Yehova Aamwiichana Owo “Nthamwene Aka”

“We Isarayele, wa mulapeli aka; we, Yakobe, ori nloko naka nothanliwa, nloko na nthamwene aka Abrahamu.”—ISAIYA 41:8.

MACIPO: 91, 22

MWAAHAALA WAAKHULA HAI?

Nsuweliho ni saweereya saalipinhe hai nroromelo na Aaparahamu?

Aaparahamu aalipinhe hai onthamwene awe ni Muluku?

Munii mmutakiherye hai Aaparahamu mu olipiha onthamwene anyu ni Yehova?

1, 2. (a) Nnasuwela ha wi achu ananwerya okhala asinthamwene a Muluku? (b) Tiheeni nnahaalaahu othokororya mmwaha yoola?

OPACERYA elukuluku n’yariwaahu ophiyerya elukuluku nnakhwaahu, ninnachuna osivela. Achu annachuna osivela weeparipari, ohiya osivela onakhaleiyeno mulopwana ni muthiyana. Nyenya opwaha soothene, ninnachuna osivela onarweela wa Yehova. Ancipale haneemererya wi achu ananwerya okhalano onthamwene weeparipari ni Muluku woona wi hanooneya nave toowerya woothene. Nyenya hiyaano noosuwela eparipari!

² Moorweela wa Piipiliya noosuwela wi achu annakhala asinthamwene a Muluku. Nnanwerya ohuserya orweela wa sootakiherya saya. Ntakhara heeni? Nthowa nawi onthamwene ni Muluku yoothanla yookhweleya nnaphwanelaahu okhalano mookumini. Hankooni nthokororye yootakiherya ya Aaparahamu. (Mwaalakhanye Tiyako 2:23.) Owo aawenrye hai okhala nthamwene a Muluku? Onthamwene wa Aaparahamu ni Muluku waathipelen’ye mu nroromelo, nave tho osuweliwe ntoko “nikholo na yale othene anroromela.” (Aroma 4:11) Vaavaa munathokororyaanyu yootakiherya awe, mwiikohe, ‘Kinii kitakiherye hai nroromelo na Aaparahamu nave kilipihe onthamwene aka ni Yehova?’

AAPARAHAMU AAKHANLE NTHAMWENE A MULUKU MWAWIIHAI?

3, 4. (a) Mutharihe yaweeha etokweene ya nroromelo na Aaparahamu. (b) Ntakhara heeni Aaparahamu ahiilipiherya omvaha Isaki ntoko mukucho?

³ Mmwaanyiherye Aaparahamu arino iyaakha 125 sa oyariwa eecaka vakhaani vakhaani awelaka va mwaakoni.^[1] (Moone masu a vathi ookuchula.) Oculi wawe aariwo mwanawe Isaki, yoowo aarino iyaakha 25 sa oyariwa. Isaki aatense ikhuuni, nave Aaparahamu arino mwaalo ni ichu ikina saachuneya wi iifeeleno mooro. Akhweya owo waari mukwaha woovila muukumini wa Aaparahamu. Nyenya eyo hiyaari nthowa na wuuluvala wawe. Nlelo owo aakhalano ikuru. Mukwaha owo waari wookacamiha nthowa nawi Yehova aamveka wi amvahe mwanawe ntoko mukucho!—Maphatxuwelo 22:1-8.

⁴ Eyo yaari yaweeha etokweene ya nroromelo na Aaparahamu. Achu akina analoca wi Muluku aari oonanara murima vaavaa aamvenkeiye Aaparahamu wi amvahe mwanawe ntoko mukucho. Akina analoca wi Aaparahamu aahiiwelela weerano yeeyo woona wi haamusivela mwanawe. Achu annaloca yeela woona wi haano nroromelo nave hanasuwela nroromelo neeparipari tiheeni naari mukhalelo nnooniheryiwaaya. (1 Korinto 2:14-16) Nyenya tahi wi Aaparahamu aamwiiwelenle Muluku ahipacenre wuupuwelela. Owo aamwiiwelela nthowa nawi aakhalano nroromelo neeparipari. Aasuwela wi Yehova haahaala omveka weera echu yaahaala ompahula moomalela. Aaparahamu aasuwela wi wakhala wi oomwiiwelela, Yehova aahaala omureeliha yene ni mwanawe oosiveliwa. Tiheeni yaamukhavihenrye Aaparahamu okhalano nroromelo noolipa? Nsuweliho ni yaweereya.

