. Hiiha ntoko Muluku omukhavihenryeiye munna ola, owo tho onahaala wookhaviheryaani vaavaa munahesaanyu.

VAAVAA NNAKHALAAHU AWUUKHUWA NTHOWA NA MUTEKO

Ancipale annakhala awuukhuwa nthowa nawi aayeleela muteko aya, nave hanawerya ophwanya mukina. Okhoociwa ti mapatarau mancipale echu yoonanara. Vaavaa muchu onahooleleiye makacamiho yaala, onniisoona ohikhala echu. Mmukhalelo ntoko yoola, Yehova onii ookhaviheryeeni hai? Akhweya owo hanii oovaheeni muteko waphaama mwawaakuveya, nyenya owo onanwerya wookhaviheryaani wuupuwelela masu a Tavite: “Kàri mmiravo, vano kohuluvala; nkintonko omòna awokololowa anyanyaliwe, nari anàwe evekaka yolya.” (Salumu 37:25) Nyuwaano mwa muchu oochuneya wa Yehova, nave owo onnoovahaani ‘ntata nawe na ikuru’ wi nwerye ophwanya yawiikhaviheryano mmurumeelaka yoowo.

Sara, yoowo onakhala o Kolompiya, aahoona mukhalelo Yehova aamukhavihenryeiye. Owo aakhalano muteko wamvaha ikhorowa sincipale va ekompaniya yoovuwa. Nyenya aanachuna oomalihaka elukuluku yincipale mmuteko woolaleerya. Mwawiihiiha, aahiya muteko awe nave apacerya muteko wa opiyoneero. Nyenya, waari woovila wa yene ophwanya muteko achuneiye wa elukuluku vakhaani. Owo aapaka epanka wi akulihekemo ichu sooriirya nave vakhaani-vakhaani aapwata ophiyerya amuhiya nakoso. Owo onnaloca: “Soovira iyaakha raru, chiryene kinnamuthamala Yehova, okikhavihenre ovilela.” Owo ohoona ichu owo onachuneiye chiryene ni mukhalelo wa osepa okhala awuukhuwa ni ichu sa omwaahiyu. (Mateu 6:33, 34) Voocharela, mutokweene a ekompaniya aamwiichana nave amvaha muteko mmohamoha yoowo aareiyeno khalai. Owo aalonce wi aahaala weemererya muteko waahaala omvahaka elukuluku ya olaleerya, oya mmithukumano sa muloko, ekulucu ni mithukumano mitokhweene. Olelo, Sara hanawerya ophwanya ikhorowa sincipale ntoko eereiye khalai, nyenya nlelo ootitelela okhala piyoneero. Owo ooloca wi variyari va elukuluku eyo yookacamiha, ohoona ntata noosivela na Yehova.

VAAVAA NNAKHALAAHU AWUUKHUWA NTHOWA NA WUULUVALA

Ancipale annuukhuwa nthowa na wuuluvala yoovaka wi hepharaka echu. Awo annathanana waakhanle wi anamukhalakano ikhorowa. Awotho annoova vooloca sa makacamiho a ekumi enii ekhumeleleke omwaahiyu. Akweya yaari mathowa mamohamoha yaamweerin’ye Mwene Tavite omveka Yehova ariki: “N’wuluvalani mwaka muhikikhòtxe, muhikinyanyale kàhikhala ni ikuru.”—Salumu 71:9, 18.

Tiheeni awuuluvala anaphwanelaaya weera wi ehooveke sa omwaahiyu? Awo anaphwanela olipiha nroromelo naya wa Muluku wi owo onahaala waavaha ichu soothene anachunaaya. Nyenya, akina anasiveliwa othuma ichu sa vasulu elukuluku anakhalaayano ikhorowa sincipale, nave awo anaphwanela ohuserya okhalano okumi wookhweya ni ohakalala ni savakhaani. Awotho anaphwanela osuwela wi “olya ntikwa” ohiya “orerya emetxe” ennakhaviherya ekumi! (Masiposipo 15:17) Wakhala wi munnacicimiherya omurumeela Yehova, owo onahaala wookhaviheryaani wi mukhaleno ichu munachunaanyu vaavaa muneeraanyu muuluvale.

Muupuwele yeeyo yeeren’ye ni Yose vamoha ni Rose, yaawo yaarumenle mmuteko wa elukuluku yoothene mu iyaakha 65. Variyari va elukuluku yeeyo, awo yaakumana ni makacamiho mancipale. Awo yaanaakhapelela asitiithi a Rose yaawo yachuna nikhaviheryo othana ni ohiyu. Navetho, Yose aakhalano ereca etokweene nave aaphwanela owiryaka murece. Yehova ookonle hai ntata nawe noolopwana wa mutheli yoola a nroromelo? Owo aampharihela mutheli mukina awiichaniwa Tony ni Wendy. Awo yaakhalano empa yeeyo yaachunaaya waavaha mahaleene mapiyoneero a elukuluku yoothene. Tony aanuupuwela wi akhalaka oxikola, aanamoona Yose vamoha ni Rose eyaaka olaleerya erumeelaka ntoko mapiyoneero a elukuluku yoothene. Tony aanasiveliwano mmvai aya, nave eyo yaanatannya murima awe. Woona wi Yose ni Rose yaamaliha sookhalano saya emurumeelaka Yehova, Tony vamoha ni Wendy yaalakelela waavaha empa eyo, nave sinnaviravo iyaakha 15 yaakhaviheryaka. Yose ni Rose arino variyari va iyaakha 85, nave anoona wi Rose ni Tony yamahala enarweela wa Yehova.

Yehova onnoororomelihaani ariki: “Ohòve, kiri va, wi kokhaviherye!” owo onamookola ‘ntata nawe na ikuru’ wa nyuwo. Munahaala omookolela ntata nanyu?

[Nsu na vathi]