MWAHA 41
Enowa Yamuchove
MANO henooneya okhala ntoko enowa-nowa eivitikelenle vamwirini? Nyenya tahiyene. Enowa ela ti yamuchove. Yehova aahilamula wii Moose akuhe vamwirini, wii achu ewerye owehaka va eyo ni okhala akumi. Nyenya inowa ikina iho vachayani va, inowa-nowa. Saahaaluma achu enaicheliwa. Mano moosuwela nthowa nene?
Waari nthowa nawii aIsarayeli yaahilocha moovanyihana ni Muluku ni Moose. Yaahicheenya: ‘Ntakhara xeeni onikuminhaawe o aYiikuputu, wii nikhwele mutakhwani? Hiwavovo yoolya nari maahi mano. Nave maana aansokonyerya.’
Nyenya maana yaari yoolya yaphaama. Yehova aahaavaha awo mootikiniha. Navetho aahaavaha maahi mootikiniha. Nyenya achwaawo hiyaathamala othokororya weiwo Yehova aariiyeno wa yaawo. Va nthowa nenla Yehova aahirumiha inowa iha sa mihokhoroko sawiipha wii aalake aIsarayeli. Inowa iho saahaaluma nave ancipale a yaawo yaahikhwa.
Vookuchula vaya, achwaawo yaahirwa wa Moose, eriki: ‘Noocheka, nthowa noolocha moovaanyihana ni Yehova ni nyuwo. Vano vekelani wa Yehova, wii aviixevo inowa iha.’
Vanonto Moose aahivekela ntakhara achwaawo. Nave Yehova aahimuruma Moose wii apake enowa ya muchove. Aahimuruma wii akuhe vamwirini, wii ori oothene ii alummwe awerye oweha va eyo. Moose aaheerano yeeyo Muluku aalonciiye. Nave oolummwa ni inowaawo yaahiweha enowa yamuchoveeyo nave yaahipenuwa.
Nla ti nihuseryo wa hiyo. Mmukhalelo wammori, oothene hiyo nnaphwanaphwana ni aIsarayeli yaalummwe ni inowa. Oothene hiyo nri mmukhalelo wookhwa. Nkawehani moorukurerya, nave munahaala owoona achu yuuluvalaka, yiiceliwaka ni okhwa. Ela enneereya nthowa nawii mulopwana oopacerya ni muthiyana oopacerya, Aatamu ni Haava, yaahihuwela wa Yehova, nave hiyo oothene naanamwanaaya. Nyenya, Yehova ooveleela mareheryo awii niwerye okhala ni okumi mwawiikhalelaru.
Yehova aahimuruma Mwanawe, Yesu Kristu, veelaponi yavathi. Yesu aahikhwa vamwirini, nthowa nawii ancipale yaamwaalikhanyenrye okhala oonanara. Nyenya, Yehova aamveleenle Yesu wii anivuluxe. Naananweha yoowo ni omuchara, nnanwerya okhala ni okumi woohimala. Nnahaala osuwela sawaacheereryeya volocha sa ela.
Namarepela 21:4-9; Yohane 3:14, 15.