Mwaatakiherye Asinthamwene a Yehova
“Yawiphini ya Yehova eri wa yawo anamova Yowo; Nave onarwa-ásuweliha nlakano nawe.”—SALUMU 25:14, Nlakano Nahihano.
MACIPO: 106, 118
MWAAHAALA WAAKHULA HAI?
Tiheeni nnahuseryaahu orweela wa onthamwene ni Muluku yoowo Rute aapunheiye?
Ntakhara heeni Mwene Esekiya aakhala nthamwene a Yehova?
Mikhalelo taani samweerinhe Mariya amannya Yesu okhalano onthamwene ni Yehova Muluku?
1-3. (a) Ntakhara heeni ninnaphwanela ororomela wi nnanwerya okhala asinthamwene a Muluku? (b) Tiheeni nnahaalaahu othokororya mmwaha yoola?
MPIIPILIYANI, Aaparahamu oniichaniwa nthamwene a Muluku itila raru. (2 Matharihelo 20:7; Isaiya 41:8; Tiyako 2:23) Ti yooworu pahi oniichaniwa Mpiipiliyani ntoko nthamwene a Muluku. Apwanne eyo enataphulela wi Aaparahamu aari mmoharu aakhanle nthamwene a Yehova? Hooye. Piipiliya onnooniherya wi oothene hiyo nnanwerya okhalano ekari yeela.
2 Masu a Muluku aasareya ni saweereya sa alopwana ni athiyana a nroromelo yaawo yaamoova Yehova, omuroromela yoowo, nave ekhala asinthamwene awe. (Mwaalakhanye Salumu 25:14.) Awo makupa a ‘neku nawihiha [ntokweene] na anamona’ aromoliwe ni Paulo. Achu oothene yaala yaari asinthamwene a Yehova.—Ahebri 12:1.
3 Hankooni naathokororye asinthamwene araru a Yehova alociwe Mpiipiliyani: (1) Ruthi, naamukhwele mwali o Mowaape, (2) Esekiya, mwene oororomeleya o Yuteya, ni (3) Mariya, amannya awiiyeviha a Yesu. Tiheeni nnahuseryaahu wa mmoha ti mmoha a yaala, okhala waya asinthamwene a Muluku?
OWO AAHOONIHERYA OSIVELA WEEPARIPARI
4, 5. Soolakelela taani soovila Ruthi aapankeiye, nave ntakhara heeni weerano waari woovila? (Moone eruku yoopacerya.)
4 Naomi, ni asipwiyamwana awe, Ruthi ni Orfa, mmukwahani ovinya o Mowaape eyaka o Isarayeli. Mphironi, Orfa aalakelela okookela owannyawe o Mowaape. Nyenya Naomi aalakelela okookela o Isarayeli, elapo aayariweiyewo. Tiheeni Ruthi aalakelenleiye weera? Owo aakhalano soolakelela soovila. Aahaala okookela owannyawe o Mowaape wi akhale ni amusi awe, naari aahaala okhala ni Naomi, apwiyamwana awe, opaka mukwaha oya o Petelehemu?—Ruthi 1:1-8, 14.
5 Emusi ya Rute yaakhala o Mowaape. Owo aaphwanela waakookela, akhweya awo yaahaala omukhapelela. Aanaasuwela phaama achu, elocelo, ni yookhovelela ya o Mowaape. Naomi haarino omuroromeliha Ruthi ichu seiya o Petelehemu. Nave Naomi aanoova wi owo hii aphwanye empa ni oothelanano. Mwawiihiiha Naomi aamuleela wi akookele o Mowaape. Ntoko noonnaahu Orfa ‘akokela owannyawe ni wa amuluku awe.’ (Ruthi 1:9-15) Nyenya Ruthi aalakelela ohaakookela achu awe ni amuluku aya atheru.
6. (a) Yoothanla taani yamiruku Ruthi aapankeiye? (b) Ntakhara heeni Powasi aaloca wi Ruthi aachawela mmakuphelo a Yehova?