5. Aaparahamu aahusenrye hai vooloca sa Yehova, nave nsuweliho nno namvolowenle hai?

⁵ Nsuweliho. Aaparahamu unnunwe mu epooma yiichaniwa Ur. Achu mu epooma yeeyo yaalapela amuluku atheru, ophitaanyerya atiithi awe tho. (Yosuwa 24:2) Vanonto, Aaparahamu aahusenrye hai vooloca sa Yehova? Piipiliya onaloca wi Semi, mwana a Noowa aari muhima a Aaparahamu. Aaparahamu ahaakumve okhalano iyaakha 150 sa oyariwa Semi era akhanle. Semi aari mulopwana a nroromelo ntokweene, akhweya aamuleela Aaparahamu vooloca sa Yehova. Hansuwenle mweeparipari, nyenya akhweya ti mukhalelo yoowo Aaparahamu aahusenryeiye vooloca sa Yehova. Yeeyo aahusenryeiye yaamweeriha omusivela Yehova, nave nsuweliho nlo naamukhaviherya olipiha nroromelo nawe.

6, 7. Yaweereya ya Aaparahamu yaalipinhe hai nroromelo nawe?

⁶ Yaweereya. Yaweereya taani yaalipinhe nroromelo na Aaparahamu? Akina analoca wi muupuwelo onnahoolela moonelo nave moonelo onnahoolela saweera. Murima wa Aaparahamu waatannyeya ni yeeyo aahusenryeiye vooloca sa Muluku, nave eyo yaamweeriha waacicimiha vancipale “Apwiya [Yehova], Mutokwenesa, Mpatusa a erimu ni a elapo ya vathi.” (Maphatxuwelo 14:22) Piipiliya oniichana ncicimiho ntokweene ntoko ‘omova Muluku.’ (Ahebri 5:7, Nlakano Nahihano) Mmukhalelo mukina, naariki nikhaleno onthamwene waphaama ni Muluku, nnaphwanela omoova owo. (Salumu 25:14) Ola waari mukhalelo yoowo waamweerinhe Aaparahamu omwiiwelela Yehova.

⁷ Muluku aamuleela Aaparahamu ni Saara ohiya empa aya o Ur wi yamake mu elapo yookhopela ntoko anamarwa. Awo hiyaari amiravo, nave yaahaala okhalaka mmikochani okumi aya woothene. Naamwi Aaparahamu aasuwenle wi yaahaala okumanano makacamiho, owo aalakelela omwiiwelela Yehova. Nthowa na wiiwelela wawe, Muluku aamureeliha nave aamukhapelela. Ntoko yootakiherya, vaavaa mwaara a Aaparahamu Saara aakusiweiye nave Aaparahamu akhala va yawoopiha ya okhwa, Yehova ahaakhapelela oopiili opwaha ekwaha mootikhiniha. (Maphatxuwelo 12:10-20; 20:2-7, 10-12, 17, 18) Saweereya seiya saalipiha nroromelo na Aaparahamu.

