MWAHA 21
Yoosefe Onnaichiwa Ni Asinneeni
MUNNOONA mummo mwaammiravo ola okhalenliiye othananaxa. Ti Yoosefe. Asinneeni yaammutumiharu wa alopwana yaawo anaya o Yiikuputu. Weiwo Yoosefe onahaala okhala kapuro. Mano asinneeni yaala yeerenle eheni yoonanareene yeela? Nthowa nawii yaamukhalela ehace Yoosefe.
Tiithyaaya Yaakopo, aantepa omusivela Yoosefe. Aahimuthonyerya omusivela wawe mu olamula wii apakeliwe kaapha oreeraxa oorekama. Vaavaa asuulupalaawe 10 awo yoonnaaya mummo Yaakopo aamusiveleliiye Yoosefe, yaahimukhalela ehace nave yaahikhala emwiichaka Yoosefe. Nyenya, waahikhalavotho nthowa nikina noomwiichela.
Yoosefe aahikhala ni sooloha piili. Va soopiili sene seiya, asinneeni yaanakokhora vamiithoni vawe. Vaavaa Yoosefe aathorihenryiye sooloha sene seiya, yaahimwiicha mwawaachereryeya.
Nihiku nikina, vaavaa asuulupalaawe a Yoosefe yaakukhulaaya ipucepuche sa atiithaaya, Yaakopo aahimuruma Yoosefe wii aye awoone wii aariwo hayi. Vaavaa asinneeni a Yoosefe yaamonnaaya aphiyaka, akina a yaawo yaahi: ‘Hinkoni nimwiiphe!’ Nyenya Ruupeni, muulupalaaya aahi: ‘Hooye, muheereno eyo!’ Mwawiihiihaanto, awo yaahimukuxa Yoosefe emvonyerya mu ehime yawuuma. Vachuli vaya yaakilaathi wii ethanle yawii yeere.
Mu elukulukwene yeeyo, yaahikhumelela aIxumayele. Yuuta aahi wa asinneeni: ‘Hinkoni nimutumihe wa aIxumayele.’ Nave ti yeeyo yeenraaya. Yaahimutumiha Yoosefe ni ikhorowa sa eparata makhumi meeli. Yeela yaari yoonanara ni yoohikhala ekhaikhai mwawiihainki!
Mano asinneeni yaaya waaleela eheni atiithaaya? Yaahiipha epuri nave emuruweya mu nikhami yapuri eyo, kaapha ooreera owo a Yoosefe. Vachuli vaya yaamukuxerya kaaphaowo owaani, wa atiithaaya Yaakopo, nave yaahi: ‘Noophwanya ela. Nkoonani ahaakhanle kaapha a Yoosefe.’
Yaakopo aahoona wii aari yoowo. Akhuwela: ‘Mwaxinama ooluwa amutakhwani okhala amwiiphaleene Yoosefe.’ Nave yaari yeeyowene yeeyo asinneeni a Yoosefe yaacunaaya wii atiithaaya yuupuwele. Yaakopo aahithanana vancipale. Aahinla mahiku mancipale. Nyenya, Yoosefe haakhwile. Hinkoni noone yeeyo yeerenyee wa yoowo weiwo aakuxeryiwiiyewo.
Mapacereryo 37:1-35.