MWAHA 96
Yesu Onnaapenuxa Awiicheliwa
VAVAA Yesu eecheechiiye mulaponi, owo aanaapenuxa awiicheliwa. Oovuwa woloca sa sotikiniha iha waahilaleryeya mmawaani ni mweepoomani mmakupa oothene. Hiihaa, achu yaanamuruuhela oorakala, a evaasi ni oohiiwa, ni awiicheliwa akina ancipale. Nave Yesu aanaapenuxa.
Weera vano ovinreveene iyaakha raru ovinyerya vavaa Yohane aampatinsiiye Yesu. Nave Yesu aahiloca wa arummwaawe wii mwawaakuveya aahala orowa o Yerusalemu, wiiwo aahaaliiye wiiphiwawo, ni wii vachuli vaya aahala ovinya wa alipa okhwa. Mu emeya ya elukuluku ela, Yesu aanapwahiherya waapenuxa awiicheliwa.
Nihiku nikina, Yesu aamuhusiha mu nihiku na Sabata. Nihiku na Sabata naari nihiku na wiichuuwa wa aYuuta. Muthiyana owo munamoonaanyu va, aatepa wiicheliwa. Va iyaakha 18 owo eeca ookulama, ahiweryaka wiisookolola. Yesu aahimwiyaatherya matata’we, nave owo aahipenuwa!
Atokweene a mathamalelo yaahinanariwa vancipale ni yeeyo. ‘Arivo mahiku mathanu na nimoha a ophara muteko,’ aahikhuwela mmoha a yaawo wa muloko wa achwaawo. ‘Yaawo ti mahiku a openuxiwa, tahi nihiku na Sabata!’
Nyenya, Yesu aahaakhula: ‘Otakhala nyuwo. Mukina a mwa nyuwo onnataphula enyope awe nave onnarowano owuryiha maahi nihiku na Sabata. Vanonto muthiyana oohawa ola awiicheliwa miyaakha 18, honaphwanela wii apenuxiwe nihiku na Sabata?’ Wakhula wa Yesu waahiwuuliha muru.
Vachuli vaya, Yesu ni arummwaawe yaahirowa o Yerusalemu. Vokhuma mweepoomani ya Yeriko, ooveka-veka eeli a evaasi yaahiiwa wii Yesu onamvira. Va nthowa nenla, yaahikhuwela: ‘Yesu, nikhaviheryeni!’
Yesu aahiwiichana a evaasi awo nave aahaakoha: ‘Munakhwela kiwereleni xeeni?’ Yaahi: ‘Apwiya, mukhunule miitho ahu.’ Yesu atannya mmiithoni mwaya, nave vavaa yaahoona! Mano moosuwela nthowa nene Yesu aapankiiye sotikiniha soothene iha? Nthowa nawii owo aanaasivela achu nave aachuna ekhale ni nroromelo mwa yoowo. Va nthowa nenla, ninnaphwanela ochichimiherya wii mu epoma awe ntoko Mwene, haavovo va elapo yavathi onii aicheliweke.
Mateyu 15:30, 31; Luka 13:10-17; Mateyu 20:29-34.