8. Nnii nikhaleno hai nsuweliho ni yaweereya inahaala olipiha onthamwene ahu ni Yehova?

⁸ Apwanne nnanwerya okhalano onthamwene ni Yehova? Chiryene nnanwerya! Ntoko Aaparahamu, nnaphwanela ohuserya vooloca sa Yehova. Nave hiyaano tho nnanwerya okhalano nsuweliho ni yaweereya nnachunaahu. Olelo nookhalano sincipale ompwaha Aaparahamu. (Daniyeli 12:4; Aroma 11:33) Piipiliya oosareya nsuweliho vooloca sa “Mpatusa a erimu ni a elapo ya vathi.” Yeeyo nnahuseryaahu ennaneeriha omusivela nave ennanikhaviherya okhalano ncicimiho ntokweene wa yoowo. Osivela ni omucicimiha Muluku sinnaneeriha omwiiwelela. Vaavaa nneerahuno yeeyo, ninnoona mukhalelo onanikhapeleleiye ni onireeliha, nave eyo ennanivaha yaweereya yeeyo enalipiha nroromelo nahu. Vaavaa nnamurumeelaahu Yehova moomalela, ninnakhalano ohakalala, ni murecele. (Salumu 34:8; Masiposipo 10:22) Nakhalano nsuweliho nawaaca ni yaweereya, onthamwene ahu ni yoowo onahaala okhala woolipa.

AAPARAHAMU AAKHAPELENLE HAI ONTHAMWENE AWE NI MULUKU?

9, 10. (a) Tiheeni enachuneya wi onthamwene okhale woolipa? (b) Tiheeni enooniherya wi Aaparahamu aanacicimiha nave aalipiha onthamwene awe ni Yehova?

⁹ Onthamwene waphaama onanwerya olikana ni muhakhu wa esisapo. (Mwaalakhanye Masiposipo 17:17.) Owo honalikana ni epiya enaphariheliwa pahiru ntoko esipanthi. Owo onnapwaha mwiri wooreeraxa onachuna oheliwa maahi ni okhapeleliwa wi okumihe ithutu. Aaparahamu aanacicimiha nave aanakhapelela onthamwene ni Yehova. Eenreno hai?

¹⁰ Aaparahamu aatitelela olipiha omoova Muluku ni wiiwelela wawe. Ntoko yootakiherya, vaavaa aakeleiye o Kaanani ni amusi ni asinthamwene awe, aatitelela weemererya ohoolela wa Yehova vaavaa aapakeiye soolakelela itokotoko ni ikhaani. Ahaakumve omuyara Isaki, vaavaa areiyeno iyaakha 99 sa oyariwa, Yehova aamuleela wi aathikile alopwana oothene a veechokoni vawe. Apwanne Aaparahamu amvaanya Yehova naari aaheererya okhooca? Hooye, owo aamuroromela Yehova nave aamwiiwelela “nihiku nene nenle.”—Maphatxuwelo 17:10-14, 23.

11. Ntakhara heeni Aaparahamu aathanana vooloca sa Sotoma ni Komora, nave Yehova aamukhavihenrye hai?

¹¹ Nthowa na Aaparahamu omwiiwelela Yehova elukuluku yoothene naamwi mu ichu ikhaani, onthamwene awe waahikhala woolipa. Owo aanoona wi aanaphwanela oloca ni Yehova echu eri yoothene, ophitaanyerya omveka nikhaviheryo vaavaa aakhaleiyeno makoho oovila. Ntoko yootakiherya, vaavaa Yehova aamulenleiye wi aahaala otoloxa epooma ya Sotoma ni Komora, Aaparahamu aathanana. Ntakhara heeni? Oova wi achu aphaama yaahaala okhwa vamoha ni oonanara. Akhweya aamuupuwela musulwa awe Looti ni amusi awe yaakhala o Sotoma. Aaparahamu aanamuroromela Yehova, “muthoriha a elapo” yoothene, mwawiihiiha aaloca mwawiiyeviha ni Yehova ntakhara othanana wawe. Yehova aahooniherya epewe ni nthamwene awe nave aamooniherya wi yene ta ikharari. Yehova aamutharihela wi vaavaa eereiye aruuhe othoriha, aahaala owaavya achu aphaama wi aavuluxe.—Maphatxuwelo 18:22-33.

12, 13. (a) Ti mwawiihai nsuweliho ni saweereya saamukhavihenryaaya Aaparahamu ohoolo waya? (b) Tiheeni enooniherya wi Aaparahamu aanamuroromela Yehova?

