MWAHA 35
Yehova Onnaveleela Malamulwaawe
VACHULI va miyeeri miili ekhummeene mu Yiikuputu, aIsarayeli yaahiphiya va Mwaako wa Sinai, wawiichaniwatho Horebu. Ti nipuro nene nenlo Yehova aalonchiiyevo ni Moose mu ephovo yoovarela. Achu yaahiteka mikocha nave yaahiikhala vavaa mweelukuluku yamoori.
Achwaawo erikimuwehereryaru, Moose aahiwela omwaakoni. Osulu wene weiwo, Yehova aahimuleela Moose wii aachuna wii aIsarayeli eMwiiweleleke ni wii ekhale achwaa’We avamekhaaya. Akhurunweene Moose aahaaleela aIsarayeli yeeyo Yehova aachuniiye. Nave achwaawo yaariye wii anahaala omwiiwelela Yehova, nthowa nawii yaanachuna okhala achwaawe.
Vanonto Yehova aahipaka echu yootikiniha. Aaheriha muthoko wa mwaako ochuwa mwiixi ni orumiha itari. Aahilocatho wa achu: ‘Ti miyo Yehova, Mulukwaa, yoowo ookuminheeni o aYiikuputu.’ Vanonto aahaalamulela: ‘Himunaphwanela omulapelaru muluku mukina, nyenya miyo mekhaka.’
Muluku aahaavaha aIsarayeli malamulo makina mathanu namaxexe. Achu yaahoova vancipale. Yaahi wa Moose: ‘Oloce weyo ni hiyo, nthowa nawii ninnoova wii Muluku aloca ni hiyo, nnahaala okhwa.’
Vachuli vaya, Yehova aahi wa Moose ‘Okiwelele omwaakoni. Kinahaala woovaha maluku meeli oophataateya, va yaawo kirempaakavo malamulo yaawo kinachunaaka wii achu ekhapelele.’ Mwawihiihaa, Moose aahiwela omwaakoni. Aahikhala weiwo mahiku 40 othana ni ohiyu.
Muluku aahikhala ni malamulo mancipale ntakhara a achwaawe. Moose aahirepa malamulweene yaala. Muluku aahimvahatho maluku meeli oophataateyaawo. Muluku mwaneene aari arempeveene malamulo 10 yaawo aalalenyiiye wa achu oothene. Aaniichaniwa Malamulo Khumi.
Malamulo Khumi awo ti malamulo oochuneya. Nyenyatho malamulo makina yaawo Muluku aavanhiiye aIsarayeli toochuneyatho. Nimoha na yaawo nii: ‘Omusiveleke Yehova Mulukwaa ni murima woothene, ni mirukwaa yoothene, ni okumyaa woothene ni ikuru saa soothene.’ Nikina nii: ‘Omusivele mukhwaa ntoko oniraa wiisivela mwaneene meekhaa.’ Mwaana a Muluku, Yesu Kristu, aariye wii yaari malamulo matokototoko meeli yaawo Yehova aavanhiiye a Isarayeli. Vachuli vaya nnahaala osuwela sincipale vooloca sa Mwaana a Muluku ni soohusiha sawe.
Mukwaha 19:1-25; 20:1-21; 24:12-18; 31:18; Malamulo 6:4-6; Onamukutxho 19:18; Mateyu 22:36-40.