MWAHA 42
Puuru Onnaloca
MANO moontoko wiiwa ekwaha eki wii puuru aahiloca? Akhweya munii mweere: ‘Hooye, inama hiinnawerya oloca.’ Nyenya Piipiliya onnanthoriherya wii puuru aahiloca. Noone mummo seerelenyaaya.
AIsarayeli yaari ehalaka ovolowa mu Kaanani. Balake, mwene a Mowaape, aanawoova. Va nthowa nla aahirumiha oya okuxiwa mulopwana owaraala, aweeriwa Balamu wii awuulumele aIsarayeli. Aahilakanano omvaha ikhorowa sincipale, nave va nthowa nla, Balamu aahimuwela puuru awe oya oloca ni Balake.
Yehova haachunne wii Balamu awuulumele achwaaWe. Va nthowa nla, aahimurumiha mungelo ni nlema noorekama, wii amukuphyihe Balamu mphironi. Ola haamoonne mungeloowo, nyenya puurwaawe ahimoona. Va nthowa nenla, owo aahaavyavya omuthekela mungeloowo, nave vookuchula vaya aahikona vachayani. Balamu aahinanariwa nave aahimmana puuruuwo ni ekopo.
Yehova aaheerihanto wii Balamu amwiiwe puurwaawe alocaka. ‘Mano kiweerenleni eheni wii nyuwo mukimane ke?’ aahikoha puuruuwo.
‘Weyo okipanke okhala losoiye,’ aahaakhula Balamu. ‘Kaarino nlema, miyo kaahaala owiipha!’
‘Mano koontoko weerano hiiha?’ aahikoha puuruuwo.
‘Hooye,’ aahaakhula Balamu.
Vanonto Yehova aahimuhiya Balamu wii amoone mungeloowo ni nlema, eemenleene vaphironi. Mungeloowo aahi: ‘Mano ommanenle eheni puuruuwo? Koorwa wokuphyiha ephiro, nthowa nawii honaphwanela oya owuulumela aIsarayeli. Puurwaa ahaakithekenle, miyo kaahaala owiipha kihimphoreihaleru puurwa owo.’
Balamu aahi: ‘Koocheka. Miyo nkaasuwela wii mweemenle vaphironi.’ Mungeloowo aahimuhiya Balamu opwahaka, nave owo aahiya oloca ni Balake. Aaheereryaru owuulumela aIsarayeli, nyenya Yehova, mmpuroni mwa ela, aahimweeriha waareeliha aIsarayeli ikwaha raru.
Namarepela 21:21-35; 22:1-40; 23:1-30; 24:1-25.