MWAHA 25
Echoko Enathaamela O Yiikuputu
YOOSEFE haawenrye oliphiha murima wa asinneeni. Aahilamula wii arummwa ekhumevo va sala. Vanonto, meekheiye ni asinneeni, Yoosefe aahipacerya wunla. Ninnawerya wuupuwelela otuthuwa wa asinneeni, vawi hiyaasuwela nthowa nene aanleliiye. Vookuchula vaya, owo aahi: ‘Ti miyo Yoosefe. Mano atiithaaka nlelo akumi?’
Asinneeni yaahituthuwa vancipale voohiwerya oloca. Yaanoova. Nyenya, Yoosefe aahi: ‘Rwani nno.’ Vanonto aahi wa yaawo: ‘Ti miyo munninyu Yoosefe, yoowo mwaamutuminhaanyu o Yiikuputu.’
Yoosefe aahipwahiherya oloca mooreera murima: ‘Muhiivahe nthowa na okhala mukituminheene. Chiryene ti Muluku yoowo aakiruminhe o Yiikuputu, wii kivuluxe okumi wa achu. Farawo ookiiyaatherya olamulelo wa elapo yoothene. Hiihaanto, mukookele mwawaakuveya wa atiithaaka nave mwaathoriherye soothene. Nave mwaaleele wii erwe ekhaleke wenno.’
Yoosefe aahaakhuparelanto asinneeni ni waanuula oothenaaya. Vaavaa Farawo aasuwenliiye wii asinneeni a Yoosefe yaahirwa, aahirumiha oleeliwa wii: ‘Ekuxe makereta nave erowe yaakuxe atiithaawe ni ichoko saya. Miyo kinahaala waavaha elapo yooreera ya o Yiikuputu.’
Yaaheerano hiihaa. Va munnawerya omoona Yoosefe akumanaka ni atiithaawe, vavaa awo yaaruiyaya o Yiikuputu ni echoko aya yoothene.
Echoko ya Yaakopo yaari yinnunweene vancipale. Yaawo yaathaamenle o Yiikuputu yaari 70, ophitaanyavo Yaakopo, anamwanaawe ni asisulawe. Nyenya yaahikhalavotho asaaraya nave akhweyatho arummwa ancipale. Hiihaanto yaahikhala mu Yiikuputu. Yiichaniwa aIsarayeli, nthowa nawii Muluku aahitoroka nsina na Yaakopo okhala Isarayeli. AIsarayeli yaahikhala achu a vameekhaaya vancipale wa Muluku, ntoko mummo nnahaalaahu woonela muhoolo.
Mapacereryo 45:1-28; 46:1-27.