MWAHA 46
Ixiri Sa Yeriko
MANO ntakhara heeni enuuwaaya ixiri iha sa Yeriko? Enakhala ntoko evonyeriwe bomba. Nyenya, mmahiku yaale hiwaarivo abomba, naari mano ikanyawu. Ti yootikiniha ekina ya Yehova! Noone mummo serelenyaaya.
Yehova aahi wa Yosuwa: ‘Weyo ni alipa akhochwaa munnaphwanela mweeche moorukurerya epooma. Mweere hiihaa omoha vanihikuni, mmahiku mathanu nammoha. Mwiikuxeryeke ekaxa ya nlakano. Alipa ephepa athanu neeli anaphwanela ehooleke ni woopa mapekaaya.
‘Mu nihiku na neethanu nameeli, munaphwanela mweeche moorukurerya epooma ikwaha thanu napiili. Vaavanto, moope mapekaawo moovuwa, oothene mukhuwelaka otokotoko wakhocho. Nave ixiriyo inahaala wuuwela vachayani!’
Yosua ni achwaawo yaaheerano ntoko mummo Yehova aalamulenliiye. Mu elukuluku yaweecha eyo, oothene yaari oomaaleleya. Haavovo aaloca. Yaiweya oruma wa mapekaru pahi ni weeca wa manaani. Amwiicani a achu a Muluku awo, mu Yeriko, yaanaphwanela okhala ni woova. Mano munnoona mukoi wooxeerya ole vaxanelani? Mano exaneleene yeele ti yawani? Ayi, Rahabi aaheerano yeeyo alipa oohoca eeli awo yaamulamunlaaya. Emusi awe yaari mpa mmo, yoonelaka.
Mu nihiku na neethanu nameeli, vachuli va weeca ikwaha thanu napiili moorukurerya epooma, mapeka yaahoopiwa, alipa akhochwaawo yaahikhuwela nave ixiriyo yaahuuwa. Vanonto Yosua aahi: ‘Muwiiphe oothene mweepoomani eyo nave mweeyele. Mweeyele soothene. Nnya eparata, mivira, muchove ni muthipo onaphwanela siveleeliwe omuhakhuni wa Tabernaakulu a Yehova.’
Yosuwa aahi wa alipa oohocha eeli awo: ‘Haweni owannyawe wa Rahabi, nave mmukumihewo ni emusi awe.’ Hiihaanto, Rahabi ni emusi awe yaahivuluwa.
Yosuwa 6:1-25.