MWAHA 22
Yoosefe Onnavonyiwa Mu Kariposo
YOOSEFE aarino iyaakha 17 pahiru, vaavaa akuxeryiwiiye o Yiikuputu. Weiwo aatumihiwe wa mulopwana mmoha awiichaniwa Potifare. Potifare aampharela muteko mwene o aYiikuputu, awiichaniwa Farawo.
Yoosefe aanampharela muteko vancipale pwiyawe, Potifare. Va nthowa nenla, vaavaa Yoosefe ainuwaliiye, Potifare aahimwiiyaatherya soothene sa mpa mwawe. Vanonto, nthowa heni nnamoonahu vale Yoosefe ari mukariposo? Nthowa na mwaara a Potifare.
Yoosefe aahikhala mulopwana ooreera, nave mwaara a Potifare aachuna okonano. Yoosefe aanasuwela wii eyo yaari yoocekeya nave heenreno. Mwaara a Potifare aahinanariwa. Va nthowa nenla, vachuli vaya aahootha wa aiyawe ariki: ‘Yoosefe oonanara owo aaheererya okona ni miyo!’ Potifare aahimweemererya owo nave aahinanariwa ni Yoosefe. Aahilamulela wii avonyiwe mu kariposo.
Mulipa ooweherya ekariposo mwawaakuveya aahoona wii Yoosefe aari muchu aphaama. Va nthowa nenla, ahimwiiyaatherya amukariposo akina oothene. Vachuli vaya, Farawo aahinanariwa ni muhooleli awe a soowurya ni muhooleli oopaka iphaawu, aalamula wii ephariwe. Mu ohiyu okina, oopiili awo yaahikhala ni yooloha ya vameekhaaya, nyenya hiyaasuwela yeeyo sooloha saya saataphulelaaya. Oxaakaaya, Yoosefe aahi: ‘Kithoriheryeeni sooloha sanyu.’ Vaavanto, Yoosefe ni okhaviheryiwa ti Muluku, aahaathoriherya yootaphulela ya sooloha saya.
Yoosefe aahi wa muhooleli asoowurya owo: ‘Va mahiku mararu, onahaala otaphuliwa nave onahaala okookela ookhala muhooleli asoowurya wa Farawo.’ Vachuli vaya aahaacereryavo wii: ‘Wakhuma, oloce ni Farawo sa miyo, nave okikhaviherye ovinyavo va nipuro nla.’ Nyenya, wa muhooleli oopaka iphaawu, Yoosefe aahi wa yoowo: ‘Va mahiku mararu, Farawo onahaala woothikila muru.’
Va mahiku mararu, yaaheereya ntoko mummo Yoosefe aalochenliiye. Farawo aahilamula othikiliwa muru wa muhooleli oopaka iphaawu. Vano, muhooleli asoowurya owo, aahitaphuliwa nave aahikookelatho omurumeela mwene. Nyenya owo aahimuchuwala Yoosefe! Haalonche echu sa yoowo wa Farawo, nave Yoosefe aapwahiherya okhala mu kariposo.
Mapacereryo 39:1-23; 40:1-23.