MWAHA 18
Yaakopo Onaya O Haraani
MANO moosuwela wii alopwana ala anavaanela ni Yaakopo taani? Eencheene mukwaha wa mahiku mancipale, Yaakopo aahikumanano vakhiviru ni ehime. Yaari okukhula a ipucepuche. Yaakopo aahaakoha ii: ‘Mwawoowi?’
Yaahaakhula yii: ‘Noo Haraani.’
‘Munamusuwela Lapani?’ aahikoha Yaakopo.
‘Ayi,’ yaahaakhula. ‘Mwanawe ole onrwa vale Rakele ni muloko wa ipucepuche.’ Mano munnamoona vale Rakele aacamelaka?
Vaavaa Yaakopo aamoonniiye Rakele ni ipucepuche sa atataawe Lapani, aahivenxavo nluku vasulu va ehime, wii ipucepuche iho iwerye owurya. Vaavanto Yaakopo aamukhupaarela Rakele nave amuleela wii owo aari taani. Owo aahitikhiniheya vancipale nave aahikookela owaani wii aaleele atiithinya Lapani sa ela.
Lapani aahihakalalela vancipale wii Yaakopo akhale vamoha ni owo. Nave vaavaa Yaakopo aavenkiiye wii amuthele Rakele, Lapani aahihakalala. Nyenya, aahiveka wii Yaakopo aphare muteko iyaakha thanu napiili mmaca mwawe mwawaakakhana ni Rakele. Yaakopo aaheerano eyo nthowa nawii anamusivela vancipale Rakele. Mu elukuluku ya othela, mano moosuwela yeerenyee?
Lapani amvanhe Yaakopo mwanawe mutokotoko Liiya, mpuroni mwa Rakele. Vaavaa Yaakopo emeryenryiiye opharelatho muteko Lapani iyaakha thanu napiili, owo aahimvahatho Rakele okhala mwaariye. Mu elukuluku yeele, Muluku aaheemererya wii alopwana ekhalekeno athiyana oopwaha mmoha. Nyenya vano, Piipiliya onathoonyerya wii mulopwana onaphwanela okhalano mwaariye mmoharu pahi.
Mapacereryo 29:1-30.