MWAHA 7
Muchu Mmoha Oolipa Murima
VAVAA achu yaachereryenyaaya veelaponi yavathi, ancipale yaaneera moonanara, mophwanaphwana ni Kayine. Nyenya muchu mmoha aari oohiyana. Muchweene yoola iichaniwa Henoke. Aari muchu oolipa murima. Oothene oomurukurerya yeera ichu soonanara, nyenya Henoke aanapwahiherya omurumeela Muluku.
Mano munnasuwela nthowa nene achu yaale, mu elukuluku yeele, yeerelaaya ichu sincipale soonanara? Ahe, nkoonani: Mano taani aaweerinhe Aatamu ni Haava ohimwiiwelela Muluku ni olya yawiima yeeyo yahaaphwanelaaya olya? Aayii, mungelo mmoha oonanara. Piipiliya onamweera Satana. Owo onnaavyavya weriha wii oothene ekhale oonanara.
Nihiku nikina, Yehova Muluku aahimuruma Henoke wii aaleele achu echu yeeyo yahaasivenle. Yaari yawii: ‘Ninnarwa nihiku nenlo Muluku oniiriye aatoloxe oonanara oothene.’ Achu ale yaahinanariwa vancipale, vawiiwa eyo. Vakina vaya onnaweryeyavo okhala yeerenryeene omwiipha Henoke. Va nthowa nenla, Henoke aanaphwanela okhala oolipaxa murima wii aloce sa yeeyo Muluku ahaaliiye weera.
Muluku haamuhinye Henoke okhala ni okumi elukuluku yincipale veeri va achu yaale oonanara. Henoke aakhanle iyaakha 365 pahiru. Nthowa taani nniiryaahu “iyaakha 365 pahiru”? Nthowa nawii mu elukuluku yeele, achu yaari akuru vancipale nave yaanakhala ni okumi mu elukuluku yincipalexa. Phameene, mwaana a Henoke, Metuxalaa, aahikhala iyaakha 969!
Vachuli vaya Henoke akhwiiyeene, achu yaamuteparu oonanara. Piipiliya onalocaa wii ‘yuupuwela pahiru yeeyo eri yoonanara, elukuluku yoothene,’ ni wii ‘elapo yaasareya nlala.’
Moosuwela nthowa nene waakhalenlaayavo sokachamiha sincipale veelaponi mu elukuluku yeele? Ti nawii Satana aahiphwanya ephiro yahiihaano ya oweeriha achu weera yoonanara. Nnahaala osuwela sa yeeyo vano.
Mapacereryo 5:21-24, 27; 6:5; aHebri 11:5; Yuda 14, 15.