6 Ti yawooneya wi Ruthi aahusenrye sa Yehova moorweela wa iyawe naari Naomi. Owo aahuserya wi Yehova haalikana ni amiluku o Mowaape. Owo aanamusivela Yehova nave aasuwela wi aanaphwanela omulapela. Mwawiihiiha Ruthi aapaka yoolakelela ya miruku. Owo aaloca wa Naomi ariki: ‘Nloko nà [nnamukhala] nloko naka, nave Muluku à ti Muluku aka.’ (Ruthi 1:16) Mirima sahu sinnatannyeya vaavaa nnuupuwelelaahu osivela wa Ruthi ntakhara Naomi. Nyenya echu eri yootikinihaxa ori osivela wa Ruthi ntakhara Yehova. Ela yaamutikhiniha tho Powasi, yoowo ohoolo waya aamuthamalenle nthowa na ‘otxhawela’ mmakuphelo a Yehova. (Mwaalakhanye Ruthi 2:12.) Masu Powasi opharihenleiye annanuupuxerya mukhalelo mwaasana a palame onakhapeleliweiye mmakuphelo a amannya. (Salumu 36:7; 91:1-4) Moolikana, Yehova aamukhapelela Ruthi nave aamvaha phatamari ntakhara nroromelo nawe. Ruthi haarino ekeerelani ntakhara yoolakelela awe.
7. Tiheeni enahaala waakhaviherya yaale anoovelela oveleela ikumi saya wa Yehova?
7 Achu ancipale aahuserya sa Yehova nyenya hanathanla ochawela wa yoowo. Awo annoovelela oveleela ikumi saya wa yoowo ni opatisiwa. Wakhala wi nyuwaano munoona mmukhalelo mmohamoha, muupuwele ntakhara heeni munoovelelaanyu. Muchu ti muchu ookhalano muluku onamulapeiye. (Yosuwa 24:15) Yoothanla ya miruku yaahaala okhala omurumeela Muluku eeparipari. Vaavaa munaveleelaanyu okumi anyu wa Yehova, munooniherya wi mookhalano nroromelo wi owo onahaala okhala nchawelo nanyu. Nave onahaala wookhaviheryaani otitelela omurumeela moohipwacha makacamiho munahaalaanyu okumanano. Ti yeela Muluku aamweerenleiye Ruthi.
“AWETXELA PHAMA APWIYA”
8. Mutharihe munnuwelo wa Esekiya.
8 Munnuwelo wa Esekiya waari woohiyana ni wa Ruthi. Owo aari a nloko naathanliwe ti Muluku. Nyenya tahi wi Aisarayeli oothene yaahiikhalelaru oororomeleya. Atiithi a Esekiya, Mwene Akasiya, aari oonanara murima. Owo hoonihenrye ncicimiho empa ya Muluku nave aahaalekecha achu wi yaalapeke amuluku akina. Ophiyerya wi Akasiya aanaasuka anamwane awe wi ekhale mukucho wa amuluku atheru. Chiryene onamwane wa Esekiya waari woothananiha! —2 Mamwene 16:2-4, 10-17; 2 Matharihelo 28:1-3.
9, 10. (a) Ntakhara heeni waari wookhweya Esekiya okhala oonanara murima? (b) Ntakhara heeni hannaphwanela onanariwa ni Muluku? (c) Ntakhara heeni hannaphwanela weemererya wi ahima ahu elakelele mukhalelo wa omuchu nnahaalaahu okhala?
9 Yootakiherya yoonanara ya Akasiya yaahaala omweeriha mwanawe Esekiya okhala oonanara murima ni omurukunuwela Yehova. Olelo, akina yaawo avileenle vakhaani ompwaha Esekiya annoona wi aakhalano nthowa naphaama na ‘omurukunuwela Muluku’ naari onanariwa ni marehereryo awe. (Masiposipo 19:3) Akina anoona wi nthowa na ophwiiwa mu emusi yoonanara enanweeriha okhalano okumi woonanara naari otakiherya soohesa saya. (Ezekiyeli 18:2, 3) Apwanne muupuwelo ola ti waphaama?
10 Mwawiiwanana ni okumi wa Esekiya ennooniherya wi naakulo na nikoho nla ti nawi hooye! Haavo mathowa aphaama a okhala oonanariwa ni Yehova. Owo haneeriha wi ichu soonanara sinaaphacuwela achu. (Yobi 34:10) Eparipari wi asitiithi ananwerya waahusiha anamwane aya weera ichu saphaama naari soonanara. (Masiposipo 22:6; Kolosi 3:21) Nyenya ela henataphulela wi emusi ahu enahaala olakelela mukhalelo wa omuchu nnahaalaahu okhala. Ntakhara heeni? Nthowa nawi Yehova oonivaha yamahala ya yoothanla yoochuna, enataphulela wi nnanwerya othanla weera yaphaama naari yoonanara. (Malamulo 30:19) Mano Esekiya aapharihenle hai yamahala yeela yasisapo?
