MWAHA 97
Yesu Onnorwa Ntoko Mwene
ELUKULUKU vakhaani vachuli va waapenuxa evaasi eeli ooveka-veka awo, Yesu aahiphiya mmwaamucheche vakhiviru ni Yerusalemu. Aahi wa eeli a oohuseryaawe: ‘Volowani mmwaamucheche owo, nave vavo munarwa-m’phwanya puuru omakiwa. Taphulani yaawo nave murweno wa miyo.’
Vavaa yaamuruuhenlaaya puuru owo, Yesu aahinwela. Vanonto aahinwela avolowa mu Yerusalemu, aari vakhiviru. Vawaachamela mweepoomani eyo, waahirwa muloko mutokotoko wa achu okumanano yoowo. Ancipale yarula soowara saya nave yaahaatalela vaphironi. Akinayaahiheka miwaryu a murumo yaakuhatho vaphironi, ekhuwelaka: ‘Muluku mmureelihe mwene yoowo anarwa mu nsina na Apwiya!’
Khalai, mu Isarayeli, mamwene ahihano yaari yoolimalela ovolowa mu Yerusalemu enwenle mwaasana a puuru, wii yiisooniherye wa achu. Ela ti yeeyo Yesu enriiye. Nave achwaawo yaathonyerya wii yaanamuchuna Yesu ntoko mwene. Nyenya, tahi oothene yamuchuna. Ninnoona yeeyo mwa yeeyo yeerenyee vavaa Yesu aavolonwiiye mu empa ya Muluku.
Mu empa ya Muluku eyo, Yesu aahaapenuxa a evaasi ni oorakala. Anamwane vawoona eyo, yaahimuchichimiha Yesu mmasu okhuwela. Nyenya, eyo yaahiweeriha alipa a ephepa onanariwa, nave awo yaahi wa Yesu: ‘Munniiwa yeeyo anamwane ala analocaya?’
‘Ai, kinniiwa, aahaakhula Yesu. ‘Himwalakhannye m’Piipiliyani: “M’mwaano mwa makwiya Muluku onnakumiherya nchichimiho.”’ Hiihaa, anamwane awo yaahipwahiherya omuchichimiha mwene a Muluku.
Hiyo nnachuna okhala ntoko anamwane yaale, kahiyo? Akina anawerya ochuna onihiiha oloca sa omwene wa Muluku. Nyenya, hiyo nnahaala opwahiherya oloca wa akina sa sotikiniha hiiho Yesu onahaaliiye oweerela achu.
Ela hiyaari elukuluku yawii Yesu apacerye olamulela mwilaponi ya vathi. Mano elukuluku ene yeela enahaala orwa liini? Oohuserya a Yesu yaanachuna osuwela yeeyo. Nnahaala waalakhanya sa yeeyo vocharelavo.
Mateyu 21:1-17; Yohane 12:12-16.