3. Ntakhara Heeni Achu Aphaama Annahooxeya?
Ntakhara Heeni ti Woochuneya Osuwela Naakhulo?
Tahi yaphaama wi achu aphaama enahooxeya. Nthowa na yeeyo achu akina anoona wi hiwaavovo mphurelo wiilipixerya okhala muchu aphaama.
Wi Muupuwelele
Akina aneemererya wi achu annathatuwa. Awo analoca wi yaawo anapaka ichu saphaama annathatuwa ntakhara okumi waphaama, nyenya yaawo anapaka ichu soonanara ntakhara ohooxeya. Mwawiiwanana ni moonelo yoola, ophiyerya wi muchu aphaama onanwerya ohooxeya nthowa na echu yoonanara opakileiye mu “okumi awe khalai.” Vano . . .
Tiivi yaahaala okhala yoolakelela ya makacamiho woona wi muchu owo hanuupuwela yeeyo opankeiye?
Waakhanle wi okumi ahu woorepeliwa woosiilo ene, ntakhara heeni nnaphwanelaahu wuukhuwaka ni wiikhapelela?
WI MUSUWELE SINCIPALE
Moone exilema Ntakhara Heeni Muluku Onneemererya Makacamiho? mu jw.org.
Yeeyo Piipiliya onahusiheiye
Makacamiho tahi olaka wa Muluku.
Mu ikwaha sincipale, ti nthowa na okhala va nipuro noohiphwanelela, ni elukuluku yoohiphwanelela.
“Motxhimakani tahi wi mahiku othene onavotha ti yole òveyasa; mw’ekhotxoni, tahi yoleru awupasa onavotha mahiku othene. Tahi wi mahiku othene atxhu a miruku tanakhalano yolya, nari atxhu òsuwela tanarèla. Yale anakhala asitokwene hanakhala òweryaru. Txhiri orèriwa ni otakhaliwa, honamuthanla mutxhu.”—EKLESIYASTE 9:11; BNN.
Mukhalelo ahu woohiphaameya onneeriha wi nnahooxeya.
Wiiliwiili, achu anapharihelaaya nsu nawi “yoocheka” wi eloce echu yoonanara yeeyo muchu mukina opankeiye. Nyenya Piipiliya onapharihela nsu nenla wi atharihe mukhalelo yoowo achu oothene, aphaama ni oonanara murima aramvaaya.
“Evelevelo, koonanara opacerya kiri mwaana. Koocheka opacerya kiri mmirimani wa amaani.”—SALUMU 51:5
Yoocheka yooruuha sookhumelela soowaawa wa achu.
Tahi wi yoocheka enanarinhe onthamwene ahu ni Muluku pahiru nave tho yoonanariha waataana wa achu ni soopatuxiwa ikina. Soothene seiha sinnaruuha makacamiho, wa mmoha ti mmoha ni wa achu oothene.
“Kaakhwelaka weera yaphaama, yoonanara tenaphwanyeya.”—AROMA 7:21.
“Soopatushiwa soothene sinnuupulela vamoha ntoko masoso ooyara.”—AROMA 8:22.