MWAHA 40
Moose Onnamana Vamwala
WOOVIRAVO iyaakha iyaakhasene—iyaakha 10, 20, 30, 39! Nave aIsarayeli ninleelo yaari mutakhwani. Nyenya, mu iyaakha soothene iha, Yehova aahaathokororya achwaawe. Aahaalyiha ni maana. Othana aahaahoolela n’neeku, nave ohiyu, ni mooro. Nave mu iyaakha soothene iha, soowara saya hisaathaanle, naari inaani saya hisaawiicenle.
Vanonto waahiphiya mweeri woopacerya wa eyaakha yanee 40 vachuli va ochimula o aYiikuputu. AIsarayeli yaahimaka mikocha wanaawiili o Kateexe. Ti vaavale yaaruminhaaya alipa-oohocha 12 o elapo ya Kaanani, vakhiviru-khiviru iyaakha 40 vahinaakuve. Miriamu, murokorawe a Moose, aahikhwa o Kateexe. Nave, ntoko muchuli, sookachamiha saakhumelela.
Hiyawenrye ophwanya maahi. Va nthowa nla, yaahicheenya wa Moose: ‘Waari waphaama naakhwiile. Mano ntakhara xeeni onikumiinhawe o Yiikuputu, orwa va nipuro nla noonanaraxa, vavaa ohinainuwavo echu? Hiwavovo naari mmiso, naari mukuukhu, naari mpesa, naari sawiima ikinaku. Haavovo naari mano maahi owurya.
Vavaa Moose ni Aaroni yaakelaaya o tabernaakulu oya ovekela, Yehova aahi wa Moose: ‘Thukumanya achu. Vanonto vamiithoni va oothene awo, oloce wa mwala ole vale. Onahaala okhumavo maahi mancipale ntakhara a achu ni inama soothene.’
Moose aahaathukumanya achu nave aahi: ‘Muwiriyane, nyuwo muhinaroromela mwa Muluku! Mano neere wii Aaroni ni miyo nnanwerya woophwanyeryaani maahi va mwala ola?’ Vanonto Moose aahimana mwaloowo wiili ni ekopo, nave yaahikhumelela maahi mancipale. Yaari mancipale ntakhara a achu oothene ni inamasene.
Nyenyanto, Yehova aahinanariwa ni Moose ni Aaroni. Mano moosuwela nthowa nene? Nthowa nawii Moose ni Aaroni yaariye wii awo tiyaahaala okumiha maahi va mwaloowo. Nyenya, aari chiryene Yehova eerinhee. Hiihaa, nthowa noohilocha eeparipari sa ela, Yehova aariye wii onahaala waalaka. ‘Nyuwo himwaakuxerya achwaaka o Kaanani,’ aahi yoowo.
Vachuli vaya mwawaakuveya, aIsarayeli yaahichimula o Kateexe. Woovira wa elukuluku, yaahiphiya Vamwaakoni wa Hori. Vavaa vamuthokoni va owo, Aaroni aahikhwa. Owo aarino iyaakha 123 sa oyariwa. AIsarayeli yaahithanana vancipale nave yaahimunlela Aaroni mmahiku 30. Mwanawe Eleazara, aahikhala mulipa-ephepa mutokweene oocharelavo a nloko na Isarayeli.
Namarepela 20:1-13, 22-29; Malamulo 29:5.