MWAHA 38
Alipa-oohocha 12
NKOONANI sawiima iho alopwanaala ateenxaaya. Nkawehani winnuwa waya wa muthiti wa mpesa ola. Onachuneleya ochepiwa ni alopwana eeli ni ekopo. Nave nkoonani mukuukhu ni sawiima ikina iha. Mano sawiima sooreera sene seiya sirweenle woowi? Wiilaponi ya Kaanani. Muupuwele wii o Kaanani ti weiwo Aaparahamu, Isaaki ni Yaakopo yaakhalaayawo. Nyenya, nthowa na etala yaakhanlewoo, Yaakopo ni echokwaawe yaahithaamela o Yiikuputu. Vanonto, iyaakha 216 vachuli vaya, Moose aari aakuxaka aIsarayeli waakookiherya o Kaanani. Yaahiphiya vanipuro nikina mutakhwani, naweeriwa Kateexe.
Achu o elapo ya Kaanani yaari oonanara. Va nthowa nenla, Moose aahaarumiha alipa-oohocha 12, ariki wa yaawo: ‘Rowani moone ti achu ahayi anakhala mummo, ni wii ti akuru mwawiihai. Moone echaya yaari yaphaama olima. Nave muruuhewo sawiima sikavi.’
Vavaa alipa-oohocha yaakookenlaaya o Kateexe, yaahimuleela Moose: ‘Ti elapo yooreera chiri.’ Nave wii ecichimiherye sa eyo, yaahimooniherya Moose sawiima sikavi. Nyenya, alipa-oohocha 10 yaahi: ‘Achu anakhala weiwo ti ancipale ni akuru. Nnahaala wiiphiwa, neererya okuxa elapo.’
AIsarayeli vawiiwa eyo yaahoova. Yaahi: ‘Waahaala okhala waphaama okhwela mu aYiikuputu, nari mutakhwani. Nnahaala okhwa mukhochoni, nave asaarihu ni anamwanaahu anahaala okuxiwa. Hinkoni nimuthanle muhooleli mukina, mpuroni mwa Moose, wii nikookele o Yiikuputu!’
Nyenya alipa-oohocha eeli awo yaahiroromela mwa Yehova nave yaaheererya waamaaliha achu. Yaari Yosuwa ni Kalebi. Yaahi: ‘Muhoove. Yehova ori ni hiyo. Onahaala okhala wookhweya okuxa elapo.’ Nyenya achwaawo hiyaachunne wiiwa. Yaaphiyerya ochuna owiipha Yosua ni Kalebi.
Yehova aahinanariwa vancipale, ariki wa Moose: ‘Haavovo ori oothene yoowo orino iyaakha 20 naari opwaha vavaa sa oyariwa onii avolowe mu elapo ya Kaanani. Aahoona sootikiniha keenraaka mu aYiikuputu ni mutakhwani, nyenya hanaroromela mwa miyo. Va nthowa nenla anahaala weeceecha mutakhwani mu iyaakha 40, ophiyerya ekhwiiyeene. Yosuwa ni Kalebi’ru tanahaala ovolowa mu elapo ya Kaanani.’
Namarepela 13:1-33; 14:1-38.