MWAHA 24
Yoosefe Onnaweeha Asinneeni
YOOSEFE aahicuna osuwela warimwii asuulupalaawe 10 awo nlelo yaari oonanara ni awuuma mirima. Va nthowa nenla owo aahi: ‘Nyuwo mwa alipa-oohocela. Murweenle woona sooceeceya sa elapo ahu.’
‘Hooye, hinri oohocela,’ yaahaakhula. ‘Naachu ekhaikhai murima. Oothenaahu naanna. Naari 12, nyenya mmoha haavovo nave muhimaahu ohanle owaani, ni atiithi.’
Yoosefe aahiseeriha oheemereryanano. Aahimwaakeelela munneeni Simiyone ntoko amukariposo, aahiyaka akinawo okuxa yoolya ni okookela owaani. Nyenya aahaalamulela: ‘Mwaakookaka, munnaphwanela mmuruuhe muhimaahwanyu.’
Ekookenleene o Kaanani, anneeni yaahimuthoriherya soothene tiithaaya Yaakopo. Owo aahithanana vancipale. ‘Yoosefe haavovo,’ aahikhuwela, ‘nave vano Simiyone haavovo. Nkihiyaru wii mmukuxe mwanaka mukhaani, Penyamini.’ Nyenya, vaavaa yoolya yaamanlaaya, Yaakopo aaheemererya wii emukuxerye Penyamini o Yiikuputu, wii ephwanye soolya.
Yoosefe vanonto aahiwoona asinneeni ephiyaka. Aahihakalala vancipale omoona munneeni echaako Penyamini. Nyenya, haavovo mmoha a yaawo aasuwela wii muchu oocuneya owo aari Yoosefe. Vanonto Yoosefe aaheera echu wii aweehe anneeni awe 10.
Aahilamula wii arummwaawe esarye soolya musaakhuni. Nyenya, moohisuwela ori oothene, aahilamulatho ohelamo ekahi awe ya eparata musaakhuni mwa Penyamini. Echimunleene, Yoosefe aahaaruma arummwaawe waacara vachuli vaya. Yaaphwannyeene arummwaawo yaahi: ‘Mano nthowa heni mwiiyalaanyu ekahi ya eparata ya pwiyahu?’
‘Hiniiyale ekahi awe,’ yaahaakhula asinneeni. ‘Mwaphwanya ekahi eyo ni mmoha a hiyo, m’mwiiphe.’
Arummwaawo yaahaavyavya mu isaakhu soothene nave yaahiphwanya ekahi eyo mu esaakhu ya Penyamini, ntoko munaweryaanyu woona va. Yaahi: ‘Akina nyu mpwaheke, nyenya Penyamini akooke ni hiyo.’ Mano tiheeni yeenraaya asinneeni 10?
Oothene yaahikooka ni Penyamini oya wa Yoosefe. Owo aahi wa asinneeni: ‘Nyuwo oothene rowakani owaani, nyenya Penyamini onaphwanela ohala ntoko kapuro aka.’
Vanonto Yuuta aahilocha: ‘Miyo kakookela owaani kihiri ni mwammiravo ola, atiithaaka anahaala okhwa, nthowa nawii annamusivela vancipale. Khwoo, keemereryeeni wii kihale ntoko kapuro anyu, nave murumiheeni mwammiravo ola owaani.’
Hiihaa Yoosefe aahoona wii asinneeni yaatoroka. Hiyaari oonanara ni awuuma mirima. Hinkoni noone yeeyo eenriiye vano.
Mapacereryo 42:9-38; 43:1-34; 44:1-34.