11. Tiheeni yaamweerinhe Esekiya okhala mwene aphaama o Yuteya?
11 Naamwi atiithi awe yaari mwene oonanara o Yuteya, Esekiya aari aphaama. (Mwaalakhanye 2 Mamwene 18:5, 6.) Aathanla ohichariha yootakiherya yoonanara ya atiithi awe. Opwaha yeeyo, owo aathanla waawiriyana phaama alipa miririmu a Yehova, ntoko Isaiya, Mikeya, ni Oseya. Aawiriyana phaama ikano ni olaka waya. Eyo yaamuceenyerya orehererya ichu sincipale seiye atiithi awe yaananarinhaaya. Aarehererya empa, amveka Muluku wi akhurumuwele soocheka sa achu, nave aahaapwesa amuluku atheru mu elapo. (2 Matharihelo 29:1-11, 18-24; 31:1) Ohoolo waya, vaavaa Mwene o Asiiriya Senekeripe aachuneiye ompahula Yerusalemu, Esekiya aahooniherya olipa murima ni nroromelo ntokweene. Owo aaroromela okhapelela wa Yehova nave aahaalipiha achu awe. (2 Matharihelo 32:7, 8) Mu elukuluku vakhaani Esekiya aahiirumiha, nyenya vaavaa Yehova aamulankeiye, aahiiyeviha. (2 Matharihelo 32:24-26) Chiryene Esekiya yootakiherya yaphaama wi ncharihe. Owo heemerenrye wi emusi awe enanarihe okumi awe. Opwaha yeeyo, aahooniherya wi aari nthamwene a Yehova.
12. Hiiha ntoko Esekiya, ti mwawiihai ancipale olelo anakhalaaya asinthamwene a Yehova?
12 Olelo achu toonanara ni oohisivela, nave anamwane ancipale aninnuwa ehirino osivela ni okhapelela wa asitiithi. (2 Timóteo 3:1-5) Naamwi Akiristu ancipale olelo ekumanakano makacamiho veemusini, awo annathanla oteka onthamwene ni Yehova. Ntoko Esekiya, awo haneemererya wi imusi saya silakelele omuchu aya wa omwaahiyu. Muluku oonivaha yamahala ya yoothanla yoochuna, nave nnanwerya othanla omurumeela ni omucicimiha yoowo, hiiha ntoko Esekiya.
“MIYANO KIRI KAPURO A APWIYA”
13, 14. Ntakhara heeni murici wa Mariya waari woolimela, nyenya mukhalelo taani aakhulenleiye masu a Kapriyeli?
13 Iyaakha sincipale ohoolo waya, muthiyana a wiiyeviha iichaniwa Mariya aakhalano onthamwene wavameekhaaya ni Yehova nave aari yoowo pahi aavahiwe murici wa esisapo. Owo aahaala orupala ni omuyara Mwaana a Muluku! Yehova aamusivela ni omuroromela Mariya, yeeyo yaamweerinhe omvaha ncicimiho ntokweene. Nyenya Mariya aakhulenle hai murici yoola?
14 Ikwaha sincipale ninnaloca sa ncicimiho ntokweene Mariya aavahiweiye. Nyenya tiheeni akhweya yaahaala omoopopiha? Ntoko yootakiherya, munkeelo Kapriyeli aaloca wi owo aahaala orupala ahikumanenle ni mulopwana. Nyenya Kapriyeli haahaala waatharihela amusi awe ni amwaacamani mukhalelo aahaaleiye orupala. Tiheeni yaahaalaaya wuupuwela? Aahaala oloca hai wi amulekeche Yoosefe wi haari oohiroromeleya wa yoowo? Mwawaaceererya, owo aakhalano murici mutokweene wa omphuwa Mwaana a Muluku ntoko muchu! Hannasuwela soothene sa wuukhuwa wa Mariya, nyenya ninnasuwela yeeyo eenreiye amanle Kapriyeli oloca ni yene. Owo aaloca: “Miyano kiri kapuro a Apwiya, yereye wa miyano ntoko olontxawe.”—Luka 1:26-38.
