MWAHA 36
Mwaasana Amope Amiivira
NKOONANI! Mano tiheeni yeeyo achu aneeraaya? Anavekela wa mwaasana amope! Mano nthowa taani?
Moose akhanleene elukuluku yincipale omwaakoni, achwaawo yaahi: ‘Hinnasuwela yeeyo yeerenyee wa Moose. Hinkoni nimpake muluku wii anikumihemo mu elapo ela.’
‘Sookhala phaama,’ aahi Aaroni, munneeni a Moose. ‘Mukiruuhele ipirinku sanyu sa miivira.’ Vavaa achwaawo yaamuruuhenlaaya, Aaroni aahitotoxa aampaka mwaasana amope amiivira. Nave achwaawo yaahi: ‘Ola ti Mulukwaahu yoowo aanikuminhe mu aYiikuputu!’ Vanonto yaahipaka efesta etokotoko emulapela mwaasana amope amiiviroowo.
Vavaa Yehova oonniiye eyo, aahinanariwa vancipale. Aahi wa Moose: ‘Khuruwa mwawaakuveya. Achu aneera moonanara vancipale. Aacuwala malamulo aka nave annuuramela vamiithoni va mwaasana amope amiivira.’
Moose aakhuruwa mwawaakuveya omwaakoni. Aachamelalaka, aahiwoona achwaawo yiipaka ni wiina moomuruekurerya mwaasana amope amiiviroowo! Moose aahinanariwa vancipale, ophiyerya ovonyerya vachayani maluku meeli oophataateyaale ni malamulo, apwexa. Vachuli vaya aahimukuxa mwaasana amope amiiviroowo amutotoxa ni ompaka okhala nchupi.
Achwaawo yaahipaka echu yoonanara vancipale. Va nthowa nenlo, Moose aahilamula wii alopwana ekuxe malemaaya. ‘Alipa oonanara yaawo yaamulapenle mwaasana amope amiiviroowo anaphwanela okhwa,’ aahi Moose. Nave, mwawihiihaa, alopwanaawo yaahiwiipha 3,000! Mano yeeyo henathonyerya wii ninnaphwanela opwacha vancipale omulapela Yehovaru pahi, oohii miluku yoowoka?
Mukwaha 32:1-35.