¹² Enakhala yawooneya wi nsuweliho ni yaweereya Aaparahamu aareiyeno saamukhaviherya okhapelela onthamwene awe woolipa ni Yehova. Ohoolo waya vaavaa Yehova aamvenkeiye Aaparahamu wi amvahe mwanawe ntoko mukucho, owo aasuwela wi elukuluku yoothene Yehova teepewe, aikharari, oororomeleya ni ookhapelela. Aaparahamu aakhalano nroromelo wi Yehova haahaala mwawaakuveya okhala oonanara murima! Ntakhara heeni ninnaloca hiiha?

¹³ Ahaakumve waahiya akapuro awe, Aaparahamu aaloca: “Nyuwano muhale vava ni phùru. Miyano ni mmiravo ola nnaya iwe wi namwepese Muluku. Nnamukòka.” (Maphatxuwelo 22:5) Masu a Aaparahamu yaataphulela eheeni? Apwanne aamootha vaavaa aalonceiye wi aahaala okooka ni Isaki, asuwelaka wi aaya omvaha ntoko mukucho? Hooye. Piipiliya onaloca wi Aaparahamu aasuwela wi Yehova anwerya omviiha Isaki mookhwani. (Mwaalakhanye Ahebri 11:19.) Aaparahamu aasuwela wi Muluku aahimvaha ikuru sa okhalano mwaana naamwi yene ni Saara yuuluvanle. (Ahebri 11:11, 12, 18) Mwawiihiiha ahuupuwela wi hiyaavovo echu enamvila Yehova. Haasuwela yeeyo yaahaala weereya nihiku nenle. Nyenya aakhalano nroromelo nawaakhwanela, wi Yehova aanwerya omviiha mwanawe ophiyerya wi soolaiherya soothene sa Muluku ikhwaneele. Ti nthowa nene Aaparahamu oniichaniweiye “nikholo na yale othene anroromela.”

14. Makacamiho taani mukumannaanyuno mu omurumeela Yehova, nave yootakiherya ya Aaparahamu yookhavihenryeeni hai?

¹⁴ Olelo, Yehova hananiveka waavaha anamwane ahu ntoko mukucho, nyenya wiiwelela malamulo awe. Ikwaha ikina hinni niiwexexe nthowa nene nnaphwanelaahu wiiwelela malamulo naari onamukhala wooviha wiiwelela. Montoko woona hiiha? Wa akina muteko wa olaleerya ti woovila. Akhweya awo annoova nave onakhala woovila oloca ni achu ahaasuwenlaaya. Akina anoova okhala oohiyana omutekoni ni oxikola. (Mukwaha 23:2; 1 Tesalónika 2:2) Vaavaa munavekiwaanyu weera echu yoovila, muupuwele yootakiherya yaphaama ya Aaparahamu ya nroromelo ni olipa murima. Vaavaa nnuupuwelelaahu sootakiherya sa alopwana ni athiyana a nroromelo, enanwerya onceenyerya waatakiherya ni omwaacamela Nthamwene ahu, Yehova.—Ahebri 12:1, 2.

ONTHAMWENE ONARUUHA MAREELIHO

15. Ntakhara heeni ninnaphwanela ororomela wi Aaparahamu haarino ekeerelani nthowa na omwiiwelela wawe Yehova?

¹⁵ Apwanne Aaparahamu aakhalano ekeerelani nthowa na wiiwelela malamulo a Yehova? Piipiliya onaloca wi Aaparahamu “uluvanleiye vantxipale mmuretxeleni ni n’witxhàlani, àkhwa.” (Maphatxuwelo 25:7) Naamwi aarino iyaakha 175 sa oyariwa, Aaparahamu aanuupuwela okumi awe nave aanahakalala. Ntakhara heeni? Nthowa nawi onthamwene awe ni Yehova yaari echu yookhweleyaxa wa yene. Mwawiihiiha, vaavaa nnaalakhanyaahu wi Aaparahamu ‘ahuluvala vantxipale mmuretxeleni’ eyo henataphulela wi haachuna okhala omwaahiyu.