15. Ntakhara heeni nroromelo na Mariya ti nawooneya?
15 Nroromelo na Mariya chiryene ti nawooneya! Owo aari awaakhwanela weera soothene aavekiweiye ntoko kapuro. Owo aanaroromela wi Yehova aahaala omukhapelela. Mariya aawenrye hai okhalano nroromelo noolipa? Hiyaano hinnayariwa ni nroromelo. Nyenya nnanwerya okhalano nroromelo wakhala wi ninnaavya nave ninnaveka wi Muluku areelihe wiilipixerya wahu. (Galasya 5:22; Éfeso 2:8) Mariya aalapa mwakuru wi alipihe nroromelo nawe. Nnasuwela hai? Hankooni nthokororye mukhalelo aawiriyanneiye ni yeeyo aalonceiye.
16. Tiheeni enooniherya wi Mariya aanawiriyana phaama?
16 Mukhalelo Mariya aawiriyanneiye. Piipiliya onaloca wi nikhale awaakuvela “wiwa nto òhakuvela olotxa.” (Tiyako 1:19) Mariya aanawiriyana phaama. Piipiliya onnooniherya wi owo aanawiriyana mwawiiseela ichu iiweiye, xaxaxa ichu owo aahusenryeiye vooloca sa Yehova. Owo aamaliha elukuluku uupuwelelaka ichu sookhweleya. Yootakiherya emoha waari elukuluku ya oyariwa wa Yesu, vaavaa akukhula yaamuleenlaaya Mariya sa michaka yaakhenlaaya wa munkeelo. Ohoolo waya, vaavaa Yesu aareiyeno iyaakha 12 sa oyariwa, owo aaloca ichu saamutikhininhe Mariya. Mmikhalelo soomiili, Mariya aanawiriyana, anuupuwelela mwawiiseela vooloca sa yeeyo iiwaleiye.—Mwaalakhanye Luka 2:16-19, 49, 51.
17. Tiheeni nnahuseryaahu sa Mariya orweela wa mukhalelo aalonceiye.
17 Yeeyo Mariya aalonceiye. Piipiliya hananleela sincipale sa yeeyo Mariya aalonceiye. Masu awe awaaca anaphwanyeya va Luka 1:46-55. Masu ala anooniherya wi Mariya aanasuwela phaama Soorempwa sa Eheepri. Mmukhalelo taani? Masu a Mariya analikana ni masu a nivekelo na Aana, amannya Samuwele. (1 Samuwele 2:1-10) Onakhala wi Mariya aaromonle Soorempwa ikwaha 20 mu malocelo awe. Ela ti yawooneya wi owo aanasiveliwa oloca iparipari aahusenryeiye orweela wa Nthamwene awe mutokotoko Yehova.
18. Mmikhalelo taani nnaphwanelaahu otakiherya nroromelo na Mariya?
18 Ntoko Mariya, ikwaha ikina nnamwaakhela murici orweela wa Yehova nnahaalaahu woona wi ti woovila wa hiyaano. Hankooni ncharihe yootakiherya awe, mwawiiyeviha naakhele murici, nroromelaka wi Yehova onahaala onikhaviherya. Nnanwerya tho otakiherya nroromelo na Mariya vaavaa nnanwiriyanaahu phaama Yehova ni wuupuwelela yeeyo nihusenryaahu sa yoowo ni yookhwela awe. Namala nnahaala ohakalala waaleela akina sa yeeyo nihusenryaahu.—Salumu 77:11, 12; Luka 8:18; Aroma 10:15.
19. Vaavaa nnacharihaahu sootakiherya saphaama sa nroromelo siri Mpiipiliyani, tiheeni nnaphwanelaahu ororomela?
19 Ti yawooneya wi Ruthi, Esekiya ni Mariya yaari asinthamwene a Yehova, hiiha ntoko Aaparahamu. Awo yaari makupa a ‘neku nawihiha [ntokweene] na anamona’ yaawo tho yaarino ekari ya okhala asinthamwene a Muluku. Nnaphwanela otitelela ochariha sootakiherya iha saphaama sa nroromelo. (Ahebri 6:11, 12) Wakhala wi nooheerano hiiha, nnahaala onwehererya phatamari a okhala asinthamwene a Yehova okhala wookhala!