MWAHA 14
Muluku Onneeha Nroromelo Na Aaparahamu
MANO munnoona yeeyo Aaparahamu oniiriiye? Ori ni mwaalo, nave onakhala ntoko onahaala omwiipha mwanawe. Mano aahala weerela eheni yeeyo? Voopacerya, noone mummo Aaparahamu ni Saara yaamphwanyenryaaya mwanaya ene yoola.
Munnaphwanela wuupuwela wii Muluku aahilakanano mwaana. Nyenya, eyo yooneya ntoko yoohiweryeya, nthowa nawii Aaparahamu ni Saara yaari yuuluvanleene. Nari hiihaa, Aaparahamu anaroromela wii Muluku aanawerya weerano yeeyo yooneya okhala yoohiweryeya. Mano, vanonto tiheeni yeerenyee?
Vachuli va nlakano na Muluku, waahiviravo eyaakha emoha. Vaavaa Aaparahamu aariiyeno iyaakha 100 nave Saara iyaakha 90, yaahikhala ni mwaana awiichaniwa Isaaki. Muluku aahaakhwaniherya nlakano nawe!
Nyenya, Isaaki annunweene, Yehova aaheeha nroromelo na Aaparahamu. Aahimwiichana: ‘Aaparahamu!’ Nave Aaparahamu aahaakhula: ‘Kiri va!’ Vaavaa Muluku aahi: ‘Mukuxe mwanaa mmoharu Isaaki, nave oye o mwakoni yoowo kiniryaaka koothoonyere. Omwiiphe mwanaa ni omveleele ntoko ephepa.’
Aaparahamu aathananne mwawiihai ni masweene yaala, nthowa nawii aanamusivela vancipale mwanawe! Nave munnaphwanela wuupuwela wii Muluku aahilakanano wii anamwane a Aaparahamu yaahaala okhalaka mu elapo ya Kaanani. Mano waahaala oweryeya mwawiihai aari Isaaki akhwa? Aaparahamu haiwexexavo, nyenya nari hiihaa aahimwiiwelela Muluku.
Vaavaa Aaparahamu aaphiyaliiye omwakoni, aahimmaka Isaaki amwaatelela va mukucho yeephepha aapankiiye. Vanonto aahikumiha mwaalo wii amwiiphe mwanawe. Waari vaavanto vano mungelo a Muluku aamwiichanniiye: ‘Aaparahamu, Aaparahamu!’ Nave Aaparahamu aahaakhula: ‘Kiri va!’
‘Ohimweerele yoonanara mwaammiravowo,’ aahi Muluku. ‘Vano koosuwela wii weyo wokhalano nroromelo wa miyo, nthowa nawii hiwaakikhoochiherye mwanaa mmoharuwo.’
Ti nroromelo ntokotoko nawiihainto nenlo Aaparahamu aariiyeno mwa Muluku! Aaneemererya wii hiyavo yoohiweryeya wa Yehova niwiitho Yehova amwerya omviiha Isaaki wuukhwani. Nyenya, Muluku chiryeene haachunne wii Aaparahamu amwiiphe Isaaki. Va nthowa nenla, Muluku aaheriha wii epucepuche yaamulopwana yaake vamiraini yeeyo yaari vakhiviru, nave aahimulamulela Aaparahamu wii aveleelele ephepa m’puroni mwa mwanawe.
Mapacereryo 21:1-7; 22:1-18.