16. Ohakalala taani Aaparahamu onahaaleiye opuha mparataiso?

¹⁶ Piipiliya onaloca wi Aaparahamu “ànawehererya nipoma nthipeliwe phama, nlepeliwe ni ntekiwe ti Muluku.” (Ahebri 11:10) Aaparahamu aaneemererya wi nihiku nimoha aahaala woona epooma, Omwene wa Muluku, olamulelaka veelaponi yavathi. Nave owo onamoona! Nkaanyiheryani ohakalala Aaparahamu onahaleiye okhalano okhala mparataiso veelaponi ni otitelela olipiha onthamwene awe ni Muluku! Onahaala ohakalala osuwela wi yootakiherya awe ya nroromelo yohaakhaviherya akapuro a Muluku mu iyaakha sincipale! Mparataiso owo onahaala osuwela wi mukucho aavanheiye o Mwaako Moriya waasiphela echu etokweenexa. (Ahebri 11:19) Nave onahaala osuwela wi osooseya ooneiye vaavaa iireheryeiye wi amvahe mwanawe ntoko mukucho yohaakhaviherya achu oororomeleya macikhwi macikhweene wiiwexexa osooseya wa Yehova vaavaa aamvanheiye Mwanawe, Yesu Kiristu ntoko mukucho wa woopola ntakhara achu. (Yohani 3:16) Yootakiherya ya Aaparahamu ennanikhaviherya oothene yeehu othamalela vancipale mukucho wa woopola, yawooniherya etokweene ya osivela!

17. Teevi eri yoolakelela anyu, nave tiheeni nnahaalaahu othokororya mmwaha onacharela?

¹⁷ Hankooni oothene hiyo nikhale oolakelela otakiherya nroromelo na Aaparahamu. Ntoko yene, ninnachuna nsuweliho ni yaweereya. Vaavaa nnatitelelaahu ohuserya vooloca sa Yehova ni omwiiwelela, onahaala onireeliha ni onikhapelela. (Mwaalakhanye Ahebri 6:10-12.) Yehova onamukhala nthamwene ahu okhala wookhala! Mmwaha onacharela, nnahaala othokororya sootakiherya chaaru sa achu oororomeleya yaawo yaari asinthamwene a Muluku.

[Masu a vathi]

[Yooleeliherya va epaaxina 4]

Tahi wi Aaparahamu aamwiiwelenle Muluku ahipacenre wuupuwelela

[Yooleeliherya va epaaxina 6]

Onthamwene onnapwaha mwiri wooreeraxa onachuna oheliwa maahi ni okhapeleliwa wi okumihe ithutu

[Yooleeliherya va epaaxina 7]

Aaparahamu aakhalano nroromelo nawaakhwanela, wi Yehova aanwerya omviiha mwanawe ophiyerya wi soolaiherya soothene sa Muluku ikhwaanenle

[Ekaaxa va ipaaxina 4, 5]

ONTHAMWENE WA AAPARAHAMU NI YEHOVA

AKHALAKA O UR

Aaparahamu ni Saara yaamusuwela nave yaamulapela Yehova

Aaparahamu aamwiiwelela Muluku nave aakhuma o Ur

ONNAYA OKAANANI

Yehova aamukhapelela Aaparahamu ni Saara variyari va mukwaha aya

OKUMI O KAANANI

Aaparahamu mu wiiwelela aahaathikila alopwana oothene a veechokoni vawe

Mweepewe Yehova aahinwiriyana Aaparahamu vaavaa oonihenryeiye othanana wawe vooloca sa Sotoma

Yehova aaheeriha wi Aaparahamu ni Saara ekhaleno mwaana

Aaparahamu aahooniherya nroromelo nave aahiilipixerya wi amvahe Isaki ntoko mukucho

Aaparahamu aakhwa “uluvanleiye vantxipale mmuretxeleni ni n’witxhàlani”

[Ekaaxa va epaaxina 8]

MASU ATHARIHIWE

Wi nikhale asinthamwene a Muluku, nnaphwanela omusuwela owo phaama. Vaavaa nnahuseryaahu vooloca sa yoowo, nnampacerya omusivela ni omucicimiha. Eyo enahaala onceenyerya omuroromela ni omwiiwelela. Wakhala wi noolipiha onthamwene ahu ni Yehova, onthamwene owo horwa omala