MWAHA 19
Echoko Etokotoko Ya Yaakopo
NKOONANI echoko etokotoko ela. Ala ti anamwane 12 aasilopwana a Yaakopo. Nave owo aahikhalanotho anamwane aasithiyana. Mano munnasuwela masina a anamwanaawe aasilopwana? Hinkoni nihuserye makina a yaawo.
Liiya aahimuyara Ruupeni, Simiyone, Leevi ni Yuuta. Vaavaa Rakele onniiye wii hii akhale ni anamwane, aahithanana vancipale. Va nthowa nenla, aahimveleela wa Yaakopo namuteko awe Piliha, nave Piliha aahikhala ni anamwane eeli, aweeriwa Taane ni Nafetali. Liiya aahimveleela wa Yaakopo namuteko awe Siilipa, nave Siilipa aahimuyara Kaati ni Axeeri. Vookuchula vaya, Liiya aahikhala ni anamwane eeli, Isakari ni Sepuloni.
Vookuchula vayatho Rakele aahikhala ni mwaana. Amvaha nsina na Yoosefe. Vachuli vaya nnahaala osuwela sincipale vooloca sa Yoosefe, nthowa nawii owo aahikhala oocuneyaxa. Ala ti anamwane 11 yaayariwe ni Yaakopo akhalaka ni Lapani tiithi a Rakele.
Yaakopo aahikhalatho ni anamwane aasithiyana, nyenya Piipiliya onnavaha nsina na mmoharu. Iichaniwa Tiina.
Yaahiphiya elukuluku yawii Yaakopo athanle omuhiya Lapani wii akookele o Kaanani. Owo aahithukumanya echokwaawe etokotokweeyo, miloko sawe mitokotoko sa ipucepuche ni miloko sa imope, nave aahichimula mukwaha.
Vaavaa Yaakopo ni echokwaawe yaakookelaaya o Kaanani, Rakele aahikhala ni mwaana mukina. Ela yeerenyee vamukwahani. Yaari yookachamiha wa Rakele, nave owo aahikhwa voomuyara mwanoowo. Nyenya mwanoowo aahikhala phaama. Yaakopo ahimvaha nsina nawii Penyamini.
Nnachuna wuupuwelaka masina a anamwane 12 a Yaakopo, nthowa nawii ti mwa yaawo okhumelenlewo nloko noothene na Isarayeli. Chiryene, maloko 12 a Isarayeli anakuxa masina a anamwane 10 a Yaakopo ni a anamwane eeli a Yoosefe. Isaaki aahikhalaru ni okumi elukuluku yincipale vachuli va oyariwa wa anamwane yaala, nave onnaphwanela okhala ahakalanleene ni asisuluwa ancipale. Nyenya, hinkoni noone yeeyo yeerenyee wa musulwawe Tiina.
Mapacereryo 29:32-35; 30:1-26; 35:16-19; 37:35.