MWAHA 48
Asinagibeoni Amiruku
IPOOMA sincipale sa o Kaanani yaahiryehererya owana ni Isarayeli. Yuupuwela wii anahaala waapwaha. Nyenya achu a epooma yawaacamanano ya Gibeoni hiyuupuwenle hiihaa. Yaaheemererya wii Muluku anaakhaviherya aIsarayeli, nave hiyaachunne owana moovanyihana ni Muluku. Mano moosuwela yeenraayanto vano?
Yaahiipakiha okhala ntoko muchu onakhala ochaiwenexa. Alopwana amoori yaahiwara soowara soothaala ni isapatho soolala. Yaateexiha apuurwaaya isaakhu soothaala ni iphaawu sawuusaala. Vaavanto, yaahiya wa Yosua yii: ‘Nnarwa ochaiwenexa, ntakhara noosuwela sa Muluku anyu mutokotoko, Yehova. Noosuwela sa ichu hiiho aaweerenliiyeeni o Yiikuputu. Va nthowa nla, ahooleli ahu yaahinlamulela okuxa yoolya yavamukwahani, wii nooleeleeni wii: “Naarummwaanyu. Nroromeliheeni wii himuwana moovanyihana ni hiyo.” Nkoonani wii soowara sahu soothaala mmukwaha woorekama owo, nave wii iphaawu sahu sohuusaala ni wuuma.’
Yosua ni ahooleli akina yaaheemereryanano asinaGibeoni awo. Yaahaaroromeliha ohiwanano. Nyenya, vachuli va mahiku mararu, yaahisuwela wii asinaGibeoni yaakhala vakhiviru.
‘Mano ntakhara heni munleelaanyu wii munarweela ochaiwene?’ aahaakoha hiihaa Yosua.
AsinaGibeoni awo yaahaakhula: ‘Noheerano ela nthowa nawii noosuwela wii Muluku anyu, Yehova, olakana wovahaani elapo yoothene ya o Kaanani. Na nthowa nla, naahoova wii munahaala oniipha.’ Nyenya, aIsarayeli yaahikhwaaniherya nlakano naya nave hiyaawiiphale asinaGibeoni awo. Navento, yaahaapaka okhala arummwaaya.
Mwene o Yerusalemu aahinanariwa nthowa na murechele yoowo asinaGibeoni yaapankaaya ni Isarayeli. Aahi wa mamwene makinaawo maxexe: ‘Rwaani mukikhaviherye owana ni Gibeoni.’ Nave ti yeeyo mamwene awo mathanu yeenraaya. Mano asinaGibeoni yaari amiruku opaka murechele ni aIsarayeli, vokhala wii mamwene awo yaahirwa owanano va nthowa nene nenlo? Nnahaala woona.
Yosuwa 9:1-27; 10:1-5.