MWAHA 44
Rahabi Onnaavitha Alipa-oohocha
ALOPWANA ala ari va yookachamiha. Anachuna ochawa, yaahiihiihaa, anahaala wiiphiwa. Ti alipa-oohocha aIsarayeli, nave muthiyanoowo onaakhaviherya ti Rahabi. Rahabi onakhala mu empa yavasulu va ekintale ya epooma ya Yeriko. Noone nthowa nene alopwanaala akhalenlaaya va yookachamiha.
AIsarayeli yaari eiryeherenryeene olapuwa Muhice wa Yoortano oya o Kaanani. Ehakumvento, Yosua aahaarumiha alipa-oohocha eeli. Aahi wa yaawo: ‘Haweni moone mummo elapo eyo ekhalenlaaya ni epooma ya Yeriko.’
Vavaa alipa-oohochaawo yaaphiyalaaya o Yeriko, yaakhele owannyawe wa Rahabi. Nyenya okhalavo amuleenle mwene o Yeriko: ‘AIsarayeli eeli aavolowa muumu olelo ohiyu wii ehochele elapo.’ Vawiiwa eyo mwenoowo ahaarumiha alopwana wa Rahabi, emulamulaka wii: ‘Waakumiherye vaate alopwana yaawo oryaaweno mpa mmo!’ Nyenya Rahabi aari aavintheene alopwanaawo opathoni. Vawihiihaa owo aahi: ‘Alopwanaawo yaahirwa vaava, nyenya miyo nkaasuwenle wii tawoowi. Yaahicimula wiilakaruvo, ohaakuvale owaliwa mukhora wa nnpooma. Mwaachimakela, munamwaaphwanya!’ Vawihiihaa alopwanaawo yaahaachimakela.
Evinnyeveene, Rahabi aahiwela opathoni. ‘Koosuwela wii Yehova onahaala wovahaani elapo ela,’ aahi wa alipa-oohochaawo. ‘Naasuwela wii owo aahuumiha Eniya Yooxeerya vavaa nyuwo mwaakhummaanyu o aYiikuputu, nave wii mwaahiwiipha mamwene Siihoni ni Ooku. Miyo kooreera muriwa wa nyuwo, va nthowa nla, mukiroromelihe wii munahaala oreera murima wa miyo. Mwaavuluxe atiithaaka ni amiyaka, asinnaka aasilopwana ni aasithiyana.’
Alipa oohochaawo yaahimuroromeliha yeeyo, nyenya Rahabi anaphwanela weeravo echu. ‘Kuxa mukoi ola wooxeerya nave omakelele vaxanelani,’ yaahimuleela owo, ‘nave waathukumanye amusiaa oothene mpa mwaa. Vavaa oothene nniiryaahu nikooke wii nimukuxe Yeriko, nnahaala noone mukoi yoola vaxanelani vaa nave hinimwiipha ori oothene mpa mwaa.’ Vavaa alipa-oohochaawo yaakookenlaaya wa Yosua yaahimuthoriherya soothene.
Yosuwa 2:1-24; aHebri